Апсны йгIвыджьхуз апрезидент Багапщ Сергей сынчIва йхъыцIуашыз асквш 70 аюбилей йадахIвуата Согъвым апны ахъмаштылра айззараква акIвшатI.
Барганджиа Саид
Апсны йгIвыджьхуз апрезидент Багапщ Сергей йхъмаштылра йазынархата мартI а 5 атшын Согъвым апны йакIвшатI Адуней наука конференция йгьи асурат гIарбарта. Ахъмаштылра айззараква Багапщ Сергей йысквш 70 аюбилей йадахIвуата йадгалан.
Адуней наука конференция адыргалтI Апсны агIвымакъраль уысква рминистерства, Апсны анаукаква ракадемия йгьи Апсны къральыгIва университет. Ауи Апсны ауагIа ркъральыгIва агIархвитхра мгIвайсра, акъральыгIвара ащаквыргылра йгьи Апсны ахъахвитра адуней къральква радгылра рпны Багапщ Сергей йгIайырбаз алшараква йырзынархан.
Багапщ Сергей йюбилей йадахIвуата йакIвшуз аконференция гIахъитIытI Апсны апремьер-министр Бганба Валерий. Ауи йгвыргъьахъв гIачважвара апны йгIаликIгIатI акъраль йгIвыджьхуз апрезидент Апсны атшауацIнарыхра апны йалацIара швабыж йшдуу. ЙшихIвазла, Багапщ Сергей данпрезидентыз атлахан «Апсны рыхъазла йбаргвдзаз агIаншараква йрыквшватI».
«Багапщ Сергей Василий йпа йыхьыз йапщылапI Апсны зхъа йахвиту къральыгIвата ащаквыргылра. Апсны акъральыгIвара ащаквыргылра апны ауи йалацIара магIныта йаму хвы узаквымцIушта йдупI. Бзита дыздыруаз зымгIвагьи ргвы дшгIатахазла ауи Россия йгьи Апсны райгвара багъьата дазгылан. ЙкъральыгIвчва сабап ду шрызгIайгуашыз, ауыс алачпаква рырхъйара апны хъвдаквыщт ду шгIайырбуш йанакIвызлакIгьи дащтан», – йхIватI Бганба Валерий.
Аконференция апны дгIачважватI ахъмаштылра айззараква йрылаз ГIвадахь Осетия апрезидент Кокойты Эдуард. Ауи йгIаликIгIатI апсыуа йгьи асатин уагIахъаква райгвара арыбагъьара Багапщ Сергей къару ду шалайцIаз.
«ХIара айщчва рапшта хIащтаныкъвун. Саргьи ауи дызхъысыз абаргвыраква сырхъыстI. ХIуагIахъаква айщчвара рбжьата йгIамгIвайстI. Ауи йаквшахIатпI атурых гIаншараквагьи. Апсны ауагIа дшрызцIабыргу гIайырбауата ауи йбаргвдзаз аквыргъвгъьвараква йчхIатI», – йхIватI Кокойты.
Багапщ Сергей Апсны ауыжвгIанчIви турых апны йынкъвигаз ахъвдаквцIара гIаликIгIауата дгIачважватI Апсны агIвымакъраль уысква рэкс-министр, АААК ЙхIаракIу асовет йалу Чирикба Вячеслав.
«Багапщ Сергей дгIвычIвгIвыс дууын, дполитиканкъвгагIв мчхъан. Зыла щарда абахьаз агIвымакъраль политиканкъвгагIвчвагьи ажурналистквагьи ауи йанйынйуз ргвы чIвун. Йгвапари йгвхътIыри чвымыгъчвала йзаъазгьи Апсны йапшIагылуаз агIвычIвгIвысквагьи ргвы ахвгIун. Ауи ачважвара гвыбзыгъа дазычпан, йажва цIолан, аполитика уысква бзита йынкъвигун. Ауаса зынгьи хъачвамщара гьгIаймырбузтI, йыдзхъа йырхIвуз ажва йылайхIвун. Йшанла дхътIын, гIвычIвгIвысагIа ду нкъвигун», – йгIаликIгIатI Чирикба.
Аконференция апны йгIачважватI Апсны, Россия йгьи ГIвадахь Осетия рпны йбергьльу аполитика йгьи ажвлара уыснкъвгагIвчва – Россия аполитика йгьи анаука уысхагIв, «Ахьдз-апша» орден йгIвбахауа ахIагIара анкъвгагIвы Бабурин Сергей йгьи аполитолог, МГИМО апрофессор Мигранян Андраник.
Россия апрезидент йуысхарта аунашвачпагIв йапхъахауа йтарагылагIв Кириенко Сергей йыхьызла Апсны йгIвыджьхуз апрезидент йчвахъабагу атшазынархара швъа Багапщ Сергей йтгIачва йырнапIыцIарцIатI.
Багапщ Сергей йхъмаштылра йазынархата Апсны акультура йгьи атурых-культура тынха рминистерства йадыргалтI ареспублика гIарбарта тдзы апны йгIахъыртIыз асурат гIарбарта. АгIарбарта асуратква гIадыргалтI Айсра ачIахIра музей, Сергей Василий йпа йтгIачва, йынбжьагIвчва йгьи йыцынхакваз.
Апсны акультура йгьи атурых-культура тынха рминистр йтарагылагIв Кобахиа Батал агIарбарта асуратква акъраль ркультура тынха йабайара дута йпхьадзатI.
«Асуратква рщарда Попов Владимир йхъихтI. Асурат гIарбарта йгIадыргалтI Сергей Василий йпа акъральыгIва йгьи ажвлара уысхагIвчва йгIайыртыз ачвахъабага согIаквагьи. УахьчIвала арат асогIаква акъраль акультура тынха йахъвхауата рмагIны дупI», – йгIаликIгIатI ауи.
Асквш 2019 мартI а 4 Багапщ Сергей сквшы 70 йхъыцIуашын. Апсны йгIвыджьхуз апрезидент Россия йгьи гвыпкI йнадзауа анахьанат агIвыма къральква ареспублика ахъахвитра зхъкъьачIвыла йадгылыз апхъагылагIвта йыхьыз уыжвгIанчIви Апсны къральыгIва атурых йалалтI.
швталра йа тшаншвцIара атахъыпI.