Барганджиа Саид

ЙагIвсыз амчыбыжь ауацIа Апсны апны коронавирус рыхьуата ужвыгьи 53-гIв гIараутI, азгIва рыхьуи йрымхьуи гIаддырдыруата архъвыхра 553-гIв гIакIылстI. Ауи апш хабар аргатI АуагIа коронавирус згIва йачвыхчарала аоперштаб.

Аштаб ауысхагIвчва йшырхIвазла, ужвы ари асахIат Гвдауыта Аквта район чымазагIвтара апны коронавирус шрыхьуа щаквдыргылхьата 14-джв щтIапI. Амчыбыжь ауацIа ачымазагIвтара хвгIвы гIацIырщтхтI.

"Пандемия гIаджвыквлищтара Апсны апны коронавирус зхьуата йщаквдыргылыз зымгIва шалу 242-джь йнадзитI. Ауат йрыуата 92-гIв бзихахтI, хгIвы псытI", – хабар аргитI аоперштаб.

АуагIа коронавирус згIва йачвыхчарала аштаб ауысхагIвчва Апсны абзазагIвчва зымгIва йымчмазагIвхара ахIатырла амальта йрымула рхъа йазсакъырныс йаквгIазшIыртитI.

АуагIа коронавирус згIва йачвыхчарала аоперштаб ауысхагIвчва датшагьи йгIархIватI Апсны апны COVID-19 ауыс уазцгIата аъачIвагIагIвчва рбжьагажва уаздзыргIвы йызлауаш йанакIвызлакIгьи йынхауа ателефон номерква шаъу.

Согъвым абзазагIвчви асасчви 995–02–07 йгьи 935–30–71 номерквала телефон йас йауаштI, Очамчыра – 925–10–09, Ткъварчал – 925–10–03, Гала – 925–10–07, Гагра – 925–10–05, Гвдауыта – 925–10–02, Агвдзера – 925–10–04 номерквала.

Щарда йнамихуата Согъвым апны йазакIу аномер 0303 уас йауата йырчпуштI, йазакIу аномер ареспублика шабгу апны йынхауата йырчпарнысгьи йащтапI.

КIавкIаз апны COVID-19 тшшауацIнахуа гIазырбауа астатистика тшахаргIваза йауаштI абари азцагала>>