Апсуа спорт хъвмарраква гIащаквыргылхрала АААК апроект архъйара алгатI Апсны апны. Ауи агIкыткI – Мгвыдзархва, ЧIлоу, Араду, Моква, Абгархыгв, Тамыщ, Дурыпщ йгьи Джгерда – йрыуата апхьагIвчва 300-гIв райхIа гIаланакIтI. Апроект апкъ йтата СогIвым йаъу а-Конгресс ауысхарта анхагIвчва ашIыпIа хъвшараква руысхагIвчва рыцта ауагIахъа спорт квпшыраква ртурых йгIаквчважвауа алекциякви «Аимцакьачара» (апсуа топасща – аредакция ррытазага), «Ахылпахас» (апсуа бызшвала «ахъылпа гIакIра» – аредакция ррытаразга) йгьи «Акьыброу» (аурышвква чIвгIванчкIвынла рхъвмарра йашIырпшу апсуа хъвмарща – аредакция ррытаразга) уагIахъа хъвмарщаквала амастер-класскви адыргалуан.

АуагIа рспорт хъвмарщаква гIащаквыргылхрала апроект ауагIахъа ргвбайара ахчара апны уыс ду шархъйаз гIаликIгIатI Адуней апсуа-абаза конгресс ЙхIаракIу асовет аунашвачпагIв Эгьзакь Мусса.

«Апсны шабгу апны а-Конгресс ашIыпIа хъвшараква йдырхъйауа апроектква Абаза уагIахъа ргвбайари рцIаскви гIащаквыжьри тшауацIдрыхри йырзынархапI. ЗымгIва йрапхъата ауат ззынхауа чкIвыныргIа ауагIахъа спорт квпшыраква, датшагьи хIуагIа йырцIасу аджьгарраква бзи йшырбуш акIвпI», – йгIаликIгIатI Эгьзакь Мусса.

АуагIахъа хъвмарщаквала атшыбжьараква июнь йгIашIарышвта сентябрьдза пщымызкI руацIа йакIвшатI. Ауи азаман ауацIа апроект йалалкваз апсуа хъвмарщаква ддырдыргIвацала йгIанымхауата бзи йырбарнысгьи йахадзатI. Ауи даквшахIатхатI чкIврныргIа ртшауацIыхрали физкультурали АААК ахъвшара аунашвахъцIагIв, ауагIахъа хъвмарщаква гIащаквыргылхрала апроект унашва ахъызцIуз Берзениа Валерий.

«ХIара чкIвыныргIа ахъвмарраква рымагIальаматта йхIчпарныс хIылшатI. Ауат «Аимцакьачара» йамагIну рахIхIвра йахъазымкIва ауи ушасуашгьи дхIырбун, даргьи йыргвапхадзауата йгIахIылалуан. АчкIвынчва хъвмаруа йаналага йгьузашIамкIхуашызтI», – йхIватI Берзениа.

Амастер-классква акIвдыршара апхъала ахъвмарщаква шаъаз гIаддырдыруата нхара ду дырхъйатI. АААК агвып агIвыраква йгIарнырхыз, акытква рбзазагIвчва ахIбачва йгIарархIвыз ахабарква адыркIылын ауагIахъа спорт квпшыраква рхабзаква разкIкIра дрыхIазыртI.

АуагIахъа спорт квпшыраква гIащаквыргылхта ауагIа йрылагахра магIныта йаму даквчважвауата апроект зхьырпшыру Берзениа Валерий ауат апсуаква ркультура йшахъвыкIу, хвдугьи шрыму гIаликIгIатI.

«ХIара хачIв хъадата йхIыргылитI апсуаква ркультура, ртурых, рыбызшва гIащаквыжьра. Апсуа уагIахъа хъвмарщаква гIащаквыргылхрала апроект чкIвыныргIа аспорт бзи йшырбуш, апсуа культура йыргвапхауата йшрылархIвуш йазынархапI. Апроект хIырхъйауата хIара ацIайква хIуагIа зныкI йрымаз йапшым ахъвмарщаква дхIырдырра хIтахъыпI: ауатламца апхъа айсчва дрыхIазыруан, щаласта йгIадзындыргылуан, ррефлексква агъьырчIвуан», – йгIаликIгIатI Берзениа.

Мастер-классипхьадза апхьагIвчвата 40-гIв райхIа алазлун. Апроект апкъ йтата АААК акинопшраквагьи аднагалтI: акласс ахIбаква «Амазара» проект йауата апсуа бызшвала йхъырхыз афильмква, айцIбачвагьи – Квициниа Астамур ймультфильм «АбраскIьыл йфыруысква» ддырбун.

 Апсышвала йызпшыз акиноква апхьагIвчва йшыргвапхаз гIайхIватI ашIыпIа хъвшараква рыцынхарала АААК ахъвшара аунашвахъцIагIв Жьыба Дмитрий.

«Акиноква цкыткI рпны йгIахIырбан – йъакIвызлакIгьи ацIайква гIахIайгвыргъьауа йгIахIпылуан: ауат акиноква ргвапхадзауата йырпшуан, уацIыхъвангьи ауат рымаджьащахъвата йрыквчважвахуан. «Апхын кинотеатрква» рзадыгIгалуата хIатарызгIайхнысгьи йгIахIыхIвун. Акытква рбзазагIвчва ауи йапшу акинопшраква дара-дара йадыргал йшауаш йазхъвыцуа йалагатI», – йгIаликIгIатI Жьыба.

АААК Абгархыгв кыт апны йапхъахауа медицина цхърагIарали ауагIахъа хъвмарраквали атшыбжьараква акIвнаршатI

© АААК

АуагIахъа спорт квпшыраква гIащаквыргылхрала апроект архъйара алдыргауата Дурыпщ, Джгерда, ЧIлоу кытква, СогIвым къала 1-хауа аквтанай апхьарта рапхьагIвчва алата «Ахьышьҭра» анкъвакъвра адыргалтI. Ауаъа анкъвакъвыгIвчва амастер-классква рпны тшыззырбжьаз гIадырбатI.

Апроект шакIвшаз йаквчважвауата АААК агвып чкIвыныргIа рквта ауагIахъа спорт тшауацIнарыхрала анхара дахIвра шамаз гIалыркIгIатI, апхъахьылагьи апсуа хъвмарщаква тшауацIдрыхрала йчпачIву лырхтI.