Адуней апсуа-абаза конгресс асквш 2023 ауацIа анхара агIарбараква адыркIылхтI, ахачIв шIыцква дыргылтI.
Хвтаба Алиса
АААК ауысхарта апны декабрь а 25 АААК ЙхIаракIу асовет аунашвачпагIв Эгьзакь Мусса онлайн амальла Адуней апсуа-абаза конгресси «Алашара» адкIылари рынхагIвчва гвыпква драбабатI. Анхара йазынархаз айчважвара йалан АААК ЙхIаракIу асовет аппарат аунашвахъцIагIв Таниа Кани хабарргарала аполити абадыргакви унашва рхъызцIауа Тарба Тенгьызи. Анйара апны асквш 2023 ауацIа йшынхаз йалачважватI. Ауи акIвымкIвагьи йгIайуа асквш агIан рыцIа гватра ззыбачIву анархараква, ахачIвква йрыквчважватI. Эгьзакь Мусса анхарагьи, агвыпква рацасрагьи, анхара йазрыму азгIашыкърагьи хвду рыквицIатI. Ауи анхагIвчва йгIаталуа Асквш ШIыцла драйхIвахIвтI, згIвадара багъьа рымазларныс, баракьат рыгымхарныс, рмурадква зымгIва рзырхъйарныс рзитахъта дрызхIвахIвтI.
«ХIадкIылара ахачIвква зымгIва йрыщату Абаза уагIахъа аэтнокультура ацзакIыра гIащаквыргылхра, руагIахъа лкIгIара гIахчара, адиаспора йауакву рыжвла ъану рпсадгьыл йгIайхырныс ахъазла алшараква гIаныршара акIвпI. ХIара хIыззынхауа хIгвы зырчIвауа алалра пшдзаква адыгIгалрагIваца гьакIвым, абызшва, агвбайара, атурых гIащаквызжьуаш, ауыла хIуагIахъа гIазхчуш апрограммаква лыхIхитI. Ауат апрограммаква дзачIвызлакIгьи хIща йалазара атахъу хIцIасква, хIымч, йхIаргвану агIвычIвгIвыс йызхIыму абзибара ргIахчара йацхърагIитI. Щарда хIчпахьатI, йхIпыру рыцIагьи йщардапI!» – дацIачIвагъватI ауи.
Онлайн-алачIвара амщтахь АААК ауысхарта апны СогIвым апны АААК ахъвшара аунашвахъцIагIв Реквава Темур далата анхара йазынархаз анйара акIвшахтI. Ауи йгIаликIгIатI Адуней апсуа-абаза конгресс йтыцIуа асквш ауацIа агвбайара, акультура абадырраква зрыбагъьауа, акъральгIв жвлара ащаквгылри хIкъральгIвчва райгвыгIври йырзынарху проект къомкI шархъйаз.
«Асквш агIаншараквала йбайан. ХIара апроект дуква ъахIзырхъйаз хIхъа алахIырдуха йауаштI. ЙгIалкIгIара атахъыпI ахъвшараква зымгIва рынхара асабапра йалахIара, агIарбараква агъьхара ахIатырла бзита йшацацхърагIуз. Асквш 2023 агIан уыста йхIырхъйарныс хачIвыта йхIыргылыз йайхIата йхIчпатI, йапшым апроектквала уыс 102 акIвхIыршатI, ауат апроектква Апсны акыт 50 райхIа гIарыланакIтI. Ауат уагIата 5000-гIв райхIа рылан», – йгIаликIгIатI Реквава.
РыцIа йауацIыхта анхара агIарбараква гIархIватI ахъвшараква рунашвахъцIагIвчва. Ауат асквш 2023 йшынхаз, асквш 2024 агIан йыздынхалуаш йаквгIашIастI.
А-КОНГРЕСС АППАРАТ
СогIвым йаъу АААК ауысхарта агвып уахьчIвала 16-гIв нхагIвчва йнадзитI. АдкIылара апахь хачIвыта йгIагылуа йрылахIапхьадзагьи анхагIвчва рпхьадзарагьи йалахIитI. Агвып цхъвшаракIта йшапI:
- арыпхьарали жвлара джьгаррали згIвадарахчарали ахъвшара;
- ашIыпIа хъвшараква йрыцынхауа ахъвшара;
- чкIвыныргIи физкультури тшауацIдрыхрала ахъвшара;
- хабарргарала ахъвшара;
- секретариат;
- бухгалтерия.
- Ауи акIвымкIвагьи кIьыдата йынхитI АААК йаланакIуа апхIвысква р-Координация совет.
ОСАЗ ШЫНХАЗ
Арыпхьарали жвлара джьгаррали згIвадарахчарали АААК ахъвшара (ОСАЗ – аредакция ррытаразга) асквш 2023 агIан рыцIа йауацIыхыз апроектква йрыуазакIыпI мартI мыз агIан йджвыквырцIаз акытква рапхьартаква рпны апхьагIвчви арыпхьагIвчви рзгIвадара архъвыхра. Ахъвшара аунашвахъцIагIв Хагба Изольда йшылхIвауала, апроект мурадта йамапI йхъару акытква йыртабзазауа, ауи йгIалцIла ачымазагIвтараква йцарныс зчвыбаргву апхьагIвчви арыпхьагIвчви йапшым амедицина рхъвыхраква рзадгалра. ПсхIвы кыт ацара ъабаргву йгIалцIла ауи абзазагIвчва йырпшра ахъазла айъазагIвчва хымшкI ауаъа йтан.
«Ари ауыс хIара Апсны згIвадарахчарала а-Министерства хIыцта йадыгIгалтI. Апхъапхъа ауи ауысла аминистр Бытба Эдуард хIйангIалтI. УадыргIвана хIара аминистр йтарагылыгIв Делба Саида йгьи айъазара-профилактика цхърагIарала а-Министерства аунашвахъцIарта аъачIвагIагIв хъада Гуниа Есма хIрыцынхун, ауат хIъацалакIгьи УЗИ ргIапсгала, ЭКГ аппаратла хIадыргалуан, йхъадахугьи – аъачIвагIагIвчва гIахIыцырцIун: акардиологква, аотоларингологква, аневрологква, аофтальмологква, апедиатрква, аурологква, арентгенологква. ЙгIахIцхърагIун ахъатачIв квтаквагьи – MedLife лаборатории «Альбамед» айъазарта квти. ХIара ари апроект архъйара зкъару гIалазцIаз дзачIвызлакIгьи хIизыразпI», – лхIватI Хагба.
ОСАЗ аъачIвагIагIв Хьышба Науыр апхьагIвти арыпхьагIвти йызпшыз рпхьадзараквала апроект агIарбараква гIайхIватI.
«МартI йгIашIарышвта хIара 19 кыткI йрыуу арыпхьагIвти апхьагIвти 1500-гIв райхIа рзгIвадара хIырхъвыхтI, ауат йрыуата 1200-гIв райхIа апхьагIвыпI. ЗымгIва гIауахвырквын Апсны акытква рапхьартаква рпны цIайта 11-нзкьыгIв раъара апхьитI, йшцауала, апроект ауат ржвизпроценткI гIаланакIтI, ауи гIарбара бзипI. Медицина ъачIвагIагIвта 80-гIв раъара гIахIцхърагIун», – йхIватI Хьышба.
Ауи акIвымкIвагьи ОСАЗ асквш 2023 ауацIа арыпхьара проектквагьи архъйатI: айъазагIв дъадзаным агIвычIвгIвыс йапхъахауа цхърагIара шйурадзушла атшыбжьаракви ъачIвагIагIалхрала атренингкви.
«Асквш 2022 сентябрь хIалаган хIара МЧС аъачIвагIагIв Амычба Индира дхIыцта айъазагIв дъадзаным агIвычIвгIвыс йапхъахауа цхърагIара шйурадзушла атшыбжьараква джвыквыгIжьтI. СынчIва апхьартаква хIцауамца тшыбжьара 23 адыгIгалтI, ауаъа йгIадгылыз апхьагIвчва 1000-гIвы раъара агIвычIвгIвыс данмахра, йчважь анбылра, амара йхъа йанташра, закI ангIайыцхIара, йыбыгIв аншIчIвара, удын анйыквшвара, йща ангIаджвыквылра зынла уицхърагIара ахъазла й учпара атахъу рархIвтI. Йазалхыз атшыбжьагаква гIадрысабапуамцара агвы райшата уаквымхIауата йшучытIуш, агIвычIвгIвыс йпсып шйураухуаш йазырбжьатI. Ауат атренингква ацIайква рыхъаз сабап ду рылата йхIпхьадзитI, йауа ухIварыквын, агIвычIвгIвыс айъазагIв дъадзаным ушицхърагIуш анудыруа ауи дузыгIахчитI», – лхIвитI Хагба Изольда.
Хьышба Науыр йшихIвазла, «ЪачIвагIагIалхра» проект апкъ йтата асквш 2023 ауацIа 11 апхьартакI йцатI. АпхьагIвчвата 500-гIв раъара зуыс бзита йыздыруа йапшым аъачIвагIагIвчви астуденткви йрачважварныс рылшатI.
«АпхьагIвчва хIанрачважвуз хIара гвы ахIттI акласс ахIбаква йрыцIу щардагIвы апхъахьыла йызланхуш аъачIвагIа пасата йшазымхъвыцуа, ран-рабачва ауи ауысла йшырмайкьангьашуа, ужвы рыцIа йатахъу аъачIвагIаква дукI шрылрымдыргIауа. Ауи анамхъара хIырчвыхра ахIатырла атшыбжьараква акIвхIыршитI, хIкъраль уахьчIва йатахъу йапшым ъачIвагIа щарда хIрыквчважвитI, ауат йрыланхауа, йзакIымкIва-йгIвбамкIва аъачIвагIаква здыруа ауагIа йрабахIырдыритI, йдхIрачважвитI», – йхIватI Хьышба Науыр.
Адуней апсуа-абаза конгресс апны йгIаныршу Ан-абачва рклуби «Альбамед» медицина квта аунашвачпагIв Ходжава Альбини зпсихики зчважвари ртшауацIыхра тащахIу асабиква гIащаквуыргылхра, ауагIа йрылагIващауа, йапхьауа йцара ахъазла алшараква йырзынархаз анйара акIвдыршатI. Аконференция айъазагIвчва, адефектологква, алогопедква, арыпхьагIвчва, ауагIа йрыдынхалуа акъвырльыкъвхартаква, ан-абачва аднакIылтI.
«Анйара апны йапшым аъачIвагIагIвчва гIачважватI, рынхара йгIанацIгIаз гIархIватI, айъазара апхъагыла амальква йрыквчважватI. Аконференция йалан ауи анархарала йынхауа айъазагIвчва. Ауат дара йшырхIвахызла, йгIарыхъвуш шIыцра щарда рдыртI. Аконференция апны Апсны апны, ажва ахъазла, «Альбамед» медицина квта апны йгIадрысабапуа йызлагахьаз апхъагыла айъазащаквагьи гIадырбатI. Ауаса ауат амальква шаъу зымгIвагьи йгьырдырам», – йгIалылкIгIатI Хагба.
Хьышба Науыр асквшква 1992-1993 рагIан йакIвшаз Апсны ауагIа р-Абашта айсра йауата рахIа йщарычIварахаз айбащра – асквш 1993 «МартI апхъалатрысра» – ужвыгьи сквшыкI анахъыцIуашыз йадахIвуата АААК Чамагуа Хараз йыхьыз зхъу Гагра аквтанай апхьарта апхьагIвчви Апсны а-Фыр, «ХIара Гвымста ухъыста хIаъапI» книга згIвыз ГарцкIьиа Автандили ранйара шаднагалыз гIайхIватI.
«АпхьагIвчва ГарцкIьиа Автандил йгIвырала йхъырхыз афильм «ХIара Гвымста ухъыста хIаъапI» ддырбатI. Акнига згIвыз асквш 1993 мартI айсра гIаншараква гIайгвалашвахтI, апхьагIвчва разцIгIараква джьауап рыйтхтI. Анйара аналгуз ГарцкIьиа ауи йалаз зымгIва йгIвыра согIата йрыйттI», – йхIватI Хьышба.
АШIЫПIА ХЪВШАРАКВА ЙРЫЦЫНХАУА АХЪВШАРА ШЫНХАЗ
Ахъвшара арайонква рпны йаъу ахъвшараква йрыцынхауата уыс щарда архъйитI. Жвлара магIны змаз апроектква, акцияква, алалраква асквш шабгаз йакIвшатI. Ауи апшта, ашIыпIа хъвшараква рахIварала асквш 2023 ауацIа йазалху цхърагIара гIандыршарныс 14-н анаъа-араъа йцатI: спорт ъамапсыма, оргтехника, уагIахъа дамыгъа зну ахIапчыпква, уыхвага пкъыгIва датшагьи кIара рхвгIатI. «Аимадара» проект апкъ йтата 6 гIарбаракI адыргалтI (ауат сабита 350-гIв райхIа рылан)
АГУ ацхърагIарала этнография йазынархата 4 лекциякI акIвдыршатI (125-гIв рылан)
Асабиква аниматорква алата 4 акциякI рзадыргалтI
Афон ШIыц къали Хыпста кыти рпны шIыцта АААК агIвшIыпIа хъвшаракI гIахъыртIытI.
АшIыпIа хъвшараква рыцIа-рыцIа йщардахитI, ауат проектта йгIаджвыквырцIауагьи йрылахIитI, рнадзарагьи агъьхитI. ХIара уыста йхIхаз хIазыразпI, йащтагIайуа асквш хIынхара рыцIагьи йагъьхIчIвныс хIмурадпI», – йхIватI ашIыпIа хъвшараква рыцынхарала ахъвшара аунашвахъцIагIв Жьыба Дмитрий.
ЧКIВЫНЫРГIИ ФИЗКУЛЬТУРИ ТШАУАЦIДРЫХРАЛА АХЪВШАРА ШЫНХАЗ
Проект бзидздза абзазара йаланажьтI чкIвыныргIи физкультури тшауацIдрыхрала ахъвшара.
«Абанпара шIа рыдынхалра хIхъвшара рыцIа гватра зызнабауа нархарапI», – йгIаликIгIатI ауи унашва ахъызцIауа Берзениа Валерий.
Ауи апшта, асквш 2023 январь йгIашIарышвта декабрьдза «Ирӡтәым» проект акIвшатI. Ауи йгIаланадыркIтI йбергьльу апсуа турыхдырыгIвчва, абызшвадырыгIвчва, аэтнографкви аэтнологкви. Гвдауыта район апхьартаква рапхьагIвчва йапшым атемаквала 10 лекциякI рзадыргалтI: «Апсуа пшцIа: ацIаскви ахабзакви», «Апсуаква ръадаб-намыс йащату «Апсуара» йазынарху азцIгIараква», «АцIасква йырпщылу ашвакви ауат шгIадрысабапуи», «Апсуаква руагIа дипломатия», «Апсуа уагIахъа гIахIвра атурых», «Апсуаква тшрыгIврала рцIасква», «ХХ асквшышв ацIыхъви ХХI асквшышв ахъакви рагIан Апсны атурых».
Ауи акIвымкIвагьи ахъвашара Апсны атурыхи акультури йырзынарху «Викторина Абаза» акъыльрыпшгIара-ларпшра хъвмарра аднагалтI. Ауи быжьгвыпкI алан, азакI а-Конгресс агвып ракIвын.
Апсны АйгIайри Ахъахвитри рысквш 30 андыртлапIуз амш йадахIвуата «Айсра асальамшвъаква» проект акIвшатI. Ауи 14 сериякI йнадзуз видео аднакIылтI, ауаъа АААК анхагIвчва асквшква 1992-1993 рагIан айсра гIаншараква гIазхIвауа асальамшвъаква йгIарыпхьатI. Агвыргъьахъв йазынархан «АйсыгIв дзыгIзаз агара» гIарбарагьи.
Ахъвшара Очамчыра район апхьагIвчва рквта футболла анкъвакъвра адгалрагьи йацхърагIатI. Анкъвакъвра 15 командакI алан. Ауаъа йхъвмарыз рпхьадзара 170 йахънахIватI.
Датшагьи проекткIта йалтI апсуа уагIахъа спорт хъвмарщаквала амастер-классква радгалра. Ауат акытква йцауамца акласс ахIбачва рапхьагIвчва рыхъазла йакIвдыршун. ЗымгIва шалу апроект 200-гIв райхIа гIаланакIтI. Анкъвакъвра афинал «Апсны» этнопарк апны гвыргъьахъвыта йакIвшатI.
«Амазара» проект дырхъйауата «Апсуа кIвалдзы» (ауи «ГУМ» акультура-уысхарта уатыкв апны йгIадырбатI) йгьи «АимцIакьачара» (АААК ауысхарта апны йгIадырбатI) фильмква рпрезентацияква акIвшатI.
МакъымршIыйарала апроект «АшIара рыбжьы» апхьарта йцауа саби 130-гIв райхIа гIаланакIын шIыскI злу чкIвыныргIа тшъагIадырбауа уатыквхатI. Асквш 2023 ауацIа ауи анхара йабзирахатI пщвидеоклипкI ргIаныршара. РыцIа йауацIыхта ахъвшара уыста йахаз асайт апны узапшуаштI.
ХАБАРРГАРАЛА АХЪВШАРА ШЫНХАЗ
АААК хабарргарала ахъвшара ахъвшараква зымгIва йгьи а-Конгресс аппарат шабгу Апсны апынгьи ауи утыцIтагьи уыста йырхауа аргамта йачпитI. Асквш 2023 ауацIа гIвыра 570 райхIа йызланхауа цбызшвакIла йгIатарцIатI. А-Конгресс асайт апны агIаншараква рымшгIвыра – гIвыразтынгьи, суратызтынгьи, видеозтынгьи – материал 230 гIалахIатI. Яндекс Метрика йгьи Google Analytics йшгIадырбауала, асквш 2023 агIан адуней акъральква зымгIва йрыуата уагIата 168000-гIв райхIа апортал йталтI. Апхъала апшта асоциал сетьква Facеbookйгьи Instagram рпны абгъьыцква джьгарта йгIадрысабапитI. Асквш аквтаква йгIашIарышвта ауат Telegram – каналгьи гIарылахIатI, ауи анхара антахьгьыт йызларапшым алкIгIараква амапI.
«Ахабарква майрата, блогер формат йтагылата йахIтитI. Ауи апхьагIвчва рыцIа аргваныта хIрабанардыритI. Ауи апш гIвыща рыцIа йсабапта йыгIбитIта – ауи анархара тшауацIнахIрыхуаштI», – йгIалылкIгIатI хабарргарала ахъвшара аъачIвагIагIв Голандзиа Есма.
ХIызту асквш апортал анхара а-Конгресс уыста йахауа рхабар ласыта апхьагIвчва йшрадзуш йазынархан. Ауи акIвымкIвагьи, АААК асайт апны «АгIвычIвгIвыс дуква» зхьзу ахъвы абаза диаспора йрыуу йгIалхIву агIвычIвгIвысква йгIарыквчважвауа пщбзагIвракI шIыцта йгIаталтI. МагIын ду зму нхарата йхIпхьадзитI Адуней апсуа-абаза конгресс хабарргарала ахъвшара Апсуа-абаза (Абаза) уагIахъа р-Дуней адкIылара (МАААН) йгIацIнащтуаз ажурнал «Абаза» а 19 гIацIщтракI цифра формат йъатанацIаз. Ауат агIацIщтраква апсуа уысагIв, ажвлара-политика уыснкъвгагIв, «Абаза» журнал йаредактор хъадаз, 15 сквша райхIа МАААН (ужвы АААК) йасекретарь хъадаз Аламиа Геннадий йхъатачIв швъаква, АГУ афилология хъвшара апны йгIаныршу АмкIваб Владимир йыхьыз зхъу Апсуа-адыгьа филология аквта йгьи ПIапIаскIьыр Иван йыхьыз зхъу АуагIахъа библиотека рпны йгIахIауын йадхIкIылтI. Ажурнал агIацIщтраква йгIарыншвалыз агIвыраква Адуней апсуа-абаза конгресс асайт «Абаза» журнал» зхьзу ахъвы апны урыпхьа йауаштI.
ЙгIайуа асквшгьи йара ауаса хIуагIа йгIарылхIваз агIвычIвгIвысква йгIарыквчважвауа агIвыраква гIатахIцIалуштI, адуней шабгу йауу апхьагIвчва Абаза уагIахъа рэтнографии ргвбайари йахахIыргIвазалуштI.
«ХIара шIыцраквакIгьи хIгвы йтапI, ауат апхьагIвчва разыгIальаматра йаладырхIушта, хIсайт ауагIа рыцIагьи йыргвапхауата йырчпушта хIайгвгъитI. Ауи ззысхIвауа «Кино», «Музыка», «Апсуа хьызква» хъвква ъагIанхIыршуш, амультимедиа хъвы хабарргарала ахъвшара анхагIвчва йдрыхIазыруа «Йбзу анапIлачпараква» абаркIыра ъалахIуш акIвпI», – лхIватI ахъвшара аъачIвагIагIв Хвтаба Алиса.
АЖВЛАРА ХАБАРРГАГАКВА ШХIЫКВЧВАЖВАЗ
Асквш 2023 ауацIа АААК йакIвнаршуз ауысква йапшым ажвлара хабарргагаква аргамта йырчпун:
- АГТРК – видео 21;
- «АБАЗА ТВ» – 13 видеокI;
- SPUTNIK – гIвыра 42;
- АНО «АЛАШАРА» – 4 гIвыракI;
- «АПСНЫПРЕСС» – гIвыра 21;
- ХАБАРРГАРАЛИ МЕДИА АБАДЫРРАЛИ АГУ АХЪВШАРА – гIвыракI.
ИНДЖГИА ДЖЬАМБУЛИ АААКи РПРОЕКТ «ХIуачIвымш йазынхуш атурых тынха»
Джьгарта тшауацIнахитI Адуней апсуа-абаза конгресси Инджгиа Джьамбули рпроект «ХIуачIвымш йазынхуш атурых тынха». Асквш 2023 ацIыхъва йадахIвуата акъральыгIва телебари а-Конгресс абгъьыцкви рпны йхъырхныс йлырхыз афильм 30 йрыуата 13 гIадырбахьатI, ауат мезолит гIамта йгIашIарышвта асквш 1965-дза Апсны атурых йгIаквчважвитI. Зныбыжьла йапшым апшыгIвчва гвыпква апроект бзита йаквчважватI.
«Апроект ззыгIалагIгаз амурад йазынхитI: апсуа бызшвала Апсны атурых ауагIа йрылагара, йгIадзынгылуа абанпара рабашта атурых ашвапхала рпсадгьыл бзи йырбауата йбжьара, аквтанай йгьи йхIаракIу апхьартаква рпны Апсны атурхыла арыпхьагIвчва ашвъаква йгIархъыху фильм формат йтагылата цхърагIага рзыгIаныршара, аквырджьква мцыта йыргIвыз Апсны атурых апшIагылра, анаука адырра шIыцква алажьра, Апсны атурых ачвахъабагаква ауагIа йдырдырра. Апроект архъйара апсуа бызшва агIарысабапрагьи рыцIа йауацIнахитI», – йгIаликIгIитI апроект гIаджвыквызцIаз Инджгиа Джьамбул.
ФильмкI квтанайта 15-17 дакъикъакI йнайитI. Афильм шIыцква асквш 2024 агIангьи йрыдынхалуаштI.
АААК ЙАЛАНАКIУА АПХIВЫСКВА Р-КООРДИНАЦИЯ СОВЕТ ШЫНХАЗ
АААК йаланакIуа апхIвысква р-Координация советгьи «Апсуара» анкъвгарали тшауацIнарыхрали нхара ду акIвнаршитI. Ауи апрограмма апкъ йтата «Апсуара амгIващква» абаркIыра йауата 17 телебарагIатракI асайт йгIаталтI. Ауи акIвымкIвагьи Очамчыра къала апны акъали арайони рапхьартаква рунашвачпагIвчви ажвлара уысхагIвчви ранйара акIвшатI. Ауаъа апхьартаква рпны «Апсуара» арыпхьара ауысла ргвгIанаграква абархIвтI.
СогIвым апынгьи Апсны апны арыпхьара йапщылу ауагIа йрынйатI, апсуа бызшви литератури ргIащаквыжьра йалачважватI. Апсны АйгIайри Ахъахвитри сквш 30 анырхъыцIуаз йадахIвуата айсра йаладзыз айсчва ранчва, айсра йалаз ахIвсса йрынйан «Йбзу асальамшвъаква рыщтала» фильм ддырбатI. ЙашIамсуата Абазашта апны йынхауа апхIвысква рсовет йрыцынхитI.
АААК архъйагIв секретарь Гыцба Инар адиаспора йшрыцынхауа гIайхIватI:
«Асквш 2023 агIан АААК агIвыма къральква рпны йбзазауа апсуа-абаза диаспора рабадырра рыбагъьарала анхара нанардзун. Ауи апшта, АААКи Апсуафеди рацынхарала ашвъа йшгIанахIвауа апшта АААК ЙхIаракIу асовет аунашвачпагIв Эгьзакь Мусса Трыквшта йаъу апсуа культура квтаква р-Федерация аунашвахъцIарта йалакву йырдырныс ахъаз йцIыхъвахауа ахвысквша руацIа адкIылара уыста йархъйаз ахабаргьи, йархъйарныс йдрыбагъьаз ахачIвквагьи рзыйщтитI. А-Конгресс анхагIвчва адиаспораква рыжвлара адкIылараква йъабзазауа акъральква рпны йакIвдыршуз ауысква йрылан», – йхIватI Гыцба Инар.
«Датшагьи йсхIвара стахъыпI ЙхIаракIу асовет аунашвачпагIв йшщаквйыргылыз апшта а-Конгресс Сирия гIарып республики Трыквшти рпны адгьылцIсра мчы зарар зызнахаз ауагIа йшырцхърагIаз. Ауи акIвымкIвагьи а-Конгресс ашта хъвшараква ъагIанхIмыршас акъральква рпны йту адиаспораква хIрабадыруан, ащтаныкъвара хIрыбагъьун. Ауи ауысла Ливан адиаспора хIшрыцынхауа гIалскIгIарын. Йшабгу йгIауахвырквын, апсуа-абаза диаспора рыцынхара йашIамсуа йалахIитI йгьи йбагъьахитI. Асквш 2024 агIан Мусса ХIабальа йпа йхIызйыргылыз ахачIвква хIырхъйауата ауи анхара рыцIагьи йхIрымчуаштI», – йгIацицIатI Гыцба.
АХЧА ПХЬАДЗАРАКВА
Асквш 2023 абюджет йшалу сом 25 200 000 йнадзатI, датшата йухIвушызтын – мзигIадза акврыдзраква сом мильуанкIи бжакIи йнадзун.
Асквш 2018 йгIашIарышвта акврыдзраква сом 115 000 000 йнадзатI, ауат йрыуата сом 105 000 000 АААК ЙхIаракIу асовет аунашвачпагIв Эгьзакь Мусса ХIабальа йпа йалайцIаз ахчапI, асом 10 мильуанкI АААК ЙхIаракIу асовет йалу, Москва апсуа диаспора рунашвачпагIв Агрба Беслан Родион йпа йалайцIатI.
АлачIвара ацIыхъва агвып асквш 2024 агIан рыцIагьи апхъала йнаскIьарныс йшазыхIазыру рхIватI.
швталра йа тшаншвцIара атахъыпI.