КъЧР акъала хъада Черкесск апны ансисквша йакIвшалауа «Абаза» культура-спорт фестиваль йахъвыкIта Абаза уагIа ркультура амши Апсуа баракъ амши акIвшатI.
Абаза уагIа ркультура амши Апсуа баракъ амши дыртлапIатI Къарча-Черкес Республика акъала хъада Черкесск апны июль а 23 атшын. Агвыргъьахъв ансисквша йакIвшалауа «Абаза» культура-спорт фестиваль йахъвыкIта йалтI.
Абаза-апсуа уагIахъа ртшауацIыхра ацхърагIара знархару «Алашара» адкIылари Адуней апсуа-абаза конгресси йадыргалыз агвыргъьахъв Апсны йтыцIын йцатI АААК ЙхIаракIу асовет йалакву – репатриацияла АкъральыгIва комитет аунашвачпагIв Харазиа Вадим, АбИГИ адиректор Ашуба Арда, Апсны Республика АуагIа Райззара адепутат Гьыцба Инар, Трыквшта йауу Адуней апсуа-абаза конгресс Трыквшта апны йгIаныршу ашта хъвшара аунашвахъцIагIв, АААК ЙхIаракIу асовети а-Президиуми йрылу ХIапIатI АхIмад. Апсуа баракъ амш дыртлапIарныс йцатI чкIвыныргIа ргвыпгьи: КъЧР ужвы ари асахIат йаъапI Апсны йауу, «Абаза» культура-спорт фестиваль йалазлуш аспортсменква. Асасчва зымгIва пшвыма гвапата дгIарпылтI КъЧР АуагIа Райззара аунашвачпагIв йтарагылыгIв, АААК ЙхIаракIу асовет аунашвачпагIв Эгьзакь Мусса – агвыргъьахъв сквшигIадза ауи йцрийу Къарча-Черкес апны йакIвшалитI.
Черкесск «АдзыгIвбжьа йачIва» парк апны йадыргалыз айззара ду йалакваз йапшым агIарбартаква йырпшырныс лшара рыман. «АдзыгIвбжьа йачIва» апны ащхъагIвчва рфашаква щардата йубун, йара араъа йаладырчIваз ахIвсса хъылпаква бзи-бзи уырпшыта рчпащагьи ууырдырныс уылшушын. Йапшым анапIылачпараква, абаза фачIвква, асуратчпагIвчва рынхараква, абаза-апсуа уагIахъа ртурых аурала йынкъвыргуз аныпква – аратква зымгIва агьагьара йгIатыхIвачвгIуз абаза уагIа рмакъымква йрыздзыргIвуамца йырпшуан асасчва.
Йапхъахауата арат агIарбартаква збуз ГIаншокъва Фатима рахIа дзыргвыргъьауа чкIвыныргIа ари алалра ъаргвапхауа, агвыргъьахъв чкIвынчва йгьи хIвсыса шIа щардагIв ъагIадгылыз шакIву лхIватI.
«Ари йапшу ауысква ауагIахъаква адыркIылитI, абазаква йырхъазымкIва – Къарча-Черкес йту зымгIва, йалкIгIата чкIвыныргIа. Ауат араъа йабадыритI, ауи амщтахь йащтаныкъвалуштI. ЗымгIвагьи мамыри рахIмати рзыстахъпI. Ачвгьараква хIкъральква хъарата йгIарыкIвшаргIатI», – дхIвахIвтI апхIвыс.
Ахъачваква зынла ахIваспаква ргIарбартала йахъуан. Ауат зчпауа ТхIакIвщын Зураб йыдзхъа уагIа щардагIв азнакIкIуан. ЙзымагIальаматыз зымгIва анапIъаза абаза хIваспаква рчпаща алкIгIараква гIаргвынйыргIвуан.
«Ауат КIавкIаз анахьанат ауагIахъаква рыхIваспаква йрапшызшва йубитI, ауаса йагIвыргауа аъапI. ХIара хIыхIваспатараква райшапI, ахIваспа агIвхъатакIлагьи йтауыргыл ауитI, ауи апш датша заджвгьи йгьйымам. Ауахьауатквала йапшыпI. АхIваспа багъьапI, цIарапI, йшауаш апш йхIрыпшдзитI. АцIасква гьхIрыдзуам, ауагIа хIыргвыргъьитI, рьзазара апны йгIартахъхуш хIваспа рзыхIчпитI. Арат ахъаз рыпшдзагата йгьаъам – йызланхауа хIваспадзапI: рахвы алалуыргарныс, уанмацIауа йгIаурысабапырныс йазычпапI», – йгIахIгвынйыргIвытI ТхIакIвщын Зураб, абаза хIваспа ачпаща зйырдыруа бжьаматата агIгIвы шйымугьи гIахIайхIвтI.
АААК йхIаракIу асовет йалу АбИГИ адиректор Ашуба Арда Черкесск апны Апсуа баракъ амш артлапIара йапхъахауата далан, араъа ауи йаргвану ауагIа дрылата шйылайхIвауа йхIватI.
«Зхъа йахвиту Апсны йахъабрыбыруа абаракъ уахьчIва зымгIва хIаднакIылтI. Ари агвыргъьахъв шауацIыху, Апсны акъральыгIва дамыгъаква магIныта йырзырбауа, гIарбартата йадыргалыз, атакIыгIвдъа йгIахIвгвынгIвуа хIыбызшваква – аратква зымгIва апсуакви абазакви хIшуагIахъакIу йаквшахIатхитI», – йхIватI Ашуба.
Хъвлапны апарк йаъаз ауагIа амфитеатр ауацIа йайззатI: ауаъа КъЧР аршIыйагIвчва гвыпкви ауагIа ансамблькви рконцерт акIвшатI. Апсны ахьыла ауи далан АшвахIвагIв ЦкIуа Альдона.
Апрограмма гIахъитIуата АААК ЙхIаракIу асовет аунашвачпагIв Эгьзакь Мусса Абаза уагIа ркультура амши Апсуа баракъ амши зхъвыкIу «Абаза» культура-спорт фестиваль сынчIва Къарча-Черкес Республика сквшы 100 ъахъыцIуа йшазынарху гIаликIгIатI.
«Афестиваль – йапшым акультураква йрабабартапI, араъа хIара хIуагIа пшдзарата йынкъвыргауа Россия анахьанат ауагIахъакви хIабашталагIвчва ъабзазауа акъралькви йрыцагIвхIшитI. Йапшым акультуракви абызшвакви радкIылара – ауи Россия йабайара дупI, хI-Псадгьылгьи уагIахъипхьадза рхъа рхчара, тшауацIырхра ахъазла йатахъу аъащаква гIаннаршитI. Аурышва уагIахъа ауагIахъаква радкIылра апны гыларта хъада ркIитI, акультураква рабарбайара йацхърагIитI, Россия аштаква зымгIва абазыркIуа къарута йалитI. Багъьата йхъасцIитI афестиваль асасчва зымгIва араъа йрылархIвауа ацзакIыри айщчвари дара ркъральква йрыцыргахта йшрыларыжьуаш. Анчва дшвзыразхатI акультура, аспорт, ацзакIыра ргвыргъьахъв ъахIыцагIвшвшауа», – йхIватI Эгьзакь Мусса.
Ауи йайззакваз йгIаргвалайыршвахтI июль а 23 абаза газет «Абазашта» йапхъахуз аномер ангIаццIыз йшымшугьи.
«ХIара «Абазашта» анхагIвчва гвып хIуагIа рыхъаз магIын ду зму ауыс ъадырхъйауа ахъазла хIырзыразпI. Ауат гвышхвара рылата апхъала йнаскIьаларныс, акъагIара йазцарныс рзыхIтахъпI», – дхIвахIвтI Эгьзакь Мусса.
АуагIахъа уысквала, ажвлара хабарргагаквала йгьи апечатьла КъЧР аминистр Къвмыкъв Альберт йгIачважвара апны «Абаза» фестивальи ауи апкъ йтата йакIвшауа алалракви магIныта йрыму гIаликIгIатI.
«ХIара ари йапшу ауысква Къарча-Черкес апны ауагIахъа азазаъаща тынчква щаквгылра ахъазла магIныта йрыму гIахIгвынгIвитI. Араъа хIреспублика ауагIахъаква зымгIва йрыуу уагIа убитI, ауат абазаква йбайу рцIасква, ркультура, рмацIауыща тшрыхадыргIвазитI. ХIара ауыла хIхъа хIырду йауитI. УагIата агвыргъьахъв йгIалалуа рыцIа-рыцIа йщардагIвхитI, штата йгIацIанакIуа тшауацIнахитI. Кьангьаш гьазгIазгуам апхъахьылагьи ауаса йшаъазлуш. ЙгIалскIгIара, сразыра ажваквагьи рзынасырхара стахъыпI «Алашара» жвлара адкIылари ауи апрезидент Эгьзакь Мусси ари ауыс ъадыргалауа йахъазымкIва абаза уагIахъа ртшауацIыхра, Къарча-Черкес Республика апны йабызшвакIым, йапшым адинква нкъвызгауа ауагIахъаква рабагвынгIвра ахъазла щарда ъарчпауагьи», – йхIватI аминистр.
Агвыргъьахъв пIатIу зкву сасыта далан Санкт-Петербург йауу аистория наукаква рдоктор, Россия анаукаква р-Академия йалу, Петр Ду йыхъыз зхъу антропологии этнографии рмузей адиректор Головнев Андрей.
«ХIара хIырхъвыхыгIвчва зымгIва йрапхъата КIавкIаз ауагIахъаква йгIарыквчважватI, сквшщарда ауат ртурых, рэтнография, ркультура дырхъвыхуан. ХIара, апхьахьаква, ауагIахъаква хIырбжьаматата тшыхIпхьадзитI, ауат хIырзынхитI. Кунсткамера ауагIахъара абайараква ахчитI. ЙуагIахъару – ауагIахъа анадкIылу, рхъа анырхчауа, насып анрыму акIвпI. Ауи магIныта йаму абанамдзауа! ЙзачIвытагьи йджьащахъвайа: рыцхIагIаракI ангIахIыдсылра тшадхIкIылитI, ауаса агвыргъьара апынгьи тшанадхIкIылуа йзычIвытагьи йпшдзайа! УахьчIва хIанйара – гвыргъьарадзапI», – йлахIвараква гIарылайхIватI апхьахьа.
«Абаза» культура-спорт фестиваль КъЧР апны сквшигIадза йакIвшитI. Сквшипхьадза ауи йгIалалуа ауагIа йъауу аштаква рыцIа-рыцIа йайхIахитI, агвыргъьахъв апрограмма рыцIа-рыцIа тшауацIнахитI.
швталра йа тшаншвцIара атахъыпI.