АААКи «Алашара» жвлара адкIылари апсуа-абаза уагIахъа ргвбайара йазынарху апроект шIыц «Амазара» джвыкврыжьтI.

Адуней апсуа-абаза конгресси «Алашара» дуней адкIылари апсуа-абаза уагIахъа ргвбайара йазынарху апроект шIыц «Амазара» (апсуа бызшвала «йазкIкIу байара, абайара ахчарта» гIаныцIитI – аредакция ррытаразга) джвыкврыжьтI. Ауи гIазхъвыцыз АААК ЙхIаракIу асовет аунашвачпагIв Эгьзакь Мусса йакIвпI.

Апроект шIыц хIахIбачва сквшышвпхьадзара йгIанкъвыргата йхIызгIаныржьыз агвбайара апшдзари ацIолари абаза уагIагьи анахьанат ауагIахъаквагьи йрыуу дзачIвызлакIгьи йнарбарныс йаквгIазшIытпI. 

«Амазара» проект йаланакIуата йапхъахауата уыздынхалра атахъу тынхата агIахIвра гIалырхтI. АААК ауысхагIвчва ауыс бзита йыздыруа аъачIвагIагIвчва рыцта апсуа уагIахъа гIахIвыщакI уыжвгIанчIви чпаща артын видеота йхъырхтI. 

Ари агIаджвыквцIара надырдзара ахъазла Апсны апны йбергьльу арежиссерква, авидеографква, агIахIвчва, амакъымршIыйагIвчва тшадыркIылтI.

АгIахIвра аргылра хгIахIвчвагвыпкI гIаланакIтI: уагIахъа гIахIврали ашвахIварали гIатгара зму Апсны Республика АкъральыгIва ансамбль, Тарба Къандид йыхьыз зхъу уагIахъа гIахIврала «КIавкIаз» къральыгIва ансамбль, Бебиа Эдуард йыхьыз зхъу уагIахъа гIахIврала «Шаратын» къральыгIва ансамбль.

Апсуа-абаза уагIа ргвбайара йазынарху Адуней апсуа-абаза конгресс «Алашара» дуней адкIылари рпроект «Амазара» апкъ йтата ауагIа рашваква, ауагIахъа литература, цри бызшва, анапIылачпаракви апхъанчIви цIаскви гIазырбауа ароликква ащтагIайуаштI. Авидеороликква Апсни Къарча-Черкеси рпны йхъырхуаштI.