Афестиваль акъала хъада апны гIванхауата йакIвшитI. Алалра адгалагIвчва йрылапI Адуней апсуа-абаза конгресси Эгьзакь й-Фонди.
Голандзиа Есма
Арат амшква СогIвым ашарабзараква бзи йызбауа ауагIа ъайззауа, акъвынчIынфыгIвкви амакъымкви йшуа август амари ъалалыз шIыпIахатI. Багапщ Сергей йыхьыз зхъу аплощадь йаъу афонтан агьагьара зуыс бзита йыздыруа амацIауыгIвчви амацIаура джвыквызцIагIвацауа ашIакви йалата айшва ду хъыргIватI.
Айладжь, пслачварыдз, жьрыдз, мидия, хынкIьал, хачапур – араъа йгIадгылыз ауагIа рыла йабауата йырмацIауыз фачIв щарда йырпшы йауан. Ауат арызкъква йгIарыцырцIун афонтан адзыла йдрыхьшвашваз ахарбызкви акъраль йагъьу ачагIырчпагIвчва йцIдрычIваз агIвдзи.
Агваран апны уагIа щардагIв гIайззатI – асасчва тгIачвала йгIайуан, араъа асабиква щардагIвын, ауат йыншауа рымаджьащахъвата йапшуан.
«ХIара Самара хIауапI, Гагра апны тшыхIпщитI, афестиваль ахабар гIгIан хIгIайтI. Уыжвжвы йхIгвапхауа фачIвквакI гIахIахвуаштI, ажьы рыцIа хIаквсуашзапI. Ари апш мшы ахарбызгьи ухънахитI, ауи апсуа харбызта гIахIархIвтI – хIампшыкIва йгьауашым», – рхIватI КоротковргIа ртгIачва.
Ашарабзараква ъаддрыфуаз адзхъа джьармыкIьа чкIвынкIгьи адыргалтI, ауаъа Апсны апны йгIадырхарджьуа афачIв цкьаква, согIата зджьакIы йрыт йауаш анапIлачпараква, арыпшдзагаква, адгалчIвква ртиуан. ДзачIвызлакIгьи апсуаква рфачIвкви ргвбайара ахъвыкIи дапшра йахъазымкIва йыцнайахвнысгьи лшара йыман.
Агастрофестиваль йгIанысылттI Апсны а-Президент Гвынба Бадри Россия а-Президент й-УнашвахъцIарта ахъада йапхъахауа йтарагылыгIв Кириенко Сергейи. Ауи амщтахь ауат ргвып СогIвым адзыгъба гIадгылыртала йцан йцIыхъвахауа асквш 30 руацIа йапхъахауата Швача йгIатыцIта ауаъа йгIайыз а-«Комета» йапылтI.
Агастрофестиваль адгалагIвчва мурадта йрымапI ауагIа апсуа фачIвкви араъа йгIадырхарджьуа апкъыгIвакви ддырбарныс, акъала хъада абзазагIвчви асасчви рыхъаз гастроном айззарта гIандыршарныс, апсуа мацIауыгIвчви арестораторкви ръазара ахабар дыргарныс.
«Агастрофестиваль атуристква злагIахъукъьалуаш амальтагьи йалитI. АуагIахъа мацIауыща йазынарху ауагIа ралалраква Апсны ахабар аргара йахъвитI, ауагIа разыгIальаматра ареспублика ахьыла йгIанадырхарныс йацхърагIитI. Ауыгьи атуристква рпхьадзара йаланархIитI», – йгIалылкIгIатI адгалагIвчва йрыуазаджву Уазба Хьыбла.
Алалра адгалра йацхърагIакваз йрыуапI Адуней апсуа-абаза конгресси Эгьзакь й-Фонди.
«Ари сынчIва СогIвым апны гIванхауата йакIвшауа гастрофестивальпI. Ари азын Адуней апсуа-абаза конгресси Эгьзакь й-Фонди ауи йацхърагIаз йрыуапI. ХIара йхIгвапапI ари апш уыс хIалазларныс, йауа ухIварыквын ауи хIгвбайара ауагIа йрылагIгарныс, хIмацIауыща зымгIва йдхIырбарныс лшара гIахIнатитI. Кьангьаш гьазгIазгуам ари йапшу ауысква цIаста йщаквгылта йшакIвшалуш», – йхIватI СогIвым йаъу АААК ауысхарта унашва ахъызцIауа Реквава Темур.
Амакъым кьахвква, щардагIвы рыхъаз шIыцрата йалыз афачIвква, йайззаз ауагIа рлактаква зрылашаруз агвыргъьара – аратква зымгIва алалра гвыргъьахъвдзата йуылаухIвауата йырчпатI. Амш алдыргауата араъа «Таврида» арт-кластер акъала хъада согIата йазначпаз, агвыргъьахъвгьи агьагьарагьи зрыпшдзаз амза зигIвакви амакъыми зцIу амшын фонтан гIахъыртIытI.
Агастроном фестиваль СогIвым апны август а 8-дза йынхуштI.
швталра йа тшаншвцIара атахъыпI.