АААК ЙхIаракIу асовет йалакву Астомбыль апны йанйан а-Конгресс анхара агIарбараква йрыквчважватI йгьи асквш 2019 ацIыхъвадза анхара рыцIа йхъаду анархартаква гIадрыбергьыльтI.
Барганджиа Саид
Адуней апсуа-абаза конгресс ЙхIаракIу асовет йалакву Астомбыль анйара апны йагIвсыз асквш АААК анхара агIарбара хъадаква йрыквчважватI: акция «Агвы апхара» шакIвшаз, асквш 2019 агIан Трыквшта апны Апсны акъральыгIва баракъ амш шдыртлапIуш, Трыквшта апсыуа-абаза диаспора ргIащтийыгIвчва ансисквша йакIвшауа Абаза уагIа рспорт хъвмарраква йшрылалуаш.
Апсны йгьи Къарча-Черкес рпны зхъахIара мачIу атгIачваква рцхърагIара йазынархаз йгьи Трыкв апсыуа-абаза диаспора злата йакIвшуз агвчIагIвчпара акция «Агвы апхара» агIарбараква дрыквчважвауата АААК ЙхIаракIу асовет йалу Ведат Мекер ауи апхьадзараква гIайхIватI. Асквш 2018 адзын йгIашIарышвта асквш 2019 мартI мыздза йадыркIылтI йгьи адукви асабикви рыхъазла гъын чгIвыча пкъыгIвата 6000 райхIа гIарщтитI: акурткаква, акIвохвта пхаква, ахъызаква, ащапIхъацIаква, ауасамцара.
«АААК ЙхIаракIу асовет аунашвачпагIв Эгьзакь Мусса, АААК ЙхIаракIу асовет йалу Агрба Беслан, датшагьи Трыквшта апны апсыуа диаспора рмеценатква йъацыркIыз абзирала ари агвчIагIвчпара акция йауацIыхта абзазара йалалтI. АААК ауысхагIвчва рджьгарра нхара абзирала ауи (акция – аредакция ррытаразга) дахIврала йалхIыргатI. Ари йапшу акцияква апхъахьыла цIас пшдзата йшщаквгылуаш багъьата йазхъасцIитI», – йхIватI Мекер.
Анйара ахъвыкI Трыквшта апны Апсны акъральыгIва баракъ амш артлапIара йазынархан. СынчIва ари агвыргъьахъв ацадыргалуаштI АААК, Апсуафед (Трыкв Республика апсыуа культура квтаква рфедерация – аредакция ррытаразга) йгьи «Алашара» адкIылара. АААК ЙхIаракIу асовет йалакву шгвыгъауала, абараса йацахъуа йынхузтын агвыргъьахъв анадзарала йхIаракIыта йырзадгалуаштI.
«Сшхъвыцуала, ари агвыргъьахъв апхъала ацкIыс рыцIа йнардзата, рыцIа йбайата йакIвшуштI. Аджьащахъвараква, ачIащыгIвараква, ашIыцраква шщардазлуш кьангьаш гьазгIагIгуам», – йгIаликIгIатI Мекер.
Ауи йшихIвазла, Трыквшта апны Апсны акъральыгIва баракъ амш адгалра ауысква йрыдынхалхуаш АААК ЙхIаракIу асовет йалу Эрджан Башнух йакIвпI.
Анйара апны а-Конгресс ЙхIаракIу асовет йалакву ауатыкв йгIатарцIатI асквш 2019 агIан Къарча-Черкес апны йакIвшауа Абаза уагIа рхъвмарраква Трыквшта апсыуа-абаза диаспора ащтийыгIвчвагьи ралалра ауыс. АААК ЙхIаракIу асовет йалу Ахмет Хапат йшгIаликIгIазла, Трыквшта ащтийыгIвчва йапхъахауата ахъвмарраква йрылалуаштI, уахьчIвала ауи йазынарху атшазрыхIазырра уысква йрыдынхалитI. Хапат йшгIацицIахызла, ахъвмарраква ралалра амагIны швабыж йдупI, йшпакIву ухIварыквын йапшым акъральква йыртабзазауа апсыуакви абазакви датша зджьара йапшымкIва араъа аргваныта йабадырныс рылшитI.
«Арат аспорт хъвмарраква сквшышвкIи бжакIи цIуата агIвымакъраль штаква йыртабзазауа хIабашталагIвчва адыркIылитI. ЧкIвынргIа абадыритI, йагIвзачвахитI. Ауи ахIатырла хIпахь хачIв дута йгылапI ахъвмарраква йгIарылалуа рпхьадзара йрылахIырхIарныс, ауат рабабара рыцIа йшауыразлушла, рыцIа щарда йшацызлушла амальква нахIахвырныс», – йхIватI Ахмет Хапат.
Анйара апны йалачважватI АААК йалу ауагIа рпхьадзара йалахIарныс ахъазла хъвдаквыщт зму амальта йнахвчIву.
«ХIара йхIгвыгъапI Трыквшта апсыуа-абаза диаспора йгIацIанакIуа ауагIа а-Конгресс аидеякви ахачIвкви рыцIа аргваныта йрыхахIыргIвазарныс ахъазла презентация адыгIгалырныс. Апхъапхъа апсыуа культура квтаква ъанхауа ашIыпIаква рпны презентация акIвхIыршуштI. Ауи йаццауата ауаъа йгIанхIыршуштI АААК ашIыпIа хъвшараква», – йхIватI Хапат.
Ауи йшгIацицIахызла, а-Конгресс уагIа шIыц ргIадкIылра ауыс апны амагIны дупI АААК ахабарргарта портал (www.abaza.org) анхара.
АААК ЙхIаракIу асовет йгьи а-Конгресс йалакву ранйараква йапымшвтуата йакIвшалитI. Ауи апшта, апхъала, асквш 2018 сентябрь а 29 атшын Согъвым апны айшва гьажьы акIвшатI. Ауаъа АААК анхара шакIвшауа, ауи атлахан агIарбараква шаъаз йрыквчважватI.
швталра йа тшаншвцIара атахъыпI.