Адуней апсуа-абаза конгресс ЙхIаракIу асовет аунашвачпагIв Эгьзакь Мусса онлайн амальла АААК ЙхIаракIу асовет йалакву драбабатI. АлачIвара апны йтыцIуа асквш агIарбараква йрылапштI, асквш 2024 ахачIвквагьи йрыквчважватI.
Адуней апсуа-абаза конгресс ЙхIаракIу асовет алачIвара видео амальла йакIвшатI. Анйара йалан Апсны ахьыла АААК ЙхIаракIу асовет йалу Чрыгъба Вячеслав, Инджгия Джьамбул, Къарча-Черкес ахьыла йалу Мыква Мурат, Аубакь МухIадин, Къванча Умар, Трыквшта ахьыла йалу Гечба Мурат, Инапщба МхIамат, Эшба Шамиль. АлачIвара йгIалалтI Москва ахьыла АААК ЙхIаракIу асовет йалу Кобахиа Беслани Ставрополь шта йбзазауа абазаква руагIахъа-культура автономия аунашвачпагIв Чагва Армиди.
Анйара гIахъитIытI Эгьзакь Мусса: аунашвачпагIв йайззаз зымгIва сальам райхтI, АААКи «Алашари» ргвыпква уыста йырхаз ахъаз дшырзыразу йхIван алачIвара джвыквйыжьтI. Йрылапшныс хуыскI гIащтIырхтI: хIызту асквш апны АААК анхара, асквш 2024 ахачIвква, йхпахауата йапшым ауысква аларцIатI. АлачIвара акIвйыршун АААК архъйагIв секретарь Гыцба Инар.
А-Конгресс шынхаз гIайхIватI СогIвым апны АААК ауысхарта аунашвахъцIагIв Реквава Темур. ЙтыцIуа асквш аэтнокультура ацзакIыра рыбагъьара, Абаза уагIахъа рцри бызшва, рцIасква, рхабзаква хчара йазынархаз проект жвабапхьадзара хъйара анрау сквшхатI.
«Асквш 2023 ахачIвы йахънахIырхIватI – хIгвып йапшым апроектквала уыс 102 акIвхIыршатI, ауат йгIарыларкIтI Апсны акыт 50 райхIа, уагIата хвынызкьыгIв раъара. Апроектква йапшым анархараква гIарыцIаркIтI: атурых, культура, спорт, згIвадарахчара, цри бызшва ахчара, ацIайква бжьара йгьи йырзырхIара, аштаква раъаща агъьчIвра, апсабари экологии рызсакъра», – йхIватI Реквава Темур.
Реквава йгIаликIгIатI йтыцIуа асквш ауацIа хабарргарала ахъвшара гIвыра 3500 райхIа цбызшвакIла йшгIатарцIаз, асоциал сетква рпны ацIагIвгIвчва рпхьадзара 24800 йшахънацаз.
АААК ЙхIаракIу асовет аунашвачпагIв йаппарат унашва ахъызцIауа Таниа Кан Адуней апсуа-абаза конгресс акврыдзраква гIайхIватI.
«А-Конгресс йахауа ауысква мзигIадза сом мильуанкIи бжакIи рыквнарыдзитI. ХIъадзанхауа ахвысквша руацIа ахча гIалцIыртата йгIахIрысабапысз Эгьзакь Мусса йгIалайцIаз асом мильуан 115 райхIа ракIвпI. СквшигIадзагьи хIхачIвква, хIпроектква, хIынхагIвчва рпхьадзара йалахIитI, ауи йаццауата йрылахIитI акврыдзраквагьи. Ауи йгIалцIла хIапхъа датшагьи ахча гIалцIырта шгIахIауаш хIащтапI», – йгIаликIгIатI ауи.
Таниа Къарча-Черкес апны «Алашара» агвып нхарата йакIвдыршазгьи даквчважватI:
«ХIызту асквш хачIвыта йгылаз ауыс 90 ртарала 95 рчпатI, ауат уагIата зкьы 23-гIв райхIа гIарыланакIтI. КъЧР апны анхара ахчата йаквшваз сом мильуан 46 йайхIапI».
ЙтыцIуа аскввш анхара агIарбаракви асквш 2024 ахачIвкви адыркIылын аунашвачпагIв йыртхьатI. ЙгIайуа асквш йапшым анархараквала йдырхъйуш апроектквагьи ауат йгIарыланадыркIуаш ауагIагьи рыцIагьи йщардапI.
«ХIмурадква йрыуапI адуней йаъу апсуа-абаза диаспораква рыцынхара рыцIагьи йауацIыхра йгьи йрыбагъьара. Щарда мцIуата хIара Ливан республика хIаъан, ауаъа шIыпIа хъвшара шгIанхIыршуш, хIалата апроектква шлыхIхуаш хIалачважватI. ХIынхара асабапра йшалахIырхIуш, уыста йхIхауагьи рыцIагьи йшхIрыщардуш хIащтапI», – йгIаликIгIатI АААК архъйагIв секретарь Гыцба Инар.
СынчIва Трыквшта апны апсуа культура квтаква р-Федерация аунашвачпагIв йызкьазууыз йалхра акIвшатI. Эгьзакь Мусса йшрыхъвдаквицIаз апшта ауи апхъала Апсуафед йаунашвачпагIвыз а-Конгресси «Алашари» рынхара шалу, уыста йырхаз йгьи йырхарныс йлырхызла хабар рзырщтитI, йалата апроектква ацдырхъйарныс йаквгIазшIырттI. Атрышба Левент даналырх амщтахь ауи аинформация гIадыршIыцын аунашвачпагIв шIыц йзырщтитI. Эгьзакь Мусса йгIаликIгIатI Трыквшта апны апсуа-абаза диаспора рыцIа аргваныта урыцынхарныс йшагIу.
«ХIара Трыквшта апны джьгарта йынхуш гвып агIаныршара хIащтапI – ауаъагьи Апсни КъЧР абаза кыткви рпны апшта анхара щаквхIыргылра ахъазла. Йалныс ауыпI Трыквшта апны рыцIа уыс щарда гIалагIгарнысгьи, йауа ухIварыквын, ауаъа хIдиаспора рылшараква гIвына гьрымам», – йгIаликIгIатI АААК ЙхIаракIу асовет аунашвачпагIв.
Анйара апны йызлачважваз адикIылхуата Эгьзакь Мусса ужвыгьи зны адкIылара хачIв хъадата йаргылуа дацIачIвагъватI – Абаза уагIахъа рэтнокультура ацзакIыра гIащаквыргылхра, ауагIахъа лкIгIараква гIахчара, агIвыма къральква рпны йбзазауа хIуагIа рыжвла ъану р-Псадгьыл йшызгIайхуаш апшта аъащаква гIаныршара.
«ХIара хIгвы зырчIвауа алалра пшдзаква радгалрагIваца гьакIвым хIыззынхауа – хIыбызшва, хIгвбайра, хIтурых гIазхчуш апрограммаква лыхIхитI, ауыла хIуагIахъа гIахIхчитI. Ауат апрограммаква дзачIвызлакIгьи йща йалазара атахъу хIцIасква, хIымч, йхIаргвану агIвычIвгIвыс йызхIыму абзибара ргIахчара йахъвитI», – йхIватI ауи.
Анйара алйыргауата АААК ЙхIаракIу асовет аунашвачпагIв зымгIвагьи йгIаталуа Асквш ШIыцла драйхIвахIвтI, рзгIвадара шбагъьазлуш, хачIвыта йлырхыз зымгIва шдырхъйуш дрызхIвахIвтI.
Адуней апсуа-абаза конгресс асквш 2023 агIан йшынхаз рыцIа йауацIыхта АААК хабарргарала ахъвшара йгIатанацIуш агIвыраква рпны швзапхьуштI.
швталра йа тшаншвцIара атахъыпI.