АААК апны йгIаныршу Ан-абачва рклуб апны йакIвшуз йызкьазууыз анйара аъачIвагIагIвчва Кобахиа Елени Бгъанба Анетти гIазшIырттI, даргьи аклуб йалакву асабиква йшрызхIауа рархIвтI.
АААК апны йгIаныршу Ан-абачва рклуб акарантин амщтахь анхара джвыквнацIахтI. Июль а 4 атшын ауаъа экспертта йгIадрайгватI Апсны апны йбергьльу аъачIвагIагIвчва Кобахиа Елени Бгъанба Анетти. Анйара апны асабиква рызхIара йаквчважвун.
АААК апны йгIаныршу Ан-абачва рклуб аунашвачпагIв Квициниа Кама йшылхIвазла, ари анйарала аклуб анхара йапхъахуз ахъвы йалгатI: ужвы ауи йалакву апроектква йрылапшуаштIта аклуб анхара йгIвбахауа ахъвы йаналгара ауат рыуа закIы дырхъйуштI.
"Ага хIынхара йапхъахауа ахъвы хIалгата ужвы атеория тшгIакъвыгIгата апрактика хIадгылуашызтынгьи аъачIвагIагIвчвагьи ужвыгьи хIрынйалуштI. [Ауат анйараква алазтын] хIынхара рыцIа йджьащахъвазлуштI асабапгьи рыцIа йдууызлуштI", – йгIалылкIгIатI Квициниа.
ЙцIыхъвахуз анйара атема – асабиква рызхIара – даквгIашIасуата Квициниа Кама ауи "атенгьыз апшта цIыхъва шамам" дацIачIвагъватI. Аклуб аунашвачпагIв йгIацылцIахтI ауи атема абзазара апны тшазыбжьахрагьи шатахъу, "йаргьи аклуб ужвы ауи йазгIайтI".
Асасчва рыуа азаджв – Бгъанба Аннета – Апсны акъральыгIва университет апны арыпхьагIв ахIбата дынхитI, "Логопед" психология-педагогика цхърагIарта квта даунашвачпагIвпI. АъачIвагIагIв Ан-абачва рклуб аунашва шылгIахьаз, дъагIазшIыртыз ахъазгьи дшырзыразу лхIватI.
Аклуб анхара йалакIыта дгIаквчважвауата ауи йгIалылкIгIатI ан-абачва рдырраква йрылархIара гватра ду шазыбачIву.
"Ан-абачва рыдынхалра – йхIмырхъйас нархарапI. Асаби йызхIара апны хнархара хъадакI гIалыркIгIитI:йара асаби, арыпхьагIв йа апхьарта, ан-абачва. Йшцауала, ан-абачва ракIвпI арыпхьара рыцIа йгIалшвтлауа. Ауат йырдырра атахъу анрымдыруа ншалитI. Абарат йрапшу анйараква ан-абачва дырра шIыц рауырныс йырцхърагIитI, араъа ауат хIынхара апны хIзынйалауа агIаншараква рахIхIвитI, разцIгIараква джьауап рыхIтитI", – ауыс шаъу гIахIгвынлыргIвытI Бгъанба.
ЙгIвыджьхуз аъачIвагIагIв – Согъвым АшIара атдзы адиректор Кобахиа Елена – сквшы 20 райхIа асабиква дрыцынхитI. Елена лара лхъаталагьи даныпI, дандупI, лара йшылхIвазлагьи, анйара апны лтгIачва рпны йлырхIаз ашвапха анахьанат йрыцагIвылшарныс акIвпI рахIагьи Ан-абачва рклуб дызгIай.
"УахьчIва сара [асабиква рбжьара апны] йсчпуз азджьакI шIыц-шIыц сырпшыхитI, зджьара сгIващун, йаъан агIвщтраквагьи. УахьчIва сара ауатква "йауаш-йамуаш" – хIва хвы сызрыквцIитI. Йаргьи, ажва аламкIва, сгIариква рсабиква рпны ауатква атагIвсщтхра гьстахъым. АцIай дандухара йымгIангIвычIвгIвысхуш ужвы ари асахIат ахIбачва йырпщылапI. Ауи акIвпIта, сара Ан-абачва рклуб сызгIайыз, йсылшузтын, зджьакIы агIващагIараква йырчвысхчарныс, йамуата йсчпаз расхIвырныс, йрымагIальаматхушшва йызбауа зджьакI дсырдырырныс акIвпI", – лхIватI Кобахиа Елена.
Ателебара апны агIатраква акIвзыршауа ажурналист Шамба Алиса, лынхара мшы ага йаквыргъвгъвазтынгьи, Ан-абачва рклуб апны анйараква амаль лымата йгьагIвылщтуам.
"Асабиква рызхIара ауыс сара йанакIвызлакIгьи йсымагIальаматын. ХIара гIаншара щарда хIрыквчважватI, зынзамыза ауат йрылаз са сакIвшвагьи йызбун. Йхъаду ачIвыйа? ХIара йалыргу бжьагажва гIгIатI. Йаргьи ужвы сара тшазыздыритI хIпны санцахра асабиква сшырзаъу, штшырзысчпаквауа шспсахуаш – ссабиква сырцхърагIара ахъаз. Тамамта сырцхърагIара ахъаз", – йаллыргатI лажва Шамба Алиса.
Ан-абачва рклуб Адуней апсуа-абаза конгресс а-Дискуссия клуб апны йазалху проекта ноябрь а 30 анхара джвыквнацIатI. Аклуб гIари дызму дзачIвызлакIгьи далал йауитI. АдгалагIвчва йшырхIвуала, ауи ахъазла йатахъу закIзаджвыкIпI – «азыгIальаматри гвышхвари». Аклуб апны апсихологква, апедиатрква, асабиква рбжьара йапшым анархараквала аъачIвагIагIвчва йрынйалитI.
швталра йа тшаншвцIара атахъыпI.