Апсны апны Эгьзакь Мусса йкубок ахъазла хвитта абакIрала анкъвакъвраквала «Абаза» культура-спорт фестиваль джвыквылтI.
Барганджиа Саид
Гвдауыта апны гвыргъьахъвыта йгIахъыртIытI хвитта абакIрала анкъвакъвраква. Ауат Апсны апны октябрь а 16 йгIашIарышвта а 18-дза хымшкI руацIа йапхъахауата йакIвшуш «Абаза» культура-спорт фестиваль йаджвыквцIагата йалитI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса йкубок ахъазла хвитта абакIрала анкъвакъвраква сынчIва Москва, Санкт-Петербург, Ростов, Краснодар, Калининград, Швача, Къарча-Черкес, Къабард-Балкъар, Лагъь Осетия, ГIвадахь Осетия, Йынгвыщшта, Дагъстан йгьи Апсны акъалаква зымгIва йгIартыцIыз спортсмен 200 азнакIкIытI. Ауат рныбыжьла гIвгвыпкIта, рхIатларалагьи 17 гвыпкIта йшапI.
Анкъвакъвраква ангIахъыртIуаз дгIачважвауата АААК ЙхIаракIу асовет аунашвачпагIв Эгьзакь Мусса ауи адызгалыз зымгIва дшырзыразу йхIватI, аспортсмен шIаквагьи дахIвра шырзитахъула драйхIвахIвтI.
«Хвду ззызбауа адгалагIвчва, йтлапIу аспортсменкви абжьагIвчви! Швабыж йсгвапапI апсуаква радгьыл апны швсрайгварныс. Швара швайщчва шврызгIайтI. Арат анкъвакъвраква швыззычпу зымгIва гIашвырбарныс лшара гIашвыртитI. Аспорти анкъвакъври дзачIвызлакIгьи абзазара апны йгIайыхъвуш хIаль гIайыларцIитI», – тшырзынайырхатI Эгьзакь Мусса йгIадгылыз зымгIва.
Атурнир апны дсасыпI Царгуш Денис, асквш 2012 агIан а-Олимп хъвмарраква рпны джьаз медаль гIатызгата Апсны хвитта абакIрала атурых фырта йалалыз.
«[Арат анкъвакъвраква] мурад хъадата йрыму саби щардагIв ари аспорт квпшыра бзи йырбата тшазырбжьарныс, аурам йгIаквцIта аспорт тшадыркIылырныс акIвпI. Анчва дизыразхатI ари атурнир ъацIасхаз, спортмен щардагIв рыхъаз мгIва джвыквцIага бзита йъалыз збзиру Эгьзакь Мусса. ЧкIвынчва гврыхва щардагIвыпI араъа. Ари атурнир анадзара швабыж йхIаракIыпI», – арат рапш ажвала дырпылтI анкъвакъвраква йрылугьи апшыгIвчвагьи Царгуш.
Йапхъахуз амцIасраква анкъвакъвраква зтшын йджвыквлыз ащымта йакIвшатI. Ауаъа йабакIырныс йахадзакваз дрыуапI Нижневартовск йауу аспортсмен шIа Джьгватан Зауыр. Ауи йамцIасраква рпны дайгIайын ужвы апхъагылара дазабакIуаштI. Зауыр 15 сквша дыртапI, ауат асквшква райхIара абакIра далапI.
«Арат анкъвакъвраква рхабар ауи апхъалагьи йызгIахьан. Срылалырныс ъасылшаз швабыж сайгвыргъьитI. СшайгIайуаш акIвымкIва схъа закIгьи гьтам», – йхIватI ауи.
Зауыр атурнир бжьагIв хъадата йыму йаба Джьгватан Вадим дйыцта дгIайтI. Ауи анкъвакъвраква радгалща бзита даквчважватI, адгалагIвчва зымгIва дшырзыразу йхIватI.
«ХIара хIабазапI, хIгIайырныс лшара анхIау кьангьашракIгьи гIахIыламшвауата хIгIайтI. ХIызгIайыз швапха хIырхIарныс акIвпI. Аспортсмен шIаква рыхъазла ари атурнир джвыквцIага бзипI», – йхIватI Джьгватан Вадим.
Анкъвакъвраква йрылапI Апсны акъалаква зымгIва йгIартыцIта йгIайыз аспортсменква. Гицба Эльдаргьи 15 сквша дыртапI. Йапхъахауата абакIырта льарыбыгIв хвысквша дыртата дыквылтI.
«Сара ари аспорт квпшыра бзи йызбитI. Арат анкъвакъвраква гIвысквшахауата срылапI. СынчIва сгIалахатI, ауаса сгвы гьсрыдзуам. АбакIра ужвыгьи тшазызбжьара, Царгуш Денис сйапшхара стахъыпI», – йхIватI ачкIвын.
Анкъвакъвраква апщаша, октябрь а 17 йалгуштI. ЙгIвбахауа амш йайгIайыз зымгIва рыхьызква гIдыруаштI. АсогIа хъада – Эгьзакь Мусса йкубок – октябрь а 18 Согъвым АмхIаджьырква рдзытшпурам апны аконцерт ду анакIвшауа йтызгаз йрыртуаштI.
швталра йа тшаншвцIара атахъыпI.