АААК ЙхIаракIу асовет аунашвачпагIв Эгьзакь Мусси АААК VIII Айззараду аделегаткви Апсны апны асквш 2021 агIан йгIахъыртIыз «Апсны» этнопарк аэкспонатква йырпшытI.
АААК ЙхIаракIу асовет аунашвачпагIв Эгьзакь Мусса Апсны йсасуа Къарча-Черкеси Ставропольшти рпны йбзазауа апсуа-абаза диаспора ргIащтийыгIвчва йыцта Гвдауыта район йаланакIуа Мгвыдзырхва кыт йаъу «Апсны» этнопарк йаъан.
«Апсны» этнопарк асквш 2021 агIан йгIахъыртIытI, ауи зыпшцIа апны этнография музейгьи апсуаква йдыргыллуз ауыхваракви ъану адкIыларапI. Араъа йгылапI акуаскьа (апсуаква зцIабзазуз атдзы – аредакция ррытаразга), абацкъьа (апсуаква рмацIауырта – аредакция ррытаразга), амхIара (йабагашIыцыз ачкIвыни апхIвыспи гIамтакI йъабзазауа атдзы – аредакция ррытаразга). ЙгIайквауа рыхъаз апсуаква здкIылаз анхараквали ауагIахъа хъвмарщаквали – хрихыцаущтрала, жьийрала, цIыквчпарала – асекцияква нхитI.
ДзачIвызлакIгьи ауатла йзычпауа дапшырныс, тшырзибжьарныс лшара йымапI.
Аэтнопарк апны асасчва йгIарпылтI адиректор Цыжвба Раши апарк йалачпу амузей знапIыцIу Квициниа Илони. Квициниа Эгьзакь Мусси аделегаткви рыхъаз джьащахъвара щарда гIазлыркIгIаз экскурсия акIвлыршатI, апарк ауацIыхрала рмурадквагьи гIалхIватI.
«ХIапхъахьыла апарк апшцIа апны театр хIыргылра хIгвыгъапI. ХIара архитекторкви аэкологкви хIрайкьангьашын – ауат хIмурад апсабара хIамзарархауата йшхIырхъйуш йгIахIцхърагIарныс йхIазырпI», – йгIалылкIгIатI амузей адиректор.
Абаза кытква рпхIвыс советква р-Координация совет аунашвачпагIв ХвытI Ирина «Апсны» этнопарк апны йырбаз лахIварата йгIалыланацIаз хIыцагIвылшауата ауи йапшу адкIылараква ргIаныршара ауагIа ркультура ахчара йшахъвауа гIалылкIгIатI.
«ЙахьчIва йхIзадыргалыз амдара зджьара йгIанымхауата йджьащахъван, щардагьи аднакIылтI. ХIара ауи швабыж йхIгвапхатI. Акомплекс дупI, апкъыгIваква щардапI, ауат зымгIва пшдзата йчпапI», – лхIватI ХвытI Ирина.
Эгьзакь Мусса аэтнопарк гIанзыршакваз йырчпаз ауыс хвду аквицIатI, абаза уагIа рбзазара йауата ауаъа йгIадыргалыз апхъанчIви пкъыгIваквагьи джьайщатI: апхъала йшырдзахуаз апшта йдзаху ачгIвычаква, атшдгалчIвква, арахвчви амшIи уызларыдынхалуа апхъанчIви ъамапсымаква.
«Швара атурых гIащаквшвыргылхитI, ршIыйара швылатагьи ауи ауыс швадгылитI. Араъа йазшвкIкIыз зымгIва хвы рыквуцIара ахъазла мшкIы гьуызхъушым. Схъа счIвыхымкIва сайгвыргъьитI», – йыртшхъватI анхагIвчва Эгьзакь Мусса.
Йанджвыквылхуашыз АААК ЙхIаракIу асовет аунашвачпагIв аэтнопарк согIата апсуа сурачпагIв ДжьапIуа Батал йгIвыз «Апхьарца» асурат риттI. Ауи атшцIыхъва йгIалху абызла бжьы гIазтырщтуа амакъымасга – ауи акIвпI апхьарца-хIва йызпхьауа – знапIыцIу айсыгIв дгIанарбитI. Апарк архъйагIв директор Цыжвба Рашгьи йхъвы гьгIатаймыжьтI – йнапIылачпару апсуа хIваспа Эгьзакь Мусса йыйттI.
АААК ЙхIаракIу асовет аунашвачпагIви а-Конгресс йалаквуи аэтнопарк апны рамдара а-Конгресс сквш 30 ъахъыцIуи декабрь а 7-8 агIан СогIвым апны йакIвшаз АААК VIII Айззарадуи йырзынарху ауысква йрыуан. Айззара йалакваз Апсны апны декабрь а 11-дза программа рызлырхтI. Ауи ансимшгьи йакIвшуш йапшым алалраква алапI. Ажва ахъазла, йара ауи амш, декабрь а 9, АААК ЙхIаракIу асовет аунашвачпагIви Айззараду аделегаткви Эшера апны Апсны Республика йапхъахуз а-Президент Ардзынба Владислав йчвахъабага син хIврапшдза азыщтIарцIатI.
Адуней апсуа-абаза конгресс VIII Айззараду ахабар дыргауата йацынхитI: Апсны акъральыгIва телерадиуакомпания (АГТРК), «Абаза-ТВ» телеканал, Sputnik Апсны хабарргарта агентства.
швталра йа тшаншвцIара атахъыпI.