АААК VIII Айззараду гвыргъьахъвыта йгIахъыртIытI Апсуа драма театр апны.
Адуней апсуа-абаза конгресс VIII Айззараду гIахъыртIытI Апсны акъала хъада СогIвым апны ахаша, декабрь а 7. Агвыргъьахъв айззара Апсуа къральыгIва драмтеатр апны йадыргалтI, йара ауаъа йакIвшуштI айззараду анхара шабгугьи.
АгIахътIра йазынархаз айззара ахъа Адуней апсуа-абаза конгресс асквш 30 йазынарху афильм гIадырбатI. Ауи йалан архив кадрква, абаза уагIа йапхъахуз р-Айззараду аделегатква ргIачважвараква. ЙгIачважватI афильм апны АААК анхагIвчвагьи – ауат а-Конгресс хвысквша руацIа йшынхаз гIархIватI, йдырхъйаз апроекткви агIаджвыквцIаракви йрыквчважватI. VIII Айззараду аделегатква аэкранла тшгIарзынадырхатI Апсны ажвлара-политика уысхагIвчва, ауат а-Конгресс анхара хвду аквырцIатI.
Айззара анхара Апсны Республика а-Президент Бжаниа Аслан йгIачважварала йгIахъыртIытI. Ауи а-Конгресс сквш 30 ъахъыцIыз ахъазла ЙхIаракIу асовет аунашвачпагIв, ауи йалакву, апсуа-абаза диаспора йрыуу йгьи антахьгьыт асасчва тшырзынайырхатI. Бжаниа йгIаликIгIатI асквшква 1992-1993 рагIан Апсны ауагIа р-Абашта айсра анакIвшуз а-Конгресс уыс ду шархъйаз. Йара ауи апшта хвду аквицIатI а-Президент а-Конгресс абаза уагIа ргвбайара тынха, рыбызшва гIащаквыжьрала, адуней шабгу апны апсуа-абаза диаспора адкIылрала нхарата йакIвнаршауа.
«Асквшква 1992-1993 рагIан Апсны ауагIа р-Абашта айсра анакIвшуз а-Конгресс йалшатI абаза уагIа р-Псадгьыл рхчара ахъазла йаднакIылырныс. Айсра амщтахьгьи АААК Апсны Республика йазхIара ахъазла анхара гьашIанамрыстI: а-Конгресс абзирала Россия, Трыквшта, Европа, Иордания, датшагьи акъральква рпны Апсны ахъазла магIын ду змаз ауысква йъарыквчважвуз анйараква радгалра лшарахатI. А-Конгресс абаза уагIа йрыуата адуней йыкву йыртыдзхатI. КIьыдата йгIалскIгIара стахъыпI АААК агIаныршара гIаджвыквызцIата Апсны ауагIа зымгIва рпахь гIатгара ду зму агIвычIвгIвысква: Шамба Тарас, Аргвын Юрий, Аламиа Геннадий, Чачхалиа Денис, Ардзынба Джьамльадин, Кварцехелиа Бедиза, КIвадза Елхан, ПIаз Сергей», – йгIаликIгIатI Бжаниа.
Апсны р-Президент АААК агвып адахIвракви акъагIари рымазларныс дрызхIвахIвтI.
АААК ЙхIаракIу асовет аунашвачпагIв Эгьзакь Мусса йажва джвыквицIауата йайззаз зымгIва тшырзынайырхатI дакъикъакIла йашIаста закIгьи рымхIвауа адуней зхIваджьыз анбжьагIвчва – пIату зквыз АААК апрезидент Шамба Тараси Трыквшта йаъу Кайалар кыт апны АААК ашIыпIа хъвшара йаунашвачпагIвыз Атиле (Атейба) Эрденчи – рхъмаштылра хвы аквырцIарныс.
Эгьзакь Мусса Апсны р-Президент йхIвахIвраква рыхъазла йразыра ажваква йзынайырхатI, Адуней апсуа-абаза конгресс йархъйаз апроекткви апхъахьыла йаргылуа ахачIвкви гIайхIватI.
«ХIара адуней шабгу апны йбзазауа апсуакви абазакви рыжвла ъану рпсадгьыл апны йыншауа ахабарква йшгIаргвынгIвуаш апшта цбызшвакIла йырзынахIырдзарныс, руагIахъа ртурыхи рцIаскваи ддырдырырныс, дара абадырырныс, йхъадахугьи – а-Конгресс агвып АААК ахъвшараква ъанхауа ашIыпIаква рпны йдырхъйауа апроектква йгIарылалырныс лшарата йхIчпатI. ХIара йхIгвыгъапI хIуысхартаква адуней апны хIабашталагIвчва ъабзазауа шIыпIипхьадза апны йгIахъхIтIырныс. Абарауаса хIара Апсни абаза уагIа ъабзазауа акъралькви злащтаныкъвауа акультура, арыпхьара, спорт цхIаква апхъахьылагьи йхIрыбагъьалуштI», – йхIватI Эгьзакь Мусса.
АААК ЙхIаракIу асовет аунашвачпагIв йгIаликIгIатI абаза уагIа ргвбайари рцIаскви анырхчауа адуней шдырбайауа, агIвычIвгIвара шабгу ртшауацIыхрагьи ркъару шаларцIауа.
«Ага хIызту агIамта хIцри бызшви хIкультури рпахь прагыла щарда гIаннаршарыгьи, хIара багъьата хIызквгылыз амгIвала хIцитI, зымгIвагьи гIахIыцылта ауагIахъа цIаскви акультури щатата йыззалуаш адуней гIанхIыршарныс йаквгIазшIыхIтитI», – йхIватI йажва далгауата Эгьзакь Мусса.
АААК йаланакIуа апхIвысква р-Координация совет аунашвачпагIв Бебиа Екатерина асквш 2022 сентябрь агIан йгIандыршата лара унашва зхъылцIауа «АнгIалра йазцауа амгIва» зхьзу Апсны апхIвысква р-Координация совет анхара агIарбараква Айззараду аделегатква йралхIвтI. Бебиа а-Совет йапхъахауата йакIвнаршаз ауыс – «Апсны анчваква амамыри азахвари йрызгылапI» жвлара мгIвайсра ауысхагIвчва рынйара даквгIашIастI, чкIвыныргIа рпсадгьыл бзи йырбауа йгIадзныргылра, айсра йаладзыз айсчва рхъмаштылра хчара ахъазла ауи анйара магIныта йаму даквчважватI. Ауи акIвымкIвагьи Бебиа йгIалылкIгIатI «Аиуара иашьатоу еибабароуп» (апсуа бызшвала – «Айгвара йащату абабарапI» – аредакция ррытаразга) форум дахIврала йшакIвшаз, ауи алдыргауата а-Координация совет аунашвачпагIви Ставрополь шта апны йынхауа «Абаза» жвлара адкIылара аунашвачпагIв Чагва Армиди аршIыйара проектква ацлыхра йгьи йацырхъйарала АнгIалра мачвы шацIарцIаз.
«АпхъанчIви заманква рпны угIалагата апсуа-абаза жвлара рпны апхIвыс гыларта кIьыда лзалхын: ауи Анчвата дырбун, лажва гвыбзыгъаква йрыздзыргIвуан. УахьчIвагьи апхIвыс лмагIны зджьара йгIанымхауата йдупI. Ауи йгIалцIла АААК ЙхIаракIу асовет аунашвачпагIв Эгьзакь Мусса абаза уагIа рыхIвссаква адикIылырныс йхъа йгIанагтI. Ауи йазынхарныс а-Координация совет гIандыршатI. Асовет анхара джвыквнацIищтара щарда мцIрыгьи хIара змагIны дуу уысквакI адыгIгалныс хIахадзахьатI», – лхIват Бебиа Екатерина.
А-Конгресс анхара агIарбараква презентацията йгIайырбатI АААК аппарат аунашвахъцIагIв Таниа Кан. Ауи йгIаликIгIатI а-Конгресс хвысквша руацIа Апсны арайонква рпны проект 107 шархъйаз.
«АшIыпIа хъвшараква рынхара жвасквша цIуата КъЧР абаза кытква рпны дахIвра змата йынхауа «Алашара» (Эгьзакь Мусса дызхъадзгылу Абаза-апсуа уагIахъа ртшауацIыхра ацхърагIара знархару «Алашара» Дуней адкIылара – аредакция ррытаразга) аджыпха йтагылапI. АуагIахъа гIахчара йгьи тшауацIдрыхра, акъральгIв жвлара рыбагъьарала ахачIвква рырхъйара йаквыргIапсу ауи аджыпха йащатапI кытипхьадза апны йгIандыршауа ашIыпIа хъвшараква – хIа ауат «ажвлара советква»-хIва хIрыпхьитI. Асоветква йрылалитI згвы цхIауа, бзиракI зчпара зтахъу акытква рбзазагIвчва. А-Конгресси акытква рбзазагIвчви йаларпата йацынхауамцара акытква ртшауацIыхрала апрограммаква лырхитIта йдырхъйахитI. Апхъахьыла ауат апрограмма кIьыдаквала апхъапхъа арайонква ртшауацIыхрала апрограммаква, уацIыхъван – акъраль шабгу ахъазла цкIы-цкIы йалыргу программа лыхIхуаштI», – йхIватI Таниа.
Айззара апны дгIачважватI Абаза уагIа рахIбачва рсовет аунашвачпагIв Аубакь МухIадингьи. Ауи хIабашталагIвчва абардырра, ащтаныкъвара гIарбжьаршвара ауыс апны а-Конгресс уыста йахауа гIаликIгIатI.
«ХIара хIуагIа айгвыргъьитI, рхъагьи аладухитI Апсны акъральыгIвара ъагIащаквгылхуа. Абазаква Апсны атшауацIыхра ркъару аларцIарныс йхIазырпI. ХIара йанакIвызлакIгьи хIшвыцызлуштI, швгвасрагьи швгвыргъьарагьи швыцагIвхIшуштI», – йалйыргатI Айззараду аделегаткви асасчви йырзынархаз йажва Аубакь МухIадин.
Москва апсуа диаспора (МАД) аунашвачпагIв Агрба Беслан АААК хвысквшала йархъйаз апроектква хвду рыквицIатI.
«А-Конгресс анхара апхъахьыла акъральыгIва политика ахъазла цхърагIара мчыта йалныс ауаштI. СшвайхIвахIвитI зымгIвагьи а-Конгресс гIаншищтара йцIуа асквш 30-ла, сабап злу, дахIвра зму ауи апроектквала», – йхIватI МАД ахъада.
АААК сквш 30 ъахъыцIуа ахъазла йхIвахIвуата, а-Конгресс агвыпгьи дахIвра рымазларныс йрызхIвахIвуата датшагьи йгIачважватI Голландия апсуа-абаза диаспора ргIащтийыгIв Тарба Уазкъан, Европа АдкIылара акъральква рахьыла АААК ЙхIаракIу асовет йалу ХIаджьымба Эркан, Трыквшта апсуа культура квтаква р-Федерация аунашвачпагIв Махариа Мурат.
VIII Айззараду агIахътIра йазынархаз агвыргъьахъв алачIвара амщтахь аделегатква ашвахIвагIв Таниа Тимур йыздзыргIвытI, КIвакIваскьыр Тимур йыргылыз атеатр-гIахIвра ргылчIвгьи йапшытI. Аларпшра йалан апсуа гIахIвчва гвыпкви Къарча-Черкес Республика акъральыгIва филармония гIахIврала атеатр «Меркурий» агIахIвчви. АргылчIв щатата йазалтI абаза уагIа ртурыхи ауат рацзакIыри.
АААК VIII Айззара дуи Адуней апсуа-абаза конгресс гIаншищтара сквш 30 ъацIуа артлапIари йырзынарху алалраква йрыуан декабрь а 7 хъвлапны Апсуа драма театр апны арежиссер Апса Аслан йхъихыз афильм «ХгIвайщчва» агIарбарагьи.
Адуней апсуа-абаза конгресс VIII Айззараду анхара уысква йырзынарху алачIвара декабрь а 8 йакIвшуштI. Апрограмма шлырхызла, ауи атшын АААК ЙхIаракIу асовет аунашвачпагIв далырхуаштI, пленар алачIвари хсекциякI рпны ауатыкв айчважваракви акIвшуштI.
Адуней апсуа-абаза конгресс VIII Айззараду ахабар дыргауата йацынхитI: Апсны акъральыгIва телерадиуакомпания (АГТРК), «Абаза-ТВ» телеканал, Sputnik Апсны хабарргарта агентства.
швталра йа тшаншвцIара атахъыпI.