АААК ЙхIаракIу асовет аунашвачпагIв Эгьзакь Мусса йгьи Къарча-Черкес аделегация АГУ апрофессор-арыпхьагIвчва гвыпи апхьагIвчви йрынйатI.
Адуней апсуа-абаза конгресс асквш 30 артлапIара йазынарху ауысква йрыуата йакIвшатI АААК ЙхIаракIу асовет аунашвачпагIв Эгьзакь Мусси Къарча-Черкес аделегации Апсны акъральыгIва университет (АГУ) апрофессор-арыпхьагIвчва гвыпи апхьагIвчви ранйара.
КъЧР йауу аделегация йалан «Алашара» жвлара адкIылара Черкесск апны йгIаныршу ахъвшара аунашвахъцIагIв Мыква Мурат, «Алашара» анхагIвы Гвана Арина, «Абазашта» газет аредактор хъада Къвыл Фардауыс, Къарча-Черкесс йауу ажвлара уыснкъвгагIв Чагва Армида йгьи абаза кытква рпхIвыс советква руысхагIв Джьмакъвыл Нателла.
Асасчва йырпылыз АГУ аректор Гварамиа Алеко АААК асквш 30-ла дазхIвахIвтI, а-Конгресс апхъахьыла тшауацIыхра амазларныс шазитахъугьи йхIватI. Ауи а-Конгресс аунашвачпагIвчви Къарча-Черкес йгIатыцIыз асасчви АГУ апны йъайбауа дшайгвыргъьауа, ари йапшу анйараква апхъахьыла рыцIагьи йщардазлушта дшайгвгъауа гьцIайымкIуазтI.
АхIвахIвраква джьауап ритуата АААК ЙхIаракIу асовет аунашвачпагIв Эгьзакь Мусса АГУ арыпхьагIвчви апхьагIвчви рынйараква йалкIгIу магIны шырзибауа йхIватI.
«Араса йанаквшвазара, саргьи Апсны акъральыгIва университет сквшы 90 ъахъыцIыз снашвайхIвахIвра стахъыпI. АГУ – Апсны ауачIвымш йащатапI. Абаза уагIахъа ртшауацIыхра знапIыцIу йджьгару, згвы цхIауа апхьагIвчви арыпхьагIвчви ракIвпI», – йхIватI Эгьзакь Мусса.
Анйара йапхъахуз ахъвы айкьангьашра-амакIыра квпшыра аман. Уыс хъадата йызлачважвуз цри бызшва гIащаквыжьри тшауацIнарыхри акIвын.
Абызшва ауыс шагвынуыргIвуаш дазхъвыцуата Эгьзакь Мусса абаза уагIа йрыуу зымгIва джьгарта рацынхара амагIны гIаликIгIатI. АААК ЙхIаракIу асовет ахъада апсуа йгьи абаза бызшваква рграмматикала, рлексикала, рфонетикала адырраква рылархIара йазынхуш апроектква лызхуаш йазалху гвып гIандыршарныс ажва гIайгтI.
«Ауи агвып йрылал йауаштI йгвалымсым астудентква, АГУ анхагIвчви Къарча-Черкес йауу ауат ръачIвагIалагIвчви. Агвып абаза уагIа ръадаб-намыс злащаквгылу «Апсуара» ацIасква знызлуш азкIкIра агIвра, апсуаквагьи абазаквагьи йрыквшвуш алфавит алыхра йадынхал йауаштI. Йырхъйа йауаш йгьи йатахъу апроектква щардадзапI», – йгIаликIгIатI Эгьзакь Мусса.
Анйара йгIвбахауа йахъвыта конференция акIвшатI, ауаъа АГУ апрофессор-арыпхьагIвчва гвып рыуагьи, Къарча-Черкес аделегации АААК ЙхIаракIу асовет ауысхагIвчви рыуагьи гIачважватI.
Наука нхарала АГУ апроректор Адлейба Джульетта АААК ЙхIаракIу асовети КъЧР йауу агвыпи тшырзыналырхан зымгIвагьи а-Конгресс аюбилейла драйхIвахIвтI. Ауи абаза уагIа йрыуу зымгIва рабадырра рыбагъьара йазынхауа ауысква – апсуа йгьи абаза чкIвыныргIа рынйараквагьи алата – магIын ду шрыму дацIачIвагъватI.
«Апсуакви абазакви уагIахъакIпI. ЙхIвара атахъыпI хIара йаразджьарала хIнархата хIшпшуа: тшадкIылри тшауацIыхри рахьыла», – йылрытамамтI Адлейба.
Аконференция апны швабыж йджьгарын АГУ астудентква – ауат асасчва азцIгIараква рыртуан, апсуа-абаза диаспора руачIвымш рыла йшгIацIарыжьуа гIархIвун.
Ауниверситет апны АААК ЙхIаракIу асовет аунашвачпагIв Эгьзакь Мусса АААК йаланакIуа апхIвысква р-Координация совет аунашвахъцIагIв Бебиа Екатерина Апсни Абазашти ращтаныкъвара тшауацIнарыхра къарута йалалцIаз ахъазла КъЧР АуагIа Райззара (а-Парламент) аунашвачпагIв Иванов Александр йылквнайыргаз ачIахIра грамота лыйттI.
«Алашара» жвлара адкIылара Черкесск апны йгIаныршу ахъвшара аунашвахъцIагIв Мыква Муратгьи Бебиа Екатерина сабап злу лынхара ахъазла Адуней апсуа-абаза конгресси «Алашара» жвлара адкIылари рыхьызла грамота лыйттI.
Апсны акъральыгIва университет анхагIвчва Къарча-Черкес йгIатыцIыз асасчва согIа рыздрыхIазыртI – апсуа суратчпагIв Дочиа Гарри йгIвыз асуратква.
Анйара аналгуз АААК ЙхIаракIу асовет аунашвачпагIв Эгьзакь Мусса АГУ апрофессор-арыпхьагIвчва гвыпи апхьагIвчви пхата йъагIарпылыз ахъазла йразыра ажваква рзынайырхатI. Ауи йгIаликIгIатI абаза уагIа рапхьахьаква, рстудентква рацынхара магIын ду шаму, йаргьи арыпхьагIвчвагьи ъачIвагIагIвхарныс тшызрыхIазыруа ашIаквагьи абадырраква тшауацIддрыхныс, пышва амырдарныс йаквгIазшIиттI.
АААК ЙхIаракIу асовет аунашвачпагIв Эгьзакь Мусса ари асахIат Апсны даъапI, Адуней апсуа-абаза конгресс VIII Айззара ду йапщылу ауысква дрылапI. Ауат ауысква йрыуапI йапшым акъральыгIва, ажвлара уыснкъвгагIвчва, ауагIа гвыпква рынйараква.
Эгьзакь Мусса ауи апхъалагьи АГУ арыпхьагIвчви апхьагIвчви дрынйахьан. ЙагIвсыз анйара асквш 2019 агIан йакIвшатI. Ауи асхъан АААК ахъада а-Конгресс ахъвдаквцIара хъади анхара анархаракви дрыквчважватI, астудентква разцIгIараква джьауап риттI.
Адуней апсуа-абаза конгресс VIII Айззараду ахабар дыргауата йацынхитI: Апсны акъральыгIва телерадиуакомпания (АГТРК), «Абаза-ТВ» телеканал, Sputnik Апсны хабарргарта агентства.
швталра йа тшаншвцIара атахъыпI.