Йбергьльу аопера ашвахIвагIв ду Герзмава Хибла Адуней апсуа-абаза конгресс йалакву рсатыр йалалырхIатI
Барганджиа Саид
Апсны ауагIа рартист, Россия Федерация ауагIа рартист, йбергьльу ауыжвгIанчIви опера ашвахIвагIв ду Герзмава Хибла Адуней апсуа-абаза конгресс далалтI.
Ауи йшылхIвазла, апсуа-абаза уагIа йрыуу дзачIвызлакIгьи магIны азибауата далазара атахъыпI «ацри бызшва, акультура йгьи ацIасква ргIахчари ртшауацIыхри змураду» адкIылара.
«Сара йшазызбауала, а-Конгресс йанархара хъадапI апсыуа-абаза уагIа радкIылра. ХIкъару адхIкIылпIта адунейла йакIвыгIгашауа хIымгIвайспI хIцIасква йгьи хIкультура рпшдзара. ХIыуа дзачIвызлакIгьи ари зымгIва йацыхIчIву ауыс йгви йпси рылайцIарквын хIуагIахъа байара агIахчарагьи атшауацIнарыхрагьи хIылшуштI», – лхIватI Герзмава.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса Герзмава Хибла а-Конгресс дъалалыз даквчважвауата йшгIаликIгIазла, йджьгару ауи лыршIыйара нхара амагIны швабыж йдудздзапI, лансимш амайчра, йхIаракIдзу лгIарбараква, лгIатгараква йгIадзынгылуа абанпараква рыхъазла уыла йабауа швапха пшдзадзапI.
«Герзмава Хибла – хIуагIа зымгIва рыхъазлагьи йзгIваду дпсыпнкъвгарапI, ауи хIцIас пшдзаква, хIкультура, апсуара збзазара йалата абгата йынкъвызгауа дгIвычIвгIвыс нардзапI. Багъьата йазхъасцIитI ауи лдахIвраква щатата йырзалуа лпсадгьыл, лайщчви лахщчви йрызлыму абзибара ду шакIву, ауи абзибара дамайчуата адуней шабгу йакIвылгашитI», – йхIватI ауи.
Эгьзакь Мусса йшихIвазла, Апсны йапхъахуз апрезидент Ардзынба Владислав зыщата щтIайцIаз а-Конгресс агIаджвыквцIара бзиква Герзмава Хибла йъарыцылкIуа «амайчра дула абаза уагIа ртшауацIыхра знархару ацынхара рыцIагьи уаквнаргвышхвитI йгьи адгылра йгIаннаршауа анасып ду йагIарбагапI».
швталра йа тшаншвцIара атахъыпI.