ХIызту асквш декабрь аквтадза йхIазырхара атахъу Ставропольшта йту абазаква йгIарыквчважвауа абзазара йгIахъыху асуратгIвыра йауата хъвквакI хъырххьатI.
Барганджиа Саид
«Ставропольшта апны абазаква» зхьзу абзазара йгIахъыху фильм хъйара атахъыпI ари асквш ацIыхъвадза. Ауи агIаныршара згIаджвыквцIару Ставрополь край апны йбзазауа абазаква руагIахъа-культура автономия «Абаза» акIвпI. АсуратгIвыра ахъыхра ахчала йацхърагIитI ауагIахъакви акъазакъкви руысквала Ставрополь край акомитет.
«Абаза» жвлара адкIылара аунашвачпагIв, АААК ЙхIаракIу асовет йалу Чагва Армида йшгIахIалхIвызла, акино ауагIа декабрь аквта йддырбарныс йаквдырпшитI: аэпидемия аъащаква гIапхьадзахауата апрезентация онлайн амальла йакIвдыршуштI.
Армида йылхIватI афильм Ставрополь, Нарцана, Невинномысск къалаква, Кочубеевск, Предгорна районква рпны йту абазаква рбзазара йшгIаквчважвуш. УахьчIвала ауаъа абазата 4000-гIв райхIа тапI.
«Афильм ззынарху абазаква шбзазауа, уыста йыздгылу, рхабзакви рцIаскви шынкъвыргауа, рыбызшва шырхчауа, Ставрополь край атшауацIыхра къарута йаларцIауа акIвпI», – йгIашIылпхьадзатI АААК ЙхIаракIу асовет йалу йгьи йгIацылцIахтI «Ставропольшта апны абазаква» фильм «Абазаква ъабзазауа аштаква» зхьзу апроект злалдыргауа йшуысу. Ауи апроектгьи Ставрополь край апны йбзазауа абазаква руагIахъа-культура автономия «Абаза» йархъйитI.
Акино йалалуаш ахъвква Предгорна район йаланакIуа, абаза тгIачва 65 ъабзазауа Подкумок кыт, Ставрополь къала рпны йхъырххьатI. Ужвыгьи Нарцани Невинномысски рпны анхара рпырапI. Афильм гIвбызшвакIла – урышвли абазали йырчпуштI. Ауи йадынхалитI сквшщарда цIуата абизнес ахъазла кIартI йгьи видео хъызхуа B2B-Photo компания.
«Афильм зуыс бзита йыздыруа аъачIвагIагIвчва апщылапI: сценарий згIвуа, режиссер, видеограф, аоператорква, адизайнерква, абытыгIвчва, бжьы ацIазцIауа, анхара адгалагIв. Ауысква рщарда зыхъвда йыкву абзазара йгIахъыху акино зъачIвагIу Жимаев Иван», – лхIватI Чаква Армида.
Жимаев Иван абзазара йгIахъыху йгьи агвацчпа киноква хъызхуа доператорпI, двидеографпI, дрежиссерпI. Ауи согIа щарда гIатигахьатI, ауат йрыуапI Москва апны йакIвшуз акинофестиваль апны йагъьу аператор нхарата йырпхьадзаз «Интервью» гвацчпа кино ахъыхща ахъаз йгIайыртыз асогIагьи. Жимаев жвлара магIны зму йапшым ауысква – наркомания апшIагылра, чкIвыныргIа рквта ачвгьахараква ашIакIра, рзгIвадара ъатIахсу йгIалцIла зылшараква мачIу ауагIи асабикви, асабиква йырзалху «йыззхъауцIа йауаш ателефон» – йырзынарху авидеоквагьи дыррежиссерын.
«Йбзу атурыхква ахъысхырныс, ауагIа срыцынхарныс бзи йызбитIта акIвпI абзазара йгIахъыху апроектква рыцIа тшзырзынасырхауа. Ауи акIвымкIвагьи, сара КIавкIаз сбзазитIта зыбызшвала йапшым гIвзачва щардагIв сымапI, ауагIахъаква рцIаскви ргвбайари сымагIальаматпI. Ауи йгIалцIла абазаква йырзынарху апроект зынла схънахтI, ауи садынхалырныс йангIасыхIвагьи дукI сгьнамкIгIамкIтI – са сыхъаз ауи джьащахъвапI», – ауыс дшалалыз гIахIгвынйыргIвытI акинематографист.
Ауи йхIватI афильм апкъ «уагIахъа щарда йгIарылцIыз аъачIвагIагIвчвала йалу агвып айкьангьашта» йшлырхыз, мшквакI руацIа дасу йхъа йгIанагуаз йхIвауамцара ауи ащата шаъазлушла йшагвынгIвыз.
«Ауаса ахъвыцра хъади ауи анархаракви «Абаза» жвлара адкIылара ъадзанхауа асквшква руацIа уыста йахаз йгIадрыцIстI, ауи агIамта ауацIа ауат хвыц-дууызтынгьи проект щарда дырхъйатI, культура нархарала щардагIвы йрабадырын йрыцынхитI», – йрытамамтI Жимаев Иван.
Псайспамцара йазнакIкIыз анхара «закIыта йадкIылхра атахъхатI» – ауи ахабар абазаква йырхъазымкIва хIыштагьи Россия шабгу апынгьи йбзазауа анахьанат ауагIахъаквагьи
йшырдыруаш апшта. Афильм зчпауа шхъвыцуала, хвы зму ауи аматериал агIвыма къральква рпны йаъу адиаспорагьи рыцIа йрабанардырныс ауаштI.
«ЙухIвушызтын, афильм мурад хъадата йаму ауи акIвпI: Ставропольшта апны абазаква ртурыхи ргIатгаракви йанрыквчважвауа ауат акъраль ажвлара йгьи акультура бзазара «йшалачпу» гIанарбуштI, йапшым аштакви акъралькви рпны йбзазауа абазаква аднакIылуаштI, ращтаныкъвара, рыбызшви ргвбайари рхчара йацхърагIуштI. Ауи акIвпI афильм абаза бызшвалагьи йызхIчпауа – Трыквшта, Германия агьиква рпны йаъу адиаспора рцри бызшва шыргIуш, йыншауа рыцIа йалыргата йшгIаргвынгIвуаш апшта», – йхIватI арежиссер.
Ауаса йанаъугьи, абаза бызшва йара ачкIвын йыхъазла гIвыма бызшвапIта йуыс рыцIа йбаргвхитI.
«АйчважвараквакI ангIаугвнымгIвуа ауат ушрыдынхалуаш гьудырам. Ауи йгIалцIла хIара абызшва здыруа журналист дгIахIрайгван дгIахIцхърагIитI», – анхара алкIгIараквакI хIзыгIахъитIтI Жимаев Иван.
Датшагьи ауыс зрыбаргвуа – уызквчважвуши уыздынхалуаши ъащарду акIвпI: ауи апхъала йазнакIкIызгьи, ужвы йхъырхызгьи агвынуыргIвра ахIатырла заман щарда атахъхуштI.
Афильм ауагIа йанддырбара амщтахь ауи YouTube социал сеть йгIатарцIуштIта зымгIвагьи запшуаштI.
Ставрополь апны «Абаза» культура квта асквш 1997 агIан абазаква ргвыпкI йгIандыршан ашвъа йанырцIатI. УнашвачпагIвта далырхтI Россия Федерация апны гIатгара зму акультура анхагIвы Къвырча Владимир. Ауи дитарагылыгIвхатI Чагва Армида. Заман айшысла ажвлара адкIылара акрай апны уыста йакIвшуз джьгарта йрылалуа йцатI, зуагIа йрызхъвцуа, згвы цхIауа агIвычIвгIвысква аднакIылтI. Асквш 2012 агIан Ставропольгьи КIавкIаз аминерал дзква рышта апынгьи йынхауа акультура квтаква тшадыркIылырныс йангIалтI. Абарауаса Ставрополь край апны йбзазауа абазаква рышта жвлара адкIылара – «Абаза» уагIахъа-культура автономия гIаншатI, ауи Ставропольшта апны йбзазауа абазата 4500-гIв раъара аднакIылитI. Ауи даунашвачпагIвта йацшIакIта Чагва Армида далырхтI.
швталра йа тшаншвцIара атахъыпI.