Адуней апсуа-абаза конгресси адрамтеатри Айкьангьашырта клуб анхара атаджвыквырцIахтI. «Атеатри апшгIви» проект йаланакIуа йапхъахуз анйара Чехов й-«АчIныш» ангIадырба амщтахь йакIвшатI. АпшыгIвчва аргылчIв хвы аквырцIатI, ргвгIанаграква абархIвтI, уыззнархъвыцуа гIалыркIгIатI.
Голандзиа Есма
Ахъвлапын Чехов йпьесаква рахIа йгIарылукIгIуш йрыуазакIу «АчIныш» агIарбарала йалагатI. АпшыгIвчва ауи агIвыра Апсны апны гIатгара зму артистка Аргвын Мадина лыла йгIацIалыжьта йшлыргылыз апшта йырбатI. АргылчIв йалан АгIвдза Тамара, ЦкIуа Михаил, Ажьиба Гвында, Джьыкьырба Майя, Мыквба Хьыбла йгьи агвып йрылу антахьгьыт актерква.
Аспектакль аналга апшыгIвчвагьи актерквагьи алата ауи йаквчважватI. Апещ йыгIвназ йрылан атеатр амагIны бзита йыздыруа ауагIагьи апьеса йапхъахауата йапшызгьи. Айчважвара гIахъылтIытI атеатр адиректор хъада йгьи актриса Мыквба Хьыбла:
«ХIара швгвгIанаграква хIыцагIвшвшарныс хIтахъын. Бжара йа намдзара кIара алата йыжвбазтын – ауат гIахIашвхIвырквын бзи йыгIбун. АпшыгIвчва абараса хIанызрачважвауа анйараква хIара хIыхъаз швабыж магIны рымапI».
АуагIа ргвгIанаграква ангIарархIвуа магIныта йаму гIалылкIгIатI арежиссер Аргвын Мадинагьи:
«Апсны апны атеатр цIбацIбара проблемата йаъапI. Арежиссер ани агIаншара йа ари агIаншара рыцIа данаквсуа зынзамыза апшыгIвчва ауи ушазымпшуа апшта йрылархIвалитI. Сара апхъахьыла сшынхуш здырра ахъазла анаъа-араъа йаласыргылуа акъвышраква апшыгIвчва йшгIаргвынгIвуа збара стахъын. Ауи зымгIва хIыхъазгьи магIны амапI, сара сыхъазгьи – ага щарда сынхахьазтынгьи – ауи щарда гIанацIгIитI».
СквшышвкI райхIа цIитIта «АчIныш» рахIа йдуу атеатрква рсцена йгьыквцIуам, йъакIвызлакIгьи ауи дара йшгIаргвынгIвуа апшта йдыргылитI. АпшгIвы Кобахиа Елена апсуаквагьи ауи дара рылкIгIаракI шаларцIаз гвы алтын арежиссергьи актерквагьи дшырзыразу лхIватI.
«ЗымгIва рацкIыс хвы ззыбачIву жвдыруама? Йыншауа ангIаудыруа – арежиссер йгвы йтайкIыз гIаугвынгIвуата ауи йгIанйыршаз атурасква уанырпшуа акIвпI. Ауи гIахътIракI йашIуырпшуаш гвыргъьарапI. Зхъа хвы азызбауа запштеатрзлакIгьи Чехов йгIвыраква аргылитI – ауат тамамта йшгIаргвынгIвуаш, ргIагвынгIвыща шгIадырбуш йащтата. Анчва дшвзыразхатI ари шIыцта йъагIахIшвырбаз ахъазла!» – лхIватI ауи.
Айчважвара анакIвшуз апшыгIвчва арежиссер аргылчIв йалалцIаз асимволквакIла йылхIвара лтахъыз дрытамамуан. АзджьакI апьеса шIыц-шIыц рыла йшгIацIалыз, йаргьи апхъала йшазхъвыцуаз ацкIыс рыцIа йцIолата йшырбаз рхIвахуан.
«Йаладыргылыз «акъвышраква» зымгIва гIасгвынгIвыта гьсзыхIварым, ауаса йара апьеса, ага йнашхыйазтынгьи, абзазара, абзибара, лашаракI срызнархъвыцтI. Ауи хвы аквхIцIара атахъыпI. Азъазара уаквчважвара ахIатырла адрамтеатр, антахьгьыт атеатрква уцалара, классика уапхьара атахъыпI», – йгIаликIгIатI Манаргиа Алхас.
АргылчIв йгIалыланацIаз алахIвараква йауацIыхта агвы йгIаквылцIатI апшгIвы Ладариа Аида.
«Актерква ртурасква рпсы рыларцIауа йгIахъвмартI. Ауаса, Мадина, асимволика мачIкI йахъбцачвазшва йызбитI. Ауи апш закIы санйапхьадзагьи – «ачIвыйа Мадина арыла йылхIвушыз, ари йгIаныцIуа ачIвыйа?» – хIва схъвыцуа счIван. УадыргIванагьи анахьанасагьи сгIапшыхуанта араса схъвыцуан: абари арежиссер йгIахъвыцри апшгIвы ауи шгIайгвынгIвуи акIвзапI атеатр уыхъуата уызчпауа. Са йыздыритI бара йпшгIауа бшрежиссеру. Ари аргылчIв апынгьи ауат бпшгIараква сыласхIватI», – дацIачIвагъватI ауи.
Датшагьи апшыгIвчва йгIалыркIгIатI аргылчIв апны актер шIаква шгIахъвмарыз, макъымта йацIаз шалыргаз йгьи абзибара йакIкваз ргвы йту апсуа бызшвала йшгIахъыртIуаз.
«Ауи агвы агIахътIыща йара алкIгIара амапI. Апхъапхъа апхIвыс ахъацIа йщапIква тшрыцIалрышвитI, уацIыхъван тшгIацалырпахитIта йауылщтхуазшва тшылчпитI, ауаса йгьауылщтхуам – ллахIвараквагьи лхьыгIагьи тшырзылдыруата тшылкIитI. Ауи шедеврпI», – лхIватI Аргвын Асида.
АпшыгIвчва аспектакль хвыта йаквырцIуз гьапшымызтI, ауаса йхъадула зымгIвагьи аквшватI – ауи цIолата ргвы йалалтI йгьи йархъвыцтI. АргылчIв йгIащтIнахуа абзазари абзибари рмагIны йазынарху азцIгIараква дзачIвызлакIгьи йаргванта йгьи йгIайгвынгIвуата йгIацIцIтI.
Анйара ацIыхъва апроект йахъпшылуа АААК а-ОСАЗ аунашвахъцIагIв Хагба Изольда атеатр аунашвачпагIвчвагьи актерквагьи ъарыцынхауа ахъазла лразыра ажваква рзыналырхатI.
«УахьчIва хIара хIанйара джвыквцIагата йаъапI, ажва аламкIва аквчважвараква чкIвыныргIа рыцIа щардагIвыта йгIарыланахIыркIлуштI. Са сшазхъвыцуала, хIара йапшым афакультетква рпны йапхьауа астудентква рыцIа щардагIвыта йгIазшIыхIтра атахъыпI, йалкIгIата журналистика афакультет астудентква – ауат ръачIвагIа йаквыргIапсызлара ахъазла аспектакльква йрыквчважвауа тшырбжьарквын, йапшым агвгIанаграква ргIарыквын, арежиссерква ркъвышраква гIардыруа йцарыквын йгIарыхъвахуаштI, даргьи ррепортажква рыцIа йцIолазлуштI йгьи йджьащахъвазлуштI, апшыгIвгьи ауат дырпшрыквын атеатр дгIайра йтахъхуштI. Ари йапшу анйараква рпны акIвпI абзийи йамуи узалыргауа уъащцауа».
Адуней апсуа-абаза конгресси Апсуа театри йацдырхъйауа апроект аргылчIвква цIолата йгьи йауацIыхта йъалдыргалуш айчважварта агIаныршара йазынархапI. Апроект атеатрдырра зъачIвагIугьи, атеатр ззырдыруа йалагагIвацаз ашIаквагьи, аргылчIвква хъзымрыпалауа апшыгIвчвагьи, ахъаз асцена азъазара хвы азызбаквауагьи аднакIылитI. Айчважвараква йызтахъу дзачIвызлакIгьи дгIарылал йауаштI.
швталра йа тшаншвцIара атахъыпI.