Адуней
апсуа-абаза
конгресс

АААК агвып Апсны Ажвлара палата йаднагалыз «Айчважвара. АбагвынгIвра. ТшауацIыхра» къральгIв айззара йаъан.

Айззара анхара йалан апрезидент Гвынба Бадра, апремьер-министр Делба Владимир, авице-премьер Нанба Джьансыхв, аправительства йалакву, а-Парламент адепутатква, Апсны апны Россия рхIвачIвгIвы Шургалин Михаил, акъала йгьи арайон айззараква рдепутатква, адиннкъвгагIвчва йгьи ажвлара адкIылараква ргIащтийыгIвчва.

Айззара апхъала Ажвлара палата VI азддара нхара архъйатI. Ауи анхара апкъ йтата аполитика партиякви ажвлара адкIыларакви руысхагIвчва, акъральыгIва ъанатIанкъвгагIвчва, анаука йгьи аэксперт жвлараква йрынйатI. Ауи акIвымкIвагьи адемография политика, акыт шIыпIаква ртшауацIыхра йгьи аполитика ргIапсра апсахра йырзынархаз хуатыкв айчважваракI аднагалтI.

Айззара йалакваз йгIащтIырхыз ауысква цIолата йрыквчважван йыззгIайыз гIалыркIгIатI. Алалра ацIыхъва Ажвлара палата асекретарь КIьычба Гули афорум апны йчпачIвыта йырпхьадзаз ачIвырхъаква шдырхъйушла ащаквыргылра дгIапхьатI.

Йазалху ацхърагIара йаланакIуата арыпхьарали жвлара джьгаррали згIвадарахчарали АААК ахъвшара РекIа кыт апхьарта йалачпу а-ФАП хъвшви нхаги азыргатI.

Смольна апны Петербург йгIалхIву абзазагIвчва акъральыгIва ртшхъвагакви РФ а-Президент йхьызхIвагакви ъарыртуаз агвыргъьахъв айззара акIвшатI. Агубернатор Беглов Александр «Санкт-Петербург апахь агIатгараква рыхъазла» гвплацIа КЧР АуагIа Райззара аунашвачпагIв йтарагылыгIв, Адуней апсуа-абаза конгресс ЙхIаракIу асовет аунашвачпагIв Эгьзакь Мусса йгIайылайцIатI.

Артшхъвагаква радзатI наука, культура, арыпхьара, промышленность, згIвадарахчара рынхагIвчва. Агубернатор йшгIаликIгIазла, ауат дасузлакIгьи дъанхауа апны акъраль бзазара йгьи йкъагIара ахъазла йылшауа зымгIва йчпитI.

«Алагъь къала хъада апны хIгвып рынхара хIаракIыта хвы ъаквырцIаз ахъазла сразыпI. ЙалкIгIата йгвлахIарапI «Гранд Каньон» тшауацIыхырта квта асквшы 20 анхIыртлапIуз амшква йрыквшвауата хIыхьыз ауаса йъархIваз. ХIара Петербурги ауи абзазагIвчви рыхъазла хIынхара гьашIахIрысуашым», – йхIватI Эгьзакь Мусса.

ЗымгIва шалу ауи атшын ртшхъвага 64-гIвы йрырттI.

АААК «ХъвлапныкI атеатр апны» культура-арыпхьара проект акIвнаршауаркIвитI. Ари азын атеатр йасасхатI Ардзынба В.Г. йыхьыз зхъу Эшера аквтанай апхьарта апхьагIвчва.

ЙшцIасхаз апшта, атеатр азъазара адуней апны амдара акIвлыршатI Апсны апны гIатгара зму ажурналист йгьи актриса Когониа Элеонора. Ауи апхьагIвчва атеатр аъадаб амадзаква ралхIвтI, артист йгIапсара амагIны йгьи азал апны адауышвара йшахъазхабзам – аршIыйара нхара йшахъвыкIу гIаргвынлыргIвытI.

АпхьагIвчва йрызлырхыз апрограмма щарда гIацIанакIуан. Ауат атеатр асцена уыкIвшата угIапшрыквын йшаъу рбатI, артистква тшъаршвуа апещква йырнашылын афырква ртурасква шгIаншауа йапшытI. Аспектакль йаламгаскIва асабиква атеатр ачарта апны пхата йдрайгватI.

Ахъвлапын йагIаншара хъадахатI Островский Александр йпьеса «Сипша»-ла йдыргылыз аспектакль апшра.

Апсны ажвлара хабарргагаква рынхагIвчва рымш Апсны Республика Ажурналистква радкIылара аунашвачпагIв йгьи «Абаза‑ТВ» адиректор Хашиг Руслани хIари хIайчважвара гIатахIцIитI.

ХIтурых апны магIны змаз агIамтаква, айсра асквшква йырзынарху агIагвалашвахраква, Ардзынба Владислав йыцынхара, уызхъыс йамуаш журналистика ахабзаква йгьи аъачIвагIа йапщылу архъвыхраква хIрыквчважвитI «Гәыкала» анатра шIыц апны.

Адуней апсуа-абаза конгресси адрамтеатри Айкьангьашырта клуб анхара атаджвыквырцIахтI. «Атеатри апшгIви» проект йаланакIуа йапхъахуз анйара Чехов й-«АчIныш» ангIадырба амщтахь йакIвшатI. АпшыгIвчва аргылчIв хвы аквырцIатI, ргвгIанаграква абархIвтI, уыззнархъвыцуа гIалыркIгIатI. https://abaza.org/abq/1298

СогIвым йаъу а-Конгресс ауысхарта Трыквшта апны апсуа диаспора йрылу Мендерес Аднан йуниверситет адоцент Адзынба Эльчин дгIайтI. Ауи лынйара пхата йакIвшатI, айчважвара пкъы ацIата йаъан. Адзынба Эльчин адкIылара анхара лымагIальаматхатI, айчважвара ауыла йшIымчIварныс дайгвгъауата лхIватI.

Ауысхарта аунашвахъцIагIв Реквава Темур АААК ЙхIаракIу асовет аунашвачпагIв Эгьзакь Мусса йыхьызла нархара щардала ацынхари ацацхърагIари йшазыхIазыру йхIватI.