Адуней
апсуа-абаза
конгресс

Репатриацияла АкъральыгIва комитет апны Апсны апны гIатгара зму ажурналист Бебиа Екатерина абзазара йгIахъыху лфильм «Гвана Муминат – абаза Жанна Д’Арк» апшыгIвчва йддырбатI.

Акино гIазквчважвауа Гвана Муминат йбергьльу дапхьахьапI, аэкономика наукаква дыркандидатпI, Лагъь КIавкIаз институт (РФ а-Президент йпны йгIаныршу Россия ауагIа млыкврхIари акъральыгIва къвырльыкъвхари ракадемия  ахъвшара) данаука нхагIв ахIбапI. Ауи наука нхарата 100 райхIа лыгIвхьатI, ауат йрылапI амонографияквагьи.

Гвана Муминат Адуней апсуа-абаза конгресс (Апсуа-абаза уагIахъа рдуней адкIылара) ангIандыршуз ауи ауыс йацIагылаз дрыуазаджвытагьи ауагIа дырдыритI. Асквш 1992 йгIашIарышвта 2015-дза ауи адкIылара давице-президентын.

Адуней апсуа-абаза конгресс «Ирӡтәым» проект апкъ йтата чкIвыныргIа адырраква рылагарала анхара акIвнаршауаркIвитI. Ари азын айчважвара СогIвым 10-хауа аквтанай апхьарта апны йакIвшатI, ауи йалан акласс ахIбаква рапхьагIвчва.

Алекция йахьзын «АцIасква рцIолара, агвы ацкьара: апсуа намыс ащатаква». ЙгIачважварныс йгIадрайгваз асуратгIвгIв Чвыджьба Нодар апхьагIвчва апсуа намыс щатата йазалуа, ауагIа рща йалата йынкъвыргауа ацIасква, акъазщаква райхIвтI.

Айчважвара йхътIыта, пхата йакIвшатI. АпхьагIвчва ауи джьгарта йалалуан, асас йыршIыйара, суратгIврала ауагIахъа рпны йщаквгылыз ацIасква йырзынархаз азцIгIараквагьи йыртуан.

СогIвым 1-хауа аквтанай апхьарта апны Адуней апсуа-абаза конгресси Апсны акъральыгIва университет апсуа бызшва акафедра арыпхьагIв Джьугелиа Инни йацыта йдырхъйауа «Ирӡтәым» проект апкъ йтата йызкьазууыз алекция акIвшатI.

Анйара апсуа культура апны йшцIасыз апшта асабиква рбжьаща ащатаква йырзынархан.

АпхьагIвчва драчважвауата Джьугелия Инна «Апсуара» ачкIвынчви ахIвссакви убжьара атахъыта йшгIанахIвауа гIаргвынлыргIвытI.

Айчважвара йалакваз ауагIа сквшышвпхьадзара йынкъвыргауа ауат ацIаскви ахабзакви агIвычIвгIвыс дщаквгылырныс, йуагIахъара лкIгIараква йымрыдзуата, агвбайара ащайдзаква дрыдымцIуата дгIадзынгылырныс йшацхърагIауа ауысла ргвгIанаграква рхIватI.

Алекция ацIыхъва чкIвыныргIи физкультури тшауацIдрыхрала АААК ахъвшара аъачIвагIагIв Квициниа Есма апхьарта аунашвачпагIвчва асабиква зларбжьауа акIартква рылттI.

Амца, айха йгьи сквшышвпхьадзара зхъыцІуа ацІасква – СогІвым абагъьата апны гІвымшкІ руацІа ажьийра афестиваль акІвшатІ. Асасчва атшыбжьараква йцарныс, алекцияква йрыздзыргІвныс, абджьарква ргІарбартагьи йапшырныс рылшатІ. ЙалкІгІата зымгІвагьи йрымаджьащахъвахатІ асуратчпагІв ДжьапІуа Батал йчпаз йпасу асквшышвквтаква рыгІамта ахрихыцхысыгІв дшаъаз гІазырбауа асурат. 
«Йбзу азъазара» агІатра шІыц апны хІара афестиваль хІцата абджьар шгІаншауа – аджьахІва йапхъахауа аудын угІалагата йцІыхъвахауадза – гІахІырбуштІ.