Лента событий ВААК
«АпшыгIвчва, а-Конгресс йгьи атеатр: «ПаштыхI къьатIамаз» аквчважвара
Адуней апсуа-абаза конгресси Апсуа театри йалата Айкьангьашырта клуб йгIвбахауа анйара адыргалтI – ауи «ПаштыхI къьатIамаз» спектакль йшапшбыргуаз йакIвшатI.
АргылчIв дадынхалтI спектакль 30 райхIа дахIврала йзыргылхьаз арежиссер Дзудцов Тамерлан. Ауи Апсуа театр асцена апны йзакIым-йгIвбам абанпараква йрыланакIуа актерква азикIкIын йацасуа йгьи йангIалуа ансамбль гIанйыршатI.
Аквчважвара ъадзакIвшуз апшыгIвчва рлахIвараква амырдара йахъазымкIва арежиссергьи разцIгIараква йзынадырхун – атурасква алырхуан, йцIакIыз асимволква йырзыпшгIун, ужвы хIызту азаман агIан аклассика гIвыраква шуылаухIвауа йазхъвыцуан.
Анйара псы ахъата, йхътIыта йгьи щарда гIацIанакIуата йакIвшатI – ауи атеатр уахьчIва айчважвартата йгьи уацыта магIны зму ауысква уъарызхъвыцуа уатыквта йшалуа гIанарбатI.
