АААК Апсны ауагIа ргIвгIвы Гогуа Алексей йгIахIвахрала йахъархыз йайшысу афильм «Сыс» Апсны апны йапхъахуз агIарбара аднагалтI.
Амичба Амра
Адуней апсуа-абаза конгресс йайшысу афильм «Сыс» Апсны апны йапхъахуз агIарбара йгьи афильм арежиссери йалаквази ауи йъаквчважвуз апресс-конференция аднагалтI. Ауат ауысква СогIвым йаъу АААК ауысхарта апны йакIвшатI.
«Сыс» йара ауаса зхьзу агIвгIвы Гогуа Алексей йгIахIвахра йгIахъыху кинопI. Ауи Герасимов С.А. йыхьыз зхъу кинематография йъадрыпхьауа Россия акъральыгIва институт (ВГИК) йгIалгаз Кварчиа Амина йылдиплом нхарапI. ВГИК архъвыхыгIвчва ркомиссия арежиссер шIа лынхара «бзидздзата» йырпхьадзатI.
СогIвым апны афильм зымгIва рапхъа йапшытI АААК апресс-квта асасчва. Ауат йрылан Апсны культурала министр Кове Дауыр, арежиссер Аблотиа Вячеслав, Гогуа Алексей йпхIа Гогуа Амини ауи лпхIа Базба Лани, афильм апны йгIахъвмарыз артистква.
Акино йанапшы амщтахь зымгIва йрапхъата ауи ажва азызхIваз дрыуан кинохъыхра зъачIвагIу – йбергьльу апсуа режиссер, «Абхазфильм» киностудия адиректор Аблотиа Вячеслав.
«Са йшспхьадзауала, Амина Анчва йгIалылайцIаз хъвыкI лылапI. Ари апш философия уыс дъащыхIалгIвацаз йгIаунахIвитI ауи дшкинорежиссер бзихуш. СайгвыргъьитI кино бзи йызбауа агвып йъагIахIылахIаз. Амина слайхIвахIвитI, ауи йлылу Анчва йхъвы тшауацIналрыхныс лшара лауырныс лзыстахъпI. АшIаква акъральыгIва ахьыла цхърагIара йазыбжапI – йшзынхуш, ркъару шрызгIарысабапуаш апш», – йхIватI Аблотиа.
Гогуа Алексей йпхIа Гогуа Амина арежиссер лаба йразыра ажваква лалхIвхтI.
«АгIахIвахра згIвыз афильм йгвапхатI. Ауи йгIаликIгIатI Кварчиа Амина айшыста щарда шылзыгIарбаз. Алексей Ноча йпа кинематограф бзи йбун йгьи йбауаркIвитI, уыжвгьи афильмква дырпшлитI. Йаргьи [ауи] йгIахIвахра аэкран апны йгIадырбарныс йъагIалырхыз йгвапахатI, – лхIватI агIвгIвы йпхIа. – Сшырзыразу схIвара стахъыпI акино агIарбара адызгалыз Адуней апсуа-абаза конгресс ауысхагIвчва».
Апсны апны йгIадмырбаскIва «Сыс» фильм анахьанат акъральква рпны йапшырныс йахадзатI: ауи Франция, Италия, Россия, Корея, США, Япония рпны йакIвшаз 12 фестивалькI йрылан. АзджьакI рпны йапшым аноминацияквала – «йагъьу студент фильм», «йагъьу арежиссер-студент», «йагъьу афильм айшыс», «йагъьу оператор нхара» – апхъагылара гIатнагатI.
Ауатква гIайпхьадзауата культурала аминистр Кове Дауыр арежиссер Кварчиа Амина «лхъацIара» джьайщатI, йауа ухIварыквын ауи апсуа гIвгIвы йгIвыра аэкран йаквлыргIапста «агIвыма къральква рпны йбзазауа апшыгIвчва хIуагIа рфилософия длырбарныс» уыста йылкIытI.
«ДгIахIахвпIта, японкI афильм дапшрыквын апсуаква рфилософия гIайгвынгIвуаштI. Сара схъатала афильм санапшуаз сшапсыуу шсхъсраштылуаш сащтан – Гогуа Алексей йгIахIвахра йампхьаз гIвымакI йапш сапшуан. Акадр апны йубауа апсабара апшдзара, атдзы йа асыс ахъазгIваца йгьгIаталуам – акино уанапшуа ауагIа рфилософия уылаухIвитI. Са йшызбазла, бара ауи гIабырбарныс былшатI, – тшылзынайырхатI ауи Кварчиа Амина. – Сшхъвыцуала, нхара щарда бпырапI. АдахIвраква бымазтI! Кьангьаш гьазгIазгуам: арежиссерква – ашIаквагьи ахIбачвагьи – гIахIыцIагылырквын Апсны апны кинематограф псы ахъата йхIзычпуштI».
АпшыгIвчва дрылан аполитик йгьи ажвлара уысхагIв, Гагра район йахъадата йынхаз Кецба Астамур. Очамчыра район йаланакIуа Джгерда кыт йтагылу ауи йаба йтдзы апны акIвын афильм ъахъырхуаз: арежиссер щарда далыхуамца ауи рыцIа йгIалылхтI.
«Афильм ъахъырхыз атдзы апны йанакIвызлакIгьи хIклассикква, культури азъазари рынхагIвчва, агIвгIвчва хвду рзырбун. Гогуа Алексей Ноча йпа сани саби рахIа бзи йырбуз дыгIвгIвыпI. Ажва гьалам, сара стынхаква зныкI рхъа ду йырбахуа йырхIвахлуштI хIрежиссер дудздза Кварчиа Амина лъачIвагIала лынхара джвыквылцIауата йапхъахуз ачIвырхъаква хIтдзы апны йшатылпыз», – йхIвауа багъьата йазхъайцIауата дгIачважватI Кецба Астамур, йаргьи ВГИК йгIалгагIвацаз апхIвыспа лайрышра ахъазла дйыртшхъватI, адахIвраква шылзыйтахъугьи лайхIвтI.
Лара Кварчиа Амина лкьазу ангIадза актерква, йъанхушыз ашIыпIаква шгIалылхуаз, экранизация ахъаз апсуа литература йбзу аклассик йгIвыра згIалахвыз гIалхIватI.
«Афильм агIвычIвгIвыс йшйылахIауа гIанарбитI, ауи лахъвгIахъасракIла йдухаз ацIай йгIайыквчважвитI. Ауи акIвымкIвагьи – уачIвы амш шцуш заджвгьи йшйымдыруа, хIдуней штIахсу гIанахIвитI. Ауатква хIуахьчIвамш йаквыргIапспI. Ауи акIвпI йаргьи агIахIвахра фильмта йсчпара зстахъхаз. Са сыхъаз ауи хъацIаракI йагIвызан – уачвшвушта йаъан ари апш гIвыра кинота йхъысхпI-хIва йгIауахвныс, йайхIахугьи – метр айшыста. Ауаса стахъыра рыцIа йымчыта йгIацIцIтI сшвара ацкIыс. Автор йгIвырала кино хъысхныс сшайрыхвитуа ауысла пасата хIангIалхьан», – йылрытамамтI Кварчиа Амина.
АААК ахабарргарта портал апны афильм цбызшвакIла йатаркIтI, титр ацырцIатI. Ауи «Сыс» йзапшуаш ауагIа рпхьадзара щардала йаланархIуштI. Афильм аконгресс асайт йгIатарцIатI, йызтахъу дзачIвызлакIгьи ауи дзапшуаштI.
швталра йа тшаншвцIара атахъыпI.