Адуней апсуа-абаза конгресс ЙхIаракIу асовет аунашвачпагIв Эгьзакь Мусса АААК VIII Айззараду ацIыхъвагIарбараква гIайхIватI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса СогIвым апны гIвымшкI руацIа – декабрь а 7-8 рагIан йакIвшаз АААК VIII Айззараду шынхаз даквчважватI.
ЗымгIва шалаз Адуней апсуа-абаза конгресс VIII Айззараду Апсны акъала хъада апны Трыквшта, Голландия, Германия, Къарча-Черкес, Къабард-Балкъар, Ставрополь шта, Москва, Санкт-Петербург, Апсны йгIартыцIыз делегат 130-гIв раъара азнаддатI.
Айззараду декабрь а 7 атшын гвыргъьахъвыта йгIахъыртIытI. АгIахътIра йазынархаз алачIвара йалан Апсны йапхъахауа агIвычIвгIвысква, йбергьльу ажвлара йгьи аполитика уыснкъвгагIвчва, йапшым аъачIвагIаква, ажвлара гвыпква йадыркIылуа ауагIа. Асквш 2022 агIан Айззарадугьи адкIылара аюбилейгьи – ауи гIаншищтара йцIыз асквш 30 ¬– аквшватI, АААК ЙхIаракIу асовет аунашвачпагIвгьи а-Конгресс агвыпгьи хIвахIвра щарда гIарадзатI.
Декабрь а 8 атшын Айззараду анхара гIвхъвыкIла йалан: АААК ЙхIаракIу асовет аунашвачпагIви адкIылара ЙхIаракIу асовет йалазлуши ъалырхуаз, йапшым адгалра уысква йъарылапшуаз алачIвара йгьи а-Конгресс анхара анархараква йгIарыланакIуа рахIа магIын ду зму ауысква йырзынархаз ауатыкв айчважвараква.
АААК VIII Айззараду анхара алгауата адкIылара ЙхIаракIу асовет аунашвачпагIв Эгьзакь Мусса «айшва гьагьаква» йырхъпшылуаз ауысхагIвчва анхара злалгаз рхIварныс йгIайрайгватI. АшIара йырзынарху аполитики спорти экологии йъарыквчважвуз «айшва гьагьа» акIвзыршуз Зантариа Рустам, «Цри бызшва» секция зхьырпшыраз Хагба Изольда йгьи «Апсуара» йазынархаз ауатыкв айчважвара йахъпшылуаз Бебиа Екатерина ООН, ЮНЕСКО йгьи ЮНИСЕФ йырзырщтийырныс йдрыхIазырыз арезолюцияква Айззараду йалакваз рыхадыргIвазатI.
ЙхIаракIу асовет аунашвачпагIв Эгьзакь Мусса йгIачважвакваз разыра ажвала йнайдастI, АААК VIII Айззараду йгIадгылыз зымгIвадзугьи дшырзыразу йхIватI. Ауи а-Конгресс агвып хвысквшала йыззынадзаз адахIвраква гIаликIгIатI, йджьащахъву, сабапрагьи злу апроектква, агIвыма къральква рпны йдырхъйушгьи рылата, рыцIа-рыцIа йшщардахалуш кьангьаш шазгIайымгуагьи йхIватI.
«Айззараду хIара хIыхъазла гвыргъьара дупI, ауи хIуагIахъа райщчвари рацзакIыри йыргIарбагапI. Ауи йаццауата хIара хIыхъазла магIны аман хIгвып абаза уагIа ртшауацIыхрала йлыхIхыз апрограмма абзазара йшаларыжьуа гIахIырбарныс», – ауыс гIаргвынйыргIвытI АААК ЙхIаракIу асовет ахъада.
Уыста йырчпаз дрыквгIацапахуата Эгьзакь Мусса а-Конгресс хвысквша руацIа анхара агIарбараква йшрылапшыз, апхъахьыла хачIвы шлырхыз, адуней организацияква йырзырщтийуаш арезолюцияква шнарахвыз йхIватI йгьи йгIаликIгIатI йызлапшыз ауысла йнарахвыз ащаквыргылраква «абаза уагIа ргвыла йшацзакIу» шрылубгIауа.
«ЙгIайыз зымгIвдзугьи сшшвзыразу швасхIра стахъыпI, Анчва дшвзыразхатI сабап злу шважва ъагIахIылашвцIаз, пхата швъахIызхIвахIвыз ахъаз. Швара швыуа дзачIвызлакIгьи хIыбызшва, хIгвбайара, хIцIасква рыхъаз йгвы ъацхIауа акIвпI хIара ауат хIхчарныс йгIахIцхърагIауа», – йалйыргатI йажва Эгьзакь Мусса.
Декабрь а 7-8 агIан СогIвым апны йакIвшаз Адуней апсуа-абаза конгресс Айззара ду адкIылара ахъазла йагIбахауа айззарадууын. АААК ЙхIаракIу асовет даунашвачпагIвта Эгьзакь Мусса даталырххтI. Айззараду апны ЙхIаракIу асовет йалазлуш шIыцта йдрыбагъьахтI, АААК а-Устав псахраквакI аларцIатI, ацынхара ауысла ангIалраква мачвы рыцIарцIатI. VIII Айззараду йазынарху алалраква ужвыгьи йапшым форматла декабрь а 11-дза йнайуаштI.
Адуней апсуа-абаза конгресс айззарадуква хвысквша рпны зны йакIвшалитI. Адуней шабгу йбзазауа абаза уагIа ргIащтийыгIвчва тшазыркIкIитIта адкIылара анхара агIарбараква йрылапшитI, ЙхIаракIу асовет аунашвачпагIви йалазлуши алырхитI. Ауи акIвымкIвагьи айззараду апны апхъахьыла анхара апрограмма лырхитI, анхара анархара хъада дрыбагъьитI.
Адуней апсуа-абаза конгресс VIII Айззараду ахабар дыргауата йацынхитI: Апсны акъральыгIва телерадиуакомпания (АГТРК), «Абаза-ТВ» телеканал, Sputnik Апсны хабарргарта агентства.
швталра йа тшаншвцIара атахъыпI.