Лента событий ВААК
Баслахв кыт апны АААК ашIыпIа хъвшара апхьагIвчви МикIайа Эрики ранйара аднагалтI
АААК анхагIвчва ашIыпIа хъвшараква рыцынхара апеъ йтата актер, апродюсер, арежиссер, ажвлара уыснкъвгагIв МикIайа Эрик дрыцта Баслахв кыт апхьарта йцатI. Апхьарта арыпхьагIвчва рахIварала ауаъа апхьагIвчва ахIбачви сынчIва апхьарта йгIалгаквауи йырзынарху айззара адыргалтI. Анйара атема хъада – «Умурад уазыназырдзауа ахъатачIв мгIва» – МикIайа Эрик йыршIыйара бзазара злалаз ахъвква, ауи йъачIвагIара йшалайырхIуз, йхъа дадынхалуата швапхата йырхIаз гIахънатIытI.
Эрик апхьагIвчва йара уахьчIва йалагата ргватра ркъаруква ззынадырхуш, бзазара мгIвата йгIалырхуаш йазынадырхарныс дрылабжьатI.
Ауи акIвымкIвагьи гIачважвара азъазарала мастер-класс риттI, апхьагIвчвагьи ауаъа МикIайа Эрик йуысаква йгIарыпхьатI.
Урышв бызшвали литературали арыпхьагIв Торуа Руслана асас йзынархата уыса алалцIан йара дгIапхьарныс дйыхIватI.
Пхата йакIвшуз айчважвара ужвыгьи анйаракI гIанарыцIстI – асабиква май а 3 Аурышв драма театр апны йакIвшуш МикIайа Эрик йконцерт йдрайгватI.
Баслахв апхьарта апхьагIвчвагьи арыпхьагIвчвагьи ргвы йгIатыцIуаз аразыра ажваква ари апш формат гIалызхта магIны зму ауысква абараса йрылачважварныс лшара гIарызтыз адгалагIвчва йырзынадырхатI.
АААК ариауыс апны йрыцызкIыз АБНИЛОСи ауи адиректор Лейба Виталий ДатикIа йпи йырзыразпI.
