Лента событий ВААК
АААК Жвандрыпщи Хыпсти кытква рпны апхьагIвчва рыхъазла айъазагIв дъадзаным агIвычIвгIвыс йапхъахауа цхърагIара шйурадзушла атшыбжьараква акIвнаршатI.
Жвандрыпщи Хыпсти кытква рапхьартаква рпны агIвычIвгIвыс йапхъахауа медицина цхърагIара шйурадзушла атшыбжьараква апхьагIвчва 78-гIв рылан. Атренингква Адуней апсуа-абаза конгресси МЧС аъачIвагIагIв Амычба Индири йадыргалтI. АпхьагIвчва агIвычIвгIвыс данмахра, йчважь анбылра, амара йхъа йанташра, закI ангIайыцхIара, йыбыгIв аншIчIвара, удын анйыквшвара, йща ангIаджвыквылра йчпара атахъу рархIвтI. Йазалху атшыбжьага апны агIвычIвгIвыс йгвы райшата уаквымсуа йшучытIуши псып шйурауаши ддырбатI.
«Апсуара амгIващквала» абаркIыра: Атара, Лащкьындар, Кындыг кытква рпны йакIвшаз айззараква.
АгIатраква рабаркIыра «Апсуара амгIващквала» апкъ йтата ажурналист Бебиа Екатерина Атара, Лащкьындар, Кындыг кытква рпны «Апсуара» йазынархаз айззараква шакIвшаз гIалырбитI. Асквш 2009 агIан йанырцIатI.
АААК макъымршIыйарала апроект шакIвшаз йалапштI.
Адуней апсуа-абаза конгресс чкIвыныргIи физкультури тшауацIдрыхрала ахъвшара амакъымршIыйагIв, амакъымалацIагIв Марыхвба Абзагв дрыцта йадыргалыз макъымршIыйарала апроект шакIвшаз йалапштI. https://abaza.org/abq/1126
АААКи Апсны Ахъахчара а-Министерстви йацынха йшауаш йалачважватI.
Апсны Республика Ахъахчара аминистр йтарагылыгIв Бжаниа Давид, Ахъахчара а-Министерства аппарат аунашвахъцIагIв Кортава Вадим йгьи Ахъахчара аминистр йкьангьашагIв Чолариа Томас АААК ЙхIаракIу асовет аунашвачпагIв Эгьзакь Мусса йрайгван а-Конгресс ауысхарта апны йсасытI.
Йызлачважваз ауысква щардапI, ауат йрыуапI пычIв айсра азрыхIазырра гIащтIыххра, айсра ъачIвагIаква йырпщылу дырра хIаракIы гIацIгара. Анйара апны АААКи Апсны Ахъахчара а-Министерстви йацыта йдырхъйа йауаш апроектквагьи йрыквчважватI.
«ХIызту агIамта айсра уыс арыпхьара амагIны дупI. Апсны Ахъахчара а-Министерства йапхьарныс зтахъу чкIвыныргIа Россия йагьу йхIаракIу айсра апхьартаква рпны дырра шрызгIацIгуш йырцхърагIитI. Ауи дырра бзи заура зтахъу рыхъаз цхърагIара дута йхIпхьадзитI», – йгIаликIгIатI Бжаниа Давид.
Анйара пхата йакIвшатI. Апхъахьыла ацынхара щата азыщтIарцIатI. ДукI йнамихуата а-Конгресс агвып а-Министерствагьи рыцта ъачIвагIагIалхрала АААК апроектква рыуа закIы апкъ йтата зджьара йцуштI.
Апсуа-абаза уагIахъа йгIарылцIыз йбергьльу агIвычIвгIвысква йырхIвата «пхьынцIыгIва гIазшIалыз» ажваква.
«КIавкIаз: акультураква ралысырта»: Санкт-Петербург апны МАЭ РАН КIавкIазла ахъвшара асеминар акIвшатI
Санкт-Петербург йаъу антропологии этнографии рмузей (Кунсткамера) апны ноябрь а 23 атшын МАЭ РАН КIавкIазла ахъвшара йаднагалыз «КIавкIаз: акультураква ралысырта» семинар акIвшатI. https://abaza.org/abq/1123
АААКи Лагулаа Беслани «Аимцакиачара» фильм апшыгIвчва йддырбатI.
Апремьера Адуней апсуа-абаза конгресс ауысхарта апны ноябрь а 23 атшын йакIвшатI. Афильм «Амазара» проект апкъ йтата йхъырхтI. https://abaza.org/abq/1122
АААК Ачандара кыт апны ъачIвагIагIалхрала атшыбжьара акIвнаршатI.
УахьчIва аъачIвагIаква йгьапшым йгьи щардапI, ауат сквшигIадза йрылахIитI йгьи тшырпсахитI. Уыззычпу, упсы бзи йабауа уыс шпагIалухуаш, тшыззубжьуш запшнархарайа, уабапхьуш – тамамта йадгалу ъачIвагIагIалхрала анхара чкIвыныргIа арат магIын ду зму азцIгIараква рджьауапква гIарауырныс йырцхърагIитI. Арыпхьарали згIвадарахчарали жвлара джьгаррали АААК ахъвшара ъачIвагIагIалхрала йызкьазууыз атшыбжьара Гвдауыта район йаланакIуа Ачандара кыт апны йакIвнаршатI.
Атренинг йгIадрайгватI АГУ азъазара ахъвшара йапхьауа Аджьынджьал Амина, агроинженер хъвшара йапхьауа Багателиа Айнар, физика-хIисапчпара хъвшара йапхьауа Касландзиа Нестор, МГИМО дуней журналистикала ахъвшара йгIалгаз Чкадуа Наала. Пхата йадгалаз анйара апны асасчва АААК ахъвшара аунашвачпагIв Хагба Изольди аъачIвагIагIв Хьышба Науыри рыцта апхьагIвчва йрачважватI, дыррагIацIгарали нхарта гIаурали дара руысква шалыз рархIвтI.
ЧкIвыныргIа ауат йырхIвуз йрымаджьащахъвата йаздзыргIвуан, азцIгIара рыртуан, айчважвара йалалуан. АщардагIв ари апш айчважвара йапхъахауата йалан. Атшыбжьара аналга апхьагIвчва аколледжква рпны апхьара йшнарахвуа йгьи йшадрыпхьауа зну абуклетква рыларшатI, абадыргаква амырдатI.
ЪачIвагIагIалхрала апроект йхIаракIу йгьи йазалху квтанай дыррагIацIгара йапшым анархараква чкIвыныргIа йшырдыруаш йазынархапI. Апроект джвыквлищтара ари йжвипщхауа анйарата йакIвшатI.
