Лента событий ВААК
Адуней апсуа-абаза конгресс уахьчIва асквш 31 артлапIитI
Агвыргъьахъв мшы ауысла тшазынархара йымата дгIачважватI АААК ЙхIаракIу асовет аунашвачпагIв Эгьзакь Мусса:
«ХIара хIадкIылара анхара Апсны ахъаз ймайрамыз агIамта – аквырджькви апсуакви райсра йанашымтаз – йджвыквнацIатI. Ауи агIан АААК датшата йапхьун – Апсуа-абаза уагIахъа р-Дуней адкIылара. Ауаса ауи мурадти хачIвыти йаргылуа ауищтарагьи тшгьрымпсахтI. Мшипхьадза хIара адуней шабгу йбзазауа Абаза уагIа шадхIкIылуаш хIазынхитI.
Сквш 30 райхIа йашIамсыз анхара кIара гIанацIгIатI. ХIара хIуагIа рыбызшва ахчара, ртурыхи рцIаскви рдырра рыщатала ажвлара рыбагъьара, тшауацIдрыхра йырзынарху проект щарда хIырхъйатI. Ауи акIвымкIвагьи хIара хIынхара агIвыма къральква рпны йбзазауа хIабашталагIвчва гIайхра ахъазла аъаща гIаныршарагьи йазынархапI.
А-Конгресс анхара абзирала адгьыл йыкву абазакви апсуакви йъабзазалакIгьи рыбызшви ртурыхи ддырдырырныс, ацIаскви акультури тшрыхадыргIвазарныс, зхъвыцщала йрыквшвауа ауагIа гIарауырныс лшара рымапI. ХIара хIацзакIыпI, хIыщайдзаква гIдыритIта – ауи акъагIара амгIвала хIзырцауа къарута йхIзалитI.
ХIара апхъахьылагьи йгIадзынгылуа абанпараквагьи адуней шабгу йбзазауа хIабашталагIвчвагьи хIрыцынхалуштI. ХIапхъанчIвиква рдырракви руасаражври гIащаквыгIжьра ахъазла зымгIва хIчпуштI, ауат ртынха Абаза уагIа уахьчIва йъабзазауа ашIыпIаква зымгIва рпны тшауацIнахIрыхуаштI. ХIара хIгвы багъьата ауи амгIвала хIцитI, ауагIахъа цIаскви агвбайари щатата йызмазлуш адуней хIыцгIанзыршара зтахъу зымгIва гIахIыцылырныс йаквгIазшIыхIтитI».
