Лента событий ВААК
АААК Мгвыдзырхви Жвандрыпщи рпны диспансеризация акIвнаршатI
Мгвыдзырхви Жвандрыпщи кытква рапхьагIвчви рарыпхьагIвчви адызкIылыз йызкьазуу адиспансеризация адыргалтI октябрь а 20 атшын Мгвыдзырхва апхьарта апны. АпхьагIвчвати арыпхьагIвчвати швкIгIвы райхIа знархараквала йапшым айъазагIвчва гIарпшытI: лор-врач, офтальмолог, уролог, апедиатрква, эндокринолог, невролог, реабилитолог, кардиолог. Йшабгу йгIауахвырквын, ацIайква рзгIвадара аъаща гьгвымхам. Ауаса згIваквакIгьи гIараутI, ауат зхьуа йдмыркъвауата аъачIвагIагIв дгIарддырпшра атахъыпI. Ауи апшта, зчIачIаква зхьуа асабиква аъапI. Ауат йазалху рхъвыхра йызлагIакIылсуаш швъа рырттI.
АААК акыт апхьартаква рпны амедицина рхъвыхраква акIвнаршауаркIвитI. ЙащтагIайуа архъвыхра ноябрь йадыргалуаштI.
Аныкъвадыкъваква рыхъазла Афон апны амдара: чкIвыныргIа йапхъахауа ринклюзив адкIылари АААКи ЦкIуа Анрик йгвала дырхъйатI.
Асквш 2022 июнь агIан ЦкIуа Анрик Владикавказ апны йакIвшуз Россия ашIара йырзалхыз аинклюзив арыпхьара форум «ГIвынадъа» далан. АчкIвын ауаъа йпроект «Инва-тур» дйырбатI, ауи апкъ йтата зызгIвадара аъаща йгIалцIла зылшараква ахъарысу ауагIа Апсны апны амдараква рзадигалра йгвыгъан. Анрик йпроект йхпахуз агыларта акIытI. Апсны апны амдараква адигалырныс ауи йгIайцхърагIатI «ЧкIвыныргIа йапхъахауа ринклюзив адкIалара» анхагIвы Халваш Ради АААКи. Ауат ракIвымкIвагьи зылшараква ахъарысу асабиква йрыцызлара атахъыз аволонтерквагьи гIайыцIагылтI. ЦкIуа Анрики Пилиа Яни ауат ъагIамдуз ашIыпIаква йырмагIну рархIвуа йрыцын. АгIамдара йалакваз рыла пшытI: Афон ШIыц акьльиса, адзкIатштшарта, «ПсырцхIа» айхамгIва станция, адзычваква ъану апарк йаъан. Амш алдыргауата ацIайква АААК йырзаднагалыз афачIвквала йдырчатI.
