Лента событий ВААК
АААКи Апсуа драмтеатри «Ахъвлапын атеатр апны» проект ужвыгьи йакIвдыршитI
Адуней апсуа-абаза конгресси Чанба С. йыхьыз зхъу Апсуа къральыгIва драма театри йацгIаджвыквырцIаз «Ахъвлапын атеатр апны» проект дырхъйауаркIвитI. Апхьара сквшшIыц апны ауи йгIалалтI Щакърыл П.С. йыхьыз зхъу Лыхны аквтанай апхьарта апхьагIвчва ахIбачва.
Апсны апны гIатгара зму артистка Когониа Элеонора атеатр ауацIа экскурсия акIвлыршатI – ауи атурых йауу агIаншара джьащахъваква ралхIвтI, рыцIа зхабар газ, апсуаква разъазара апны щта гIанызжьыз аргылчIвква дрыквчважватI. Ауи асабиква йгIаргвынлыргIвытI артистквагьи атеатр антахьгьыт анхагIвчвагьи ргIапсара хвы азыбара, аргылчIв ангIадырбауа йщаквгылу ахабзаква тшрыцчпара шатахъу.
УацIыхъван апхьагIвчва асцена ащтахьла йдырцан агвып йалакву йрабадырдыртI, ацIайква ауаъа аргылчIвква шдрыхIазыруа, актер йъачIвагIа йапщылу джьащахъвара щарда рдыртI.
Ахъвлапын йагIаншара хъадата йалтI
арежиссер Аргвын Мадина йлыргылыз аспектакль «Асду»
апшра. Атеатр апны амдара алдыргауата апхьагIвчва ахъагIараква ъарызпшуаз абуфет йдырцатI.
Тшыла аспорт анкъвакъвраква акIвшатI Бзыб атшрыгIвырта апны
Бзыб атшрыгIвырта апны «Апсны Республика а-Президент йкубок» ахъазла тшыла аспорт анкъвакъвраква акIвшатI. Атшчва йапшым адистанцияква рпны апхъанысрала, дротик аущтрала йгьи тшыла футболла йанкъвакъвтI.
АсогIа хъада йахъазымкIва араъа Апсны йапхъахуз йгьи йгIвыджьхуз апрезидентква, Апсны ауагIа р-Абашта айсра йаладзкваз йгьи згвы азшIытрала айсра йпшцIалкваз рыхьызква зхъхIвалгIаз асогIаквагьи йырзабакIтI. Метр 1600 зураз адистанция апны атшрыгIвра апхъагылагIв йыхъазла йазалху согIа гIанаргылтI Адуней апсуа-абаза конгресс. Ауи гIатнагатI Чхебелиа Инал йчIву, зкIвдыр Кулинич Юрий дтачIваз Эврика Амч. ЙгIвбахауа агыларта акIытI Шегушев Адам дызквчIваз Кардава Феликс йтшы Апсны Идиго. Йхпахауата йгIайтI Мамуров Мирбек зкIвдыр дтачIваз Апсны Мечта (Саканиа Саид йчIвыпI). АйгIайыгIвчва кубок, ахча сертификатква йгьи артшхъвага швъаква рырттI.
«Апсны Республика а-Президент йкубок» гIатнагатI Чхебелиа Тимур йгIайрыгIвыз Хагуш Юрий йтшы Дримлан.
Анкъвакъвраква адыргалтI чкIвыныргIи спорти руысквала Апсны Республика АкъральыгIва комитети Апсны Республика тшспортла афедерации.
Йбзу ауыс. ЩхархIара
ЩхархIара Апсны апны апхъанчIви заман йгIашIарышвта тшауацIыхра аман, ауи йгIалырхуаз апкъыгIваквагьи ауагIа рмлыквнкъвгара апынгьи ргвбайара бзазара апынгьи щардазджьара йгIадрысабапуан. «Йбзу ауыс» агIацIщтра шIыц апны хIара Лыхны кыт йаъу бжьакъвакI хIцата ацха агIархарджьра амадзаква гIахIхIырдыруаштI, арат Анчва йгIаныршара джьащахъву ащхаква тамамта ушырхьпшуашгьи тшазыгIбжьуштI.