Адунеизегьтәи
аԥсуа-абаза
конгресс

Адунеизегьтәи аҧсуа-абаза конгресси С. Ҷанба ихьӡ зху Аҧсуа драматә театри иацырҵоит апроект «Атеатр аҿы ахәылҧаз».
Ҳазҭоу аҵарашықәс ҿыц азы апроект рхы аладырхәит П. С. Шьаҟрыл ихьӡ зху Лыхнытәи абжьаратә школ аҵаҩцәа.
Актриса, Аҧсны Зҽаҧсазтәыз артист Елеонора Коӷониаҧҳа аекскурсиа мҩаҧылгеит - атеатр аҭоурых дазааҭгылеит, аҧсуа ҟазараҿы зышьҭа нзыжьыз аспектакльқәа дрылацәажәеит. Иара убасгьы ахәыҷқәа ирзеиҭалҳәеит артистцәеи егьырҭ атеатр аусуҩцәеи рџьабаа пату шақәҵатәу, ақәыргыламҭа арбараан ахымҩаҧгашьа ҷыда шаарҧштәу. Уи адагьы асасцәа атеатртә кулиса аҧсҭазаара ддырбеит, иреилдыркааит аспектакль ақәыргылашьа. Ахәылҧаз ахҭыс хада аҳасаб ала иддырбеит арежиссер Мадина Аргәын иқәлыргылаз аспектакль «Асду». Атеатр аҭаара хдыркәшеит акрыфарҭаҿы, уаҟа асасцәа ачеиџьыка рыдыргалеит.

Бзыҧтәи аҽырҩрҭаҿы имҩаҧысит «Аҧсны Ахада ихраҿа» агаразы аҽыбӷаҟазаратә еицлабра. Аҽыҩцәа еицлабуан еиуеиҧшым адистанциақәа рҿы, аҵәы дыршәуан, аҽылампыл иасуан.

Аҳамҭа хада анаҩсангьы аицлабраҿы ирзықәҧеит Аҧсны Актәи Аҩбатәи Ахадацәа рыхраҿақәа, Аҧсны Жәлар Рџьынџьтәылатә еибашьраан иҭахаз ргәалашәара иазку ахраҿа, хатәгәаҧхарала еибашьра иааз рҳамҭа. 1600 метра аҽқәа рырҩраҿы аҳамҭа ҷыда азҧнаҵәеит Адунеизегьтәи аҧсуа-абаза конгресс. Уи иҽаҧсеитәит Еврика Амч иақәтәаз аҽыбӷаҟаза Иури Кулинич. Аҽы аҧшәма – Инал Чхебелиа. Аҩбатәи аҭыҧ ааникылеит аҽы Аҧсны Индиго иақәтәаз Адам Шегушев. Аҽы аҧшәма – Феликс Қардаа. Ахҧатәи аҭыҧ иҽаҧсеитәит Аҧсны Мечта иақәтәаз Мирбек Мамуров. Аҧшәма – Саид Сақаниа. Аиааира згаз аҽцәа иранаршьеит ахраҿа, аҧаратә сертификатқәа, адырҧсақәа. 

«Аҧсны Ахада ихраҿа» агаразы аицлабраҿы аиааира агеит Ҭемыр Чхебелиа дзықәтәаз аҽы Дримлан. Аҧшәма – Иура Ҳагәышь.

Аусмҩаҧгатә аиҿкааҩцәа – Аҿар русқәеи аспорти рзы Аԥсны Аҳәынҭеилаки АА аҽыбӷаҟазаратә спорт Афедерациеи.

Жәытәнатә аахыс Аҧсны рнапы алакын ашьхааӡара. Уи аалыҵқәа рхы иадырхәон ауаажәлар рынхамҩеи рдоуҳатә ҧсҭазаареи рҿы. «Зыҧсы ҭоу аҟазара» аҭыжьымҭа ҿыц аҿы ҳазцоит Лыхны ақыҭа иҟоу ашьхагәара. Уаҟа ҳара еилаҳкаауеит ацхаҧшра амаӡақәеи ашьхақәа рааӡара иадҳәалоу акәама-ҵамарақәеи.