Лента событий ВААК
«Ирӡтәым»: Аҟәатәи абжьаратә школ № 5 аҵаҩцәа рзы имҩаҧыргеит аҧсуа маҭәа иазкыз алекциа
АААК агәыҧи Аҧснытәи аҳәынҭқарратә университет аҧсуа бызшәа акафедра арҵаҩы Инна Џьугелиаҧҳаи апроект «Ирӡтәым» аҳәаақәа ирҭагӡаны иацырҵоит арккаратә лекциақәа. Уажәазы ашколхәыҷқәа рҿаҧхьа дықәгылеит Аҧснытәи аҳәынҭқарратә музеи Аетнологиа аҟәша аҭҵаарадырратә усзуҩы еиҳабы Инга Шамҧҳа.
Аиҧылараҿы иалацәажәеит аҧсуа маҭәа. Шамҧҳа еиҭалҳәеит амилаҭтә маҭәа злашьақәгылоу, изладырҧшӡо аџьоуҳарқәа, урҭ рҵакы уҳәа.
Алекциақәа ирзыӡырҩуаз иаҳа игәныркыларц азы, Шамҧҳа ашколхәыҷқәа ирызналгеит амузеитә експонатқәа. Аҵаҩцәа ажәытә аҧсуа маҭәа ҭырҵааит, излашьақәгылоу ахәҭақәа рбеит.
Аиҧылара мҩаҧысит активтә диалог аформат ала. Аҵаҩцәа азҵаарақәа ҟарҵон, аҵыхәтәаны ирҳәеит аҳәынҭқарратә музеи аҭаара шыргәиҭоу.
АААК апресс-центр аҿы иалацәажәеит икоммерциатәым аиҿкаарақәа ацхыраара рыҭаразы аматериалтә ресурсқәеи ауааҧсыреи радгалара
Адунеизегьтәи аҧсуа-абаза конгресс Аҟәатәи аофис аҿы имҩаҧысит асоциалтә хықәкы змоу, зықәра ыҟоу ауааҧсыреи аинвалидцәеи ацхыраара рызҭо, иавтономтәу, икоммерциатәым аиҿкаара «Старость в радость» ахаҭарнакцәеи Аҧсны ауаажәларратә еиҿкаарақәеи реиҧылара.
Аиҿкаара «Старость в радость» анапхгаҩы, апаллиативтә психолог, аконфликтҭҵааҩ Татиана Василиева ицәырылгеит Урыстәылатәи апроект «Икоммерциатәым аиҿкаарақәа рҧызацәа рзы адгылара», икоммерциатәым аҧсуа еиҿкаарақәа рхаҭарнакцәа ирымалдеит УА еиуеиҧшым адгьылҿацәқәа рыҟнытә аҧышәа.
Аиҧылара аҳәаақәа ирҭагӡаны имҩаҧгаз амастер-класс аҟны еиҭарҳәеит апроектқәеи аиҿкаарақәеи адгылара рыҭаразы иақәнагоу афинанстә, аматериалтә, ауаҩытәыҩсатә цхыраара аҧшаашьа.
Аусмҩаҧгатә – апроект «Икоммерциатәым аиҿкаарақәа рҧызацәа рзы адгылара» иахәҭакуп. Уи хықәкыс иамоуп азанааҭтә лшарақәа рыҿиара, аусеицура аҩаӡара ашьҭыхра, икоммерциатәым аиҿкаарақәа рнапхгаҩцәеи аусуцәеи рус ргәахымшәартә еиҧш аҟаҵара. Аиҧылараан аидеиа ҿыцқәеи аҧышәеи еимырдеит.
Апроект алыршахеит УА Ахада игрантқәа рфонд абзоурала.
