Лента событий ВААК
Гвдауыта район йаланакIуа гIвапхьартакI йазалху цхърагIара райдзатI
АААК ашIыпIа хъвшара агIаджвыквцIарала Приморск аквтанай апхьарта апны апсуа бызшва акласс стенд шIыц гIвнадыргылтI. Ауаъа рыцIа йгIалхIвауа апсуа гIвгIвчви апхьахьакви рсуратква кIыдпI. ХIырзыразпI астенд хвыдъа йызчпаз Сельвян Владимир унашва зхъицIауа «Авантаж» реклама агентства.
Йазалху цхърагIара айдзатI Гвдауыта 5-хауа апхьартагьи: ауи макъым колонкали микрофонли йадыргалтI.
«ХъвлапныкI атеатр апны»: АААКи Апсуа драмтеатри апхьагIвчва рыхъазла апроект акIвдыршауаркIвитI
Адуней апсуа-абаза конгресси Чанба С. йыхьыз зхъу Апсуа къральыгIва драма театри йацдырхъйауа апроект «ХъвлапныкI атеатр апны» акIвдыршауаркIвитI. Ари азын ауи йгIаланадыркIтI Приморск 1-хауа аквтанай апхьарта апхьагIвчва.
Актриса, Апсны апны гIатгара зму ажурналист Когониа Элеонора атеатр апны экскурсия акIвлыршатI – ауи атурых йауу агIаншара джьащахъваква асабиква йралхIвтI, апсуаква разъазара апны щта пшдзата йгIанхаз рыцIа йгIалукгIушта йаъу аргвылчIвква дгIарыквчважватI. Ауи ацIайква йгIаргвынлыргIвытI артисткви атеатр анахьанат анхагIвчви ргIапсара хвы азыбара шатахъу, аспектакль ъадзацауа йщаквгылу аъадаб тшаквуыргIапсра шатахъу.
УацIыхъван апхьагIвчва асцена ащтахьла йыкIвырдашан атруппа йалакву йрабадыртI, аргылчIв агIаныршари артист йъачIвагIи йырпщылу джьащахъвара щарда рдыртI.
Ахъвлапын йагIаншара хъадата йалтI арежиссер Шамба Алхас йыргылыз «Мирандолина» спектакль апшра.
Атеатр апны амдара ацIыхъва йнадырдзауата ацIайква абуфет йдырцан хъагIата йдырчатI.
АААК «Ирӡтәым" проект архъйауаркIвитI
ЧкIвыныргIа йырзырхIарали физкультура тшауацIнарыхрали АААК ахъвшара АГУ апны апсуа бызшва акафедра арыпхьагIв Джьугелиа Инни АААК ЙхIаракIу асовет йалу апсуа этнолог Барцыц Марини йрыцта «Ирӡтәым» проектла айчважвара акIвдыршатI. Алекция Гулиа ДырмытI йыхьыз зхъу СогIвым 4-хауа апхьарта апны йадыргалтI. Ауи ззынархаз апсуаква ръадаб-намыс, йгIадзынгылуа чкIвыныргIа бжьара апны Апсуара амагIны акIвын.
АААК «Аимадара» проект акIвнаршауаркIвитI
АшIыпIа хъвшараква рыцынхарала Адуней апсуа-абаза конгресс ахъвшара «Аимадара» проект архъйауаркIвитI.
Йызкьазууыз амдара мшы йалан ПIапIаскьыр Иван йыхьыз зхъу Чхвартал аквтанай апхьарта апхьагIвчва. Ауат Афон ШIыц апны ПсырдзхIа станция, ахIатшпы йаъан, Мгвыдзырхва кыт апны «Апсны» этнопаркгьи йцатI. ЙшцIасхаз апш ауат ауаъа хрихыцла йхысырныс лшара раутI.
А-Конгресс агвып Чалмаз Мирон дзунашвачпагIву Афон ШIыц ахIатшпы анхагIвчва гвып амдара адгалра йъацхърагIаз ахъаз рразыра ажваква рзынадырхитI.
«Аимадара» проект чкIвыныргIа акультура йгьи атурых джьащахъвараква дырдырра йазынархапI. АдгалагIвчва йыргвыгъапI апхъахьылагьи ареспублика акытква йырту асабиква шIыцра щарда рдзырдыруа амдараква рзакIвдыршаларныс.
