Лента событий ВААК
Эгьзакь Мусса Трыквшти Сирии рпны адгьылцIсра зуагIа аладзыз ргвакъввпра рыцагIвишитI.
Эгьзакь Мусса Трыквшти Сирии рпны уагIа зладзыз, аларыхъвашараква гIазхъшахъыцIыз адгьылцIсраква рцIыхъватшараква рыхъазла йгвы шакъвпуа йхIватI:
«Трыквшта агIвадахь-марагIайырта апны йыншаз, 7,7 балл змаз адгьылцIсра Сирия аштаква Алеппо, Латакия, Хама, Тартус рпынгьи йнадзатI.
Сгвы йыцIалуата йсхIвитI ауат рызарар зквшваз хIабашталагIвчвагьи шрылу: агIгIвы хвырта радзатI, заджвы даладзтI. Ари ахабар йырцIабыргтI Трыквшта апны ахъвдаквцIараква абгата йызму Апсны рхIвачIвгIвы АгIвдза Ибрагим. Адгьаква йрыуата 12-гIв аладзтI, 28-гIвы хвхатI, ауат йрыуата жвагIвы хIатлапI.
Йаладзыз рцрикви раргванкви ргвакъвпра рыцагIвхIшитI, хвырта задзаз рзгIвадара ласыта йгIащаквгылхныс рзыхIтахъпI».
Гьыцба Инар Апсуафед аунашвачпагIв Махариа Мурат дйынйатI
Трыквшта нхара уысла даъата АААК архъйагIв секретарь Гьыцба Инар февраль а 5 Трыквшта йаъу Апсуа культура квтаква р-Федерация (Апсуафед) аунашвачпагIв Махариа Мурат дйынйатI. Анйара йалан Трыквшта апны ахъвдаквцIараква абгата йызму Апсны рхIвачIвгIвы АгIвдза Ибрагимгьи, Трыквшта ахьыла АААК ЙхIаракIу асовет йалу, репатриацияла акъральыгIва комитет аунашвачпагIв йтарагылыгIв Багателиа Астамургьи.
Анйара апны Адуней апсуа-абаза конгресси Апсуафеди рацынхара тшауацIнарыхра ауысла АААК ЙхIаракIу асовет аунашвачпагIв Эгьзакь Мусса ажвата йгIайгыз гватшныта йалапштI. Ауат агвгIанаграква Апсуа культура квтаква р-Федерация йылнахыз апроектквагьи гIарылахIахтI, ауат шдырхъйушла ахачIвква лархтI.
АААКи Апсуафеди руысхагIвчва ранйара акIвшатI Трыкв Республика апны
АААКи Апсуафеди рацынхара тшауацIнарыхрала ахачIвква рырхъйара апкъ йтата АААК архъйагIв секретарь Гьыцба Инар Апсуафед ауысхагIвчва дрынйатI. Анйара видеола йабабауата йалан АААК ЙхIаракIу асовет аунашвачпагIв Эгьзакь Мусси аунашвачпагIв йаппарат аунашвахъцIагIв Таниа Кани. Ажвлара уысхагIвчва райчважвара апны уыс щарда гIащтIырхтI, ауи апшта АААКи Апсуафеди рацынхара рыцIа джьгарта тшауацIнарыхра ауысла ауи апхъала ажвата йгIаргхьаз йрылачважватI. Анйара Сакарйа апны шIыцта йдыргылыз Апсуа культура квта атдзы апны йакIвшатI. Атдзы апсуа-абаза диаспора йаларпсаз, АААК ЙхIаракIу асовет аунашвачпагIвгьи йалайцIаз ахчала йдыргылтI.
