Лента событий ВААК
Мусса Егзакь Ҭырқәтәылеи Шьамтәылеи адгьылҵысраан ауаа рацәа рҭахара инамаданы адышшылара ҟаиҵеит.
АААК Иреиҳаӡоу ахеилак ахантәаҩы Мусса Егзакь адышшылара ҟаиҵеит Ҭырқәтәылеи Шьамтәылеи иҟалаз адгьылҵысрақәа ирыхҟьаны зықьҩыла ауаа ахьҭахаз инадҳәаланы.
"Змагнитуда 7,7 инаӡоз адгьылҵысра ӷәӷәақәа ҟалеит Ҭырқәтәыла алада-мраҭашәаратәи ахәҭаҿы, иагьамҽханакит Шьамтәылатәи апровинциақәа Алеппо, Латакии, Хама, Тартус.
Ааха зауз ауаа рхыԥхьаӡараҿы иҟоуп ҳара ҳџьынџьуаагьы: ааҩык ахәрақәа роуит, аӡәы лыԥсҭазаара далҵит. Ари адырра шьақәирӷәӷәеит Ҭырқәтәыла иҟоу Аԥсны азинмчра нагӡа змоу ахаҭарнак Ибрагим Аҩӡба. Адыгаа рахьтә 12-ҩык ҭахеит, 28-ҩык хәуп, 10-ҩык рҭагылазаашьа цәгьоуп.
Иҭахаз рыуацәеи рҭынхацәеи ҳрыдышшылоит, ааха зауз лассы ргәы бзиахааит!"
Инар Гыцба Аԥсуафед ахантәаҩы Мураҭ Махариа диԥылеит.
АААК ауснагӡаратә маӡаныҟәгаҩ Ҭырқәтәылаҟа иусуратә ныҟәара аҳәаақәа ирҭагӡаны жәабран 5 рзы Аԥсуа культуратә хеидкылақәа рфедерациа ахантәаҩы Мураҭ Махариа диԥылеит. Аиԥылара иалахәын иара убас Ҭырқәтәыла иҟоу азинмчра нагӡа змоу Аԥсны ахаҭарнак Ибрагим Аҩӡбеи Ҭырқәтәылантә АААК Иреиҳаӡоу ахеилак алахәцәеи, Аҭоурыхтә ԥсадгьыл ахь архынҳәразы аҳәынҭқарратә еилакы ахантәаҩы ихаҭыԥуаҩ Асҭамыр Багаҭелиеи.
Аицәажәара иалагӡаны Аконгресс Иреиҳаӡоу ахеилак ахантәаҩы Мусса Егзакь иажәалагалақәа ирыхәаԥшит, АААКи Аԥсуафеди русеицура арҭбаара иазкны. Арҭ ажәалагақәа хадырҭәааит Аԥсуафед заанаҵ еиқәнаршәаз апроектқәа рыла, урҭ рынагӡашьа амҩақәагьы азылхуп.
Адунеизегьтәи аԥсуа-абаза конгресс аусзуҩцәеи Аԥсуафед ахаҭарнакцәеи реиԥылара мҩаԥысит Ҭырқәтәыла.
Аконгресси Аԥсуафеди русеицура арҭбаара хықәкыс иҟаҵаны АААК ауснагӡаратә маӡаныҟәгаҩ Инар Гыцбеи Аԥсуафед ахаҭарнакцәеи реиԥылара мҩаԥысит. Авидео еимадарала ари аицәажәара рхы аладырхәит АААК Иреиҳаӡоу ахеилак ахантәаҩы Мусса Егзакьи АААК Аппарат анапхгаҩы Кан Ҭаниеи. Ирылацәажәеит азҵаарақәа жәпакы, хаҭалагьы аҩ-еиҿкаарак русеицура еиҳагьы изырҿиаша апроектқәа рынагӡара. Аиԥылара мҩаԥысит Сақариа иаатыз Аԥсуа культуратә хеидкыла ахыбра ҿыц аҟны. Ари ахыбра ргылан аԥсуа-абаза диаспора ахаҭарнакцәа ргәыҳалалратә хәҭалагала ахарџьала, АААК Иреиҳаӡоу ахеилак ахантәаҩы Мусса Егзакьгьы уахь дналаҵаны.
