Лента событий ВААК
АААК Бзыб апхьарта апны театр гвып агIаныршара ахчала йацхърагIатI.
Бзыб йапхъахауа аквтанай апхьарта апны актер азъазара йъазырбжьауа акружок йдрыхIазырыз аргылчIв гIадырбатI. Акружок анхара адгалра Адуней апсуа-абаза конгресс ацхърагIатI. https://abaza.org/abq/1128
А-Конгресс агвып Бзыб йапхъахауа аквтанай апхьарта амузей йаъан.
Бзыб йапхъахауа аквтанай апхьарта аунашвачпагIвчва йдрайгван Адуней апсуа-абаза конгресс анхагIвчва ауи амузей йцатI. Амузей асквш 2023 йгIашIарышвта йынхитI.
Ауи атурых йапшым агIамтаква йырзалху пщпещкI йнадзитI: асквшква 1992-1993 рагIан йакIвшаз Апсны ауагIа р-Абашта айсра апещ, асквшква 1941-1945 рагIан йакIвшаз Абашта айсра Ду апещ, асквш 1937 агIан арепрессияква йрылашвази щтадъа йыдзызи рпещ йгьи аштадырра апещ. Апещква уызларызцауа абидоль аурала Апсны а 17 баракъкI алагылапI. Аныпква штшырпсахуазла хI-Псадгьыл гIаншара щардала йырчвыз атурых уыла йуызгIацIажьитI. Апещква рпны амдараква апхьагIвчва рцри бызшвала йакIвдыршитI.
Апхьарта амузей дырра щарда уызгIалкIгIушта алшараква дупI. Апсадгьыл, ауи атурых, цри бызшва йырзынарху абзибара – йгIадзынгылуа чкIвыныргIа патриотта йубжьарныс, идеология нхара рыцакIвуыршарныс ахъазла уызгIвымсхыз швапхапI.
Апсуа спортсменква Россия ауацIала хвитта абакIрала IХ анкъвакъвра апны йайгIайтI.
СССР йачемпионыз Радионов Владимир йхъмаштылгата йакIвшаз Россия ауацIала хвитта абакIрала IХ анкъвакъвра апны аспортсменква Герзмава Алани Аристава Леониди айгIайра гIатыргатI, Кархалава Дамей джьаз согIа гIайынхатI. Анкъвакъвра декабрь а 9-10 агIан Санкт-Петербург апны йакIвшатI. Ауи Россия (Амур, Ленинград йгьи Москва областква, Краснодар йгьи Ставрополь крайква, Карелия Республика, Калининград, Москва йгьи Санкт-Петербург къалаква), Беларусь, Армения, Апсны йрыуата спортсмен 180-гIв алан. Апсуа спортсменква рбжьитI Берая Игорь, Цвейба Адам, Алабян Размик йгьи Лазба Дауыт.
«Апсуара амгIващквала» абаркIыра: Атара, Лащкьындар, Кындыг кытква рпны йакIвшаз айззараква.
АгIатраква рабаркIыра «Апсуара амгIващквала» апкъ йтата ажурналист Бебиа Екатерина Атара, Лащкьындар, Кындыг кытква рпны «Апсуара» йазынархаз айззараква шакIвшаз гIалырбитI. Асквш 2009 агIан йанырцIатI. https://abaza.org/abq/1102
Апсуа-абаза уагIахъа йгIарылцIыз йбергьльу агIвычIвгIвысква йырхIвата «пхьынцIыгIва гIазшI.алыз» ажваква.
Эгьзакь Мусса запш аъам азъазара апкъыгIваква Эрмитаж согIата йрыйттI
Къарча-Черкес Республика АуагIа Райззара аунашвачпагIв йтарагылыгIв Эгьзакь Мусса Эрмитаж музей азъазара пкъыгIвата хвба рыйттI: ауат асланец квайчIва йгIалчву Россия апаштыхIква рсуратква зну, гIвба-гIвбата йалу джыпхапI. Ужвы ауат Эрмитаж, Георгий пещ апны апшыгIвчва йддырбарныс йгIаквырцIатI, январь а 14-дза ауаъа йнашылквауа ауат йырпшырныс рылшуштI.
Эрмитаж аъачIвагIагIвчва йшырхIвауала, асквш 2023 ауацIа рыцIа хвы зму согIата йгIарыртыз ари акIвпI. Амузей адиректор хъада Пиотровский Михаил йгIвыз аразыра швъа апны йгIарыртыз аджыпхаква амузей азкIкIраква рпны йумауаш йшпкъыгIву дацIачIвагъватI. Ауи Мусса ХIабальа йпа асогIа ахъазла дйызхIвахIвтI, Эрмитажи йари апызщылуа айгвара азазаъащаква хвы шырзибауа, амузей йазалихуа агватра хвду шаквицIауа гIаликIгIатI.
Къарча-Черкеси Санкт-Петербурги щарда цIуата йащтаныкъвитI, ауат азазаъащаква КъЧР Ахъада Темрезов Рашид йацкIрала рыцIа-рыцIа йбагъьахитI. Ауи апшта, асквш 2023 апрель агIан КъЧР а-Парламенти Санкт-Петербург Хабзалыхрала Айззари йапшым анархараквала йацынхарныс ангIалра мачвы ацIарцIатI. Щардата йацадыргаллауа анйараква, алалраква, акцияква рбзирала ацынхара йашIамсуа тшауацIнахитI. Азъазара апкъыгIваква ъарыртызгьи – ауат йрапшу магIын ду зму ауысква йрыуазакIыпI.
Эгьзакь Мусса йшихIвазла, ауат апкъыгIваква амузей йрыйтныс йзаквикIыз акъраль агвбайара тынха агIащаквыжьра йкъару алайцIара йтахъыпIта акIвпI: «Багъьата йхъасцIитI амузей апны арат аджыпхаква дырра уыслагьи, культура уыслагьи хвыта йрыму йшалахIуш. ЙайхIатагьи йсхIвапIта, арат артефактква хIацзакIыри йхIзацалу хIтурыхи йыргIарбагахуштI. ЗапшгIамтазлакIгьи азъазари акультури амажаква йырхъысуа, йхIзацалу хIтурых йгьи хIкультура тынха ахъазла хIхъа дырдууа, ауат бзи йхIдырбауамца ауагIа адыркIылитI. Ари азкIкIра амузей йрыстуата кьангьаш гьазгIазгуам ауи ауагIа гвышхвара шрыланацIуш, рпсадгьыл бзи йшднарбуш».
Анхараква апхъанчIви заман агIан йгIадрысабапуаз контррельеф гравюра ргIапсщала йчпапI. Ауи апш амальла Месопотамии АпхъанчIви Мсыри рпны арыпшдзагаква, ахча жвгъайква, адуаква рчпун. Агравюраква йапшым ахIахъвква рпны йтырхуанта айхала йгIатдрышвтхуан.
УахьчIва ауи амаль гьгIадрысабапхуам. Адуней апны ауи йазычпу гIвычIвгIвыс напIъазата йаъаху 15-гIвкI йгьрайхIам.
Россия апны контррельеф ргIапсща гIазрысабапуата йаъу асуратчпагIв-гравер Нуждин ВладимирзаджвыкI йакIвпI.
АсогIаква йгьахъазрыпшдзагам – Россия атурых узыгIахъызтIуа хъышвпI. Агравюраква Альпщхъаква рпны йаъу асланец йгIалхпI, атараква арасацIла йгIалхпI. Агравюраква йрылапI Россия рпаштыхI Александр I йсурат гIазырбауа гIвджыпхакI, апаштыхIква Павел I, Екатерина II, Николай I ргравюраква.
Ауи апхъала, асквш 2017 агIан Эгьзакь Мусса Санкт-Петербург йаъу Суворов ймузей кIьанджь 2500 райхIа йнадзауа олово йгIалху айсчва разкIкIра согIата йрыйттI. Ауат шIыцта йгIандыршаз, Россия апны йзакIзаджвыкIу олово йгIалху айсчва рмузей афонд йаларцIатI.
