Лента событий ВААК
Аконгресс агәыҧ Бзыҧтәи абжьаратә школ №1 амузеи иаҭааит.
Адунеизегьтәи аҧсуа-абаза конгресс аусзуҩцәа Бзыҧтәи абжьаратә школ №1 анапхгара иҟарҵаз ааҧхьарала ашколтә музеи иаҭааит.
Амузеи аус ауеит 2023 шықәса инаркны. Уи шьақәгылоуп ҧшь-уадак рыла. Уаҟа ицәыргоуп еиуеиҧшым аҭоурыхтә аамҭақәа зныҧшуа аекспонатқәа. Уахь иаҵанакуеит: 1992-1993 шықәсқәа рзтәи Аҧсны жәлар рџьынџьтәылатә еибашьра иазку ауада, 1941-1945 шықәсқәа рзтәи Аџьынџьтәылатә еибашьра Ду иазку ауада, 1937 шықәсазы арепрессиа иақәыршәази, хабарда ибжьаӡызи ирызку ауада, атәылаҿацәҭҵааратә музеи. Азалқәа рахь инагоу ауадабжьараҿы Аҧсны абираҟқәа 17 ықәыргылоуп. Абираҟқәа рҽыҧсахшьа – Ҳаҧсадгьыл знысыз, хҭысла ибеиоу аҭоурыхтә мҩа ҳнарбоит. Азалқәа рҿы рхатәы бызшәала аекскурсиа мҩаҧыргоит ашколхәыҷқәа рхаҭа.
Ашколтә музеи крызҵазкуа арҵаратә лшара амоуп. Аҧсадгьыли, уи аҭоурыхи, ахатәы бызшәеи рахь абзиабара – изызҳауа абиҧара апатриотизм арылааӡареи, аидеологиатә усура амҩаҧгареи рзы ҿырҧштәы заманоуп.
Аԥсуа спортсменцәа зхы иақәиҭу аиқәԥаразы IX Урыстәылазегьтәи атурнир аҟны аԥхьахә ҭыԥқәа ааныркылеит.
Ԥхынҷкәын 9-10 рзы Санкт-Петербург имҩаԥысит Асовет Еидгыла ачемпион Владимир Родионов игәалашәара иазкыз зхы иақәиҭу аиқәԥаразы IX Урыстәылазегьтәи атурнир. Уи иалахәыз аԥсуа қәԥаҩцәа Алан Гьерзмааи Леонид Арсҭааи аиааирақәа ргеит, Дамеи Кархалаа араӡны даԥсахеит. Атурнир зынӡа рхы аладырхәит 180-ҩык аспортсменцәа Урыстәылантә (Амуртәи, Ленинградтәи, Москватәи аобластқәеи, Краснодартәи, Ставропольтәи атәылаҿацәқәеи, Карелиеи, ақалақьқәа Калининграда, Москва, Санкт-Петербург), Беларусиантә, Ермантәылантә, Аԥснынтә. Аԥсуа спортсменцәа азыҟарҵоит Игор Бераиа, Адам Цәеиба, Размик Алабиан, Дауҭ Лазба.
«Аԥсуара амҩахәасҭақәа» рцикл: Аҭара, Лашькьандар, Кындаӷ имҩаҧгаз аизарақәа.
Ажурналист Екатерина Бебиа лавтортә программа «Аҧсуара амҩахәасҭақәа» рцикл аҟны иаҳбоит аҧсуара атема иазкны ақыҭақәа Аҭара, Лашькьандар, Кындыӷ имҩаҧгаз аизарақәа. Анҵамҭа ҟаҵан 2009 шықәсазы. https://abaza.org/abk/1102
