Адунеизегьтәи аԥсуа-абаза конгресси Аԥсуа культуратә хеидкылақәа рфедерациеи рнапхгаҩцәа Сҭамԥыл еиԥылеит, русеицура азҵаарақәа ирылацәажәарц, рнпақәагьы аҵарҩит Аусеицуразы аԥкаанҵа.
Саид Барганџьиа
Адунеизегьтәи аԥсуа-абаза конгресси Аԥсуа культуратә хеидкылақәа рфедерациеи (Аԥсуафед) рнапхгаҩцәа ашәахьаҽны Сҭамԥыл ақалақь аҿы рнапы аҵарҩит аусеицуреи аицхыраареи рзы аԥкаанҵа ҳәа адырра ҟаиҵеит АААК анагӡаратә маӡаныҟәгаҩ Инар Гыцба.
Иара еиҭеиҳәеит аиқәшаҳаҭрақәа ишрыҵаркуа раԥхьаӡа иргыланы аиуратә еимадарақәа реиҭашьақәыргылареи, Ҭырқәтәыла иҟоу аԥсуа-абаза диаспореи рҭоурыхтә ԥсадгьыли реимадара арӷәӷәареи.
«Аусура мҩаԥгахоит аетнокультуратә акзаара аиҭаиреи, аԥсуа-абаза, аубых жәларқәа рмилаҭтә хаҿреи, рҵас-қьабзқәеи реиқәырхареи рганахьала», – ҳәа азгәеиҭеит Гыцба.
Аконгресс Иреиҳаӡоу ахеилак ахантәаҩы Мусса Егзакь АААК аинфопортал иаиҭаз ахҳәааҿы иазгәеиҭеит аиԥылараҿы ишалыршаз аҩ-еиҿкаарак рыбжьара аусеицуразы аплан ашьақәыргылара.
«Ҳаидгыланы, хаицхырааны аус еицаҳаулоит ҳдиаспора рхаҭарнакцәа ахьынхо ақыҭақәа еиҳа-еиҳа ирацәаны иҳамҽхаҳкырц. Сара сақәгәыӷуеит, аамҭа цацыԥхьаӡа ҳаизыҟазаашьақәа еиҳагьы иӷәӷәахалап ҳәа. Ҳара зегьы ҭаацәара дук реиԥш ҳаидгыланы, ҳусқәа рҿы ақәҿиара шҳауа агәра ҳгоит», – ҳәа азгәеиҭеит Егзакь.
Аԥсуафед ахаҭарнакцәа ракәзаргьы, агәра ргоит Аконгресси дареи русеицура алҵшәа бзиақәа шаанашьҭуа аетнокультуратә ҭынха ахьчараҿы.
«Аԥсуа-абаза жәлар рхаҭарнакцәа ҳахьыҟазаалакгьы, ҳкультуреи, ҳҵасқәеи, хбызшәеи еиқәҳархароуп. Абри азҵаараҿы Адунеизегьтәи аԥсуа-абаза конгресси ҳареи ҳажәҩахырқәа еибыҭаны аус еицаҳуп ҳәа ҳақәгәыӷуеит», – ҳәа азгәеиҭеит Ҭырқәтәыла иҟоу аԥсуа культуратә хеидкылақәа рфедерациа ахантәаҩы Аҭанур Аҟәысба.
Адунеизегьтәи аԥсуа-абаза конгресс аделегациа Ҭырқәтәыла иаҭааит жьҭаара 21 азы. Аусуратә аҭаара мҩаԥысуеит жьҭаара 25 рҟынӡа. Ари аамҭа иалагӡаны иазԥхьагәаҭоуп Аконгресси адиаспоратә еиҿкаарақәеи рыбжьара аусеицуразы инарҭбаау апланқәа рышьақәыргылара.
Иара убасгьы иазԥхьагәаҭоуп Ҭырқәтәыла аҵакырадгьыл аҿы Аконгресс асистематә еилазаашьа ашьақәыргылареи, АААК Ҭырқәтәыла иахьаҵанакуа имҩаԥнаго аусура апланқәа ралкаареи.
Пути сближения друг к другу и есть основа укрепления диаспоры , респект всем ✋.
шәҭалароуп, ма шәыҽҭажәыҩроуп.