Аԥсны 29.09.2020 10:55 9674

Аԥсны Аџьынџьтәылатә еибашьраан иҭахаз Аҭара аҵеицәа ирызкны абаҟа аадыртит Аиааира амш 27 шықәса ахыҵра аламҭалазы.

Зыԥсадгьыл зхы ақәызҵаз Аҭара ақыҭа иалҵыз аҷкәынцәа рбаҟа аадыртит 1992–1993 шықәсқәа рзтәи Аԥсны Аџьынџьтәылатә еибашьраҿы Аиааира амш 27 шықәса ахыҵра аламҭалазы. Амемориал дыргылеит амеценатцәеи еиуеиԥшым аилазаарақәеи рԥарала, Адунеизегьтәи аԥсуа-абаза конгрессгьы уахь иналаҵаны.

АААК Иреиҳаӡоу ахеилак ахантәаҩы Мусса Егзакь иазгәеиҭеит аибашьрашьҭахьтәи Аԥсны абиԥарақәа ируалԥшьоуп ҳәа «зыԥсадгьыл ахьчараз игылаз ҳашьцәа рфырхаҵареи ргәымшәареи ахаан хашҭра рықәымзарц аҟаҵара, аҳәаанырцә харантә иааз ҳџьынџьуаагьы уахь иналаҵаны».

«Аҭара иргылоу абаҟа, ҳхақәиҭра зхы ақәызҵаз афырхацәа ирызку егьырҭ абаҟақәа реиԥш, агәымшәареи аԥсадгьыл азыгәдуреи ирсимволуп. 1992–1993 шықәсқәа рзтәи Аԥсны Аџьынџьтәылатә еибашьра ахҭысқәа ирыдҳәалоу абаҟақәеи аҭоурыхтә ҭыԥқәеи рыхьчареи рхылаԥшреи – ихадараӡоу аусқәа ируакуп ҳәа азысыԥхьаӡоит», – иҳәеит Егзакь.

Амемориал ргылоуп араҟа уаанӡа иҟаз абаҟа аҭыԥан. Абасала, араҟа амемориалтә комплекс ҿыц ҟалеит.

«Иҭабуп ҳәа расҳәарц сҭахуп абаҟа аиҭашьақәыргылара иалахәыз зегьы. Аԥсны жәлар аҭынчреи амшхәыбзазареи рымазааит!» – иҳәеит АААК Иреиҳаӡоу ахеилак ахантәаҩы.

Абаҟа аргылареи уи азы аԥареизгареи активла далахәын Аҭара иҟоу АААК Аҭыԥантәи аҟәша анапхгаҩы Алхас Кәыҵниа. Иара иҳәеит абаҟа аргыларазы аԥара маҷымкәа ишаларҵаз Аҭара иалҵыз ауааԥсыра. Кәыҵниа иазгәеиҭеит абаҟа аргылара ақыҭа зегь алахәын ҳәа.

«Хымз раахыс, уахынлеи-ҽынлеи ҳәа еилых ҟамҵакәа, аргыларатә усурақәа цон. Аргылаҩцәа иаарывымшәо ирывагылан аҭыԥантәи ауааԥсыра, еиҳаракгьы аҿар. Доусы илшоз ала дыцхыраауан. Иҭабуп ҳәа раҳҳәоит абри аус згәы азыбылуаз, иҭахаз ҳҵеицәа рзы абаҟа аргылара зыхәҭаа алазҵаз зегьы», – иҳәеит иара.

Абаҟа аартрахь иааит атәыла аиҳабыра, Аԥсны ахада Аслан Бжьаниа аԥхьа днаргыланы, иара убас иҭахаз аибашьцәа ранацәа, ауаажәларра рхаҭарнакцәа, ақыҭа анхацәа, насгьы ҳәарада, Аԥсны Аџьынџьтәылатә еибашьра аветеранцәа.

Абар урҭ еиҭарҳәаз аҭоурыхқәа руак. Аишьцәа Риади Фариди Арыҩҭаа Шьамтәылантә Аԥсныҟа иааит аибашьра алагара ԥшьымз шагыз. Аҩыџьагьы рабдуцәа злыҵыз ршьамдгьыл аҟны анхара иазгәышьуан. Аҩыџьагьы араҟа аибашьра иақәшәеит. Аиҵбы Риад усҟан 28 шықәса ихыҵуан, аиҳабы Фарид – 41 шықәса. Лакҩакрак ҟамҵакәа рыԥсадгьыл ахьчара иазгылеит аишьцәа. Фарид дҭахеит 1993 шықәса хәажәкыра 16 рзы, Аҭара ақыҭан. Риад аибашьра зегьы дагәылсит, Леон иорден ианашьоуп (аорден шьаҭаркын ԥхынҷкәын 4, 1992 шықәсазы, Аԥсны ахьчараан иаарԥшыз афырхаҵареи, агәымшәареи, ахамшаҭареи рзы – аред.). Аибашьра анеилга Шьамтәылаҟа дгьежьит, аха иԥсадгьыл агәеисыбжь ӷәӷәан, уи абжьы иаҳауан: 2012 шықәсазы ҩаԥхьа Аԥсныҟа дааит, уи нахыс ара дыҟоуп, иҩ-ԥацәеи иԥҳаи ирызҳауеит.

Риад Арыҩҭаа абаҟа аартрахь дааит ицеибашьуаз ахацәа дрыцны.

«Ари амш даара акраҵанакуеит ҳара ҳзы. Иазааԥсаз зегьы иҭабуп ҳәа расҳәоит», - иҳәеит аветеран.

Аԥсны Аџьынџьтәылатә еибашьраан иҭахаз аҵеицәа рбаҟақәа ҳтәылаҿы акырџьара игылоуп. Есышықәса акрызҵазкуа арыцхәақәа раан Аԥсны ауааԥсыреи, иаҳзаауа асасцәеи арҭ абаҟақәа ирҭаауеит, ашәҭшьыҵәрақәа шьҭарҵоит, иҭахаз афырхацәа ргәаладыршәоит.