АААК Ахантәаҩы Мусса Егзакь ихраҿа агаразы зхы иақәиҭу аиқәԥара атурнир алахәразы Аԥсны иаҭааит Урыстәыла еиуеиԥшым арегинқәа рҟынтә аспортсменцәа.
Саид Барганџьиа
Жьҭаара 16 рзы иалаго акультуратә-спорттә фестиваль «Абаза» аҳәаақәа ирҭагӡаны имҩаԥысуа Адунеизегьтәи аԥсуа-абаза конгресс Иреиҳаӡоу Ахеилак ахантәаҩы Мусса Егзакь ихраҿа агаразы зхы иақәиҭу аиқәԥара атурнир алахәцәа Аԥсныҟа иааит.
Зхы иақәиҭу аиқәԥаразы аклуб «Абаза» ауснагӡаратә директор Леонид Боџьгәуа еиҭеиҳәеит, сынтәа атурнир рхы шаладырхәуа аспортсменцәа ақалақьқәа Москва, Санкт-Петербург, Ростов, Краснодар, Калининград, Шәача рҟынтә, иара убас атәылақәа Ҟарачы-Черқьесиа, Ҟабарда-Балкариа, Нхыҵи Аахыҵи Уаԥстәыла, Ингәыштәыла, Даӷьсҭан рҟынтә, Аԥсны ақалақьқәа зегьы рҟынтә ақәԥаҩцәа.
«Атурнир амҩаԥгаразы зегь хианы иҟоуп. Аспортсменцәа ҳкапанит. Ақәратә категориақәа ҩба ҟалоит: 15-16 шықәса зхыҵуа, 17-18 шықәса зхыҵуа. Иааидкыланы ҩышәҩык рҟынӡа аспортсменцәа ҟалоит», – иҳәеит Боџьгәуа.
Жьҭаара 15 – иааираны иҟоу афестиваль апрограммаҿы иарбоуп «атехникатә» мышны: аицлабра алахәцәа раареи, хаз-хазы рнырхареи иазкуп. Еиуеиԥшым ақалақьқәа рҟынтә иааз арԥарацәеи урҭ разыҟаҵаҩцәеи шааиз еиԥшҵәҟьа зегь раԥхьаӡа иргыланы асасааирҭахь идәықәлеит, уаҟа иааҭгыланы ирзыԥшу атурнир аламҭалазы рыԥсы ршьарц. Раԥхьаҟа макьана ирзыԥшуп аҽазыҟаҵарақәа, акрызҵазкуа абжьгарақәа. АААК акорреспондент зегь акоуп акомандақәа хыма-ԥсыма рацәажәара дахьӡеит.
Даӷьсҭантәи акоманда азыҟаҵаҩ Мурад Ахмадудинов еиҭеиҳәеит аицлабрахь ааҩык аспортсменцәа шааигаз. Урҭ рахьтә аӡәырҩы раԥхьаӡа акәны Аԥсны иаҭааит.
«Сара ари атурнир аҩынтә раан салахәуп. Атурнир ахаҭа шазырхиоу аҩаӡареи, дара аспортсменцәа разыҟаҵашьеи ахәшьара ҳаракы асҭоит. Ақәԥаҩцәа рзы ари ԥышәа бзиаӡоуп», – ҳәа азгәеиҭеит азыҟаҵаҩ.
Даӷьсҭантәи акоманда дахәҭакны Мусса Егзакь ихраҿа агара дазықәԥоит 16 шықәса зхыҵуа Магомед Магомедаминов. Арԥыс ақәԥара далоуп аа-шықәса анихыҵуаз инаркны, аха Аԥсныҟа уажәаԥхьа дмаацызт.
«Атурнир аӡбахә саҳахьан, ҳәарада, уаанӡагьы. Арахь сҩызцәа аахьан, иагьеиҭарҳәон ацлабцәа ӷәӷәақәа шыҟоу», – иҳәеит ақәԥаҩ қәыԥш.
Атурнир ахь испортсмен дааигеит Краснодартәи азыҟаҵаҩ Магомед Исмаиловгьы.
«Аԥсны аспорттә еицлабрақәа еснагь ҩаӡара ҳаракыла имҩаԥысуеит, ҳара аспортсменцәа ҳзы урҭ рылахәра – ҳаҭыр дууп», – иҳәеит иара.
Ҟарачы-Черқьесиантә 13-ҩык ақәԥаҩцәа ааит. Урҭ разыҟаҵаҩ Расул Чыкәа еиҭеиҳәеит ари атурнир ахынтә раан дшалахәу.
«Атурнир алахәцәа ахьынӡазыҟаҵоу атәы ҳалацәажәозар, урҭ бзианы иазыҟаҵоуп. Атурнир амҩаԥгашьа аҩаӡарагьы ажәак узазҳәом, зегь рыла ихазыноуп. Аха, ҳәара аҭахума, ҳабзиоуп ҳәа угәы рҭынчны утәар ҟалаӡом, есышықәса еиҳа-еиҳа уеиӷьхозароуп», – ҳәа иԥхьаӡоит иара.
Адунеизегьтәи аԥсуа-абаза конгресс Иреихаӡоу ахеилак ахантәаҩы Мусса Егзакь ихраҿа агаразы зхы иақәиҭу аиқәԥара атурнир Аԥсны аантә раан имҩаԥысуеит. Сынтәа иара мҩаԥысуеит акультуратә-спорттә фестиваль «Абаза» аҳәаақәа ирҭагӡаны, ҩымш, жьҭаара 16-17 рзы, Гәдоуҭа ақалақь иҟоу ахәыҷқәеи ақәыԥшцәеи рыспорттә школ аҟны. Атурнир иахәаԥшыр рылшоит изҭаху зегьы. Аҭаара хәыда-ԥсадоуп.
шәҭалароуп, ма шәыҽҭажәыҩроуп.