Ажәабжьқәа 09.12.2019 11:50 33988

Адунеизегьтәи аԥсуа-абаза конгресс иамоу арегионалтә ҟәшақәа рхыԥхьаӡара иацлеит Британиа Ду иаарту аҟәша ҿыц.

Саид Барганџьиа

Адунеизегьтәи аԥсуа-абаза конгресс арегионалтә ҟәша аартуп Бриатниа Ду аҳҭнықалақь Лондон, АААК Иреиҳаӡоу ахеилак ахантәаҩы Мусса Егзакь инапынҵа инақәыршәаны.  Абри атәы ааицҳаит АААК Иреиҳӡоу ахеилак алахәыла Виачеслав Чрыгба. Иара Еиду акралрахь иусура аҭаара иалагӡаны дырԥылеит Лондон иҟоу аԥсуа-абаза диаспора рхаҭарнакцәа, асабша, ԥхынҷкәын 7 рзы.

Чрыгба иажәақәа рыла, аиԥылара иалахәын 15-ҩык рҟынӡа ҳауаажәлар рхаҭарнакцәа. «Ҳара ҳалацәажәеит Лондон иаарту АААК арегионалтә ҟәша аусура, аҿар рабиԥара рҭоурыхтә ԥсадгьыли рмилаҭтә культуреи ргәы азыбылуа рааӡара, иара убас аԥсуа культуратәи аҵаратәи усбарҭақәеи адиаспореи русеицура арҭбаара, АААК аилазаара ҿыц аусушьеи ԥхьаҟатәи агәҭакқәеи», - ҳәа еиҭеиҳәеит Виачеслав Чрыгба.

АААК Иреиҳӡоу ахеилак алахәыла адырра ҟаиҵеит, аиԥылара иалахәыз зегьы, ишаԥу еиԥш, Аконгресс алаларазы анкетақәа шрыдгалаз. Чрыгба аиԥылараҿы ирзеиҭеиҳәеит анкетақәа рхарҭәаара шалшо АААК аинфопортал аҟынгьы.

Иара иазгәеиҭеит аиԥылара «иԥханы, аиашьаратә ҟазшьа аманы» ишымҩаԥысыз.

«Ҳара ҳаицәажәара аԥсышәалеи англыз бызшәалеи имҩаԥысуан. Иҳарҭон азҵаарақәа Аԥсны иҟоу асоциалтә-економикатә ҭагылазаашьа иазкны, АААК аусура иазкны, адиаспора аҽамадаразы аҭакԥхықәра зду аструктурақәа русушьа иазкны. Иазгәаҭан акырӡа шаҵанакуа Аԥсныи Аконгресси рхаҭарнакцәеи араатәи адиаспореи аамҭа-аамҭалатәи реиԥыларақәа рымҩаԥгара», - ҳәа еиҭеиҳәеит АААК Иреиҳаӡоу ахеилак алахәыла.

Виачеслав Чрыгба Британиа Ду дыҟоуп планла иазгәаҭоу аусуратә ныҟәара аҳәаақәа ирҭагӡаны. Хара имгакәа аиԥш зеиԥшу аиԥыларақәа мҩаԥысраны иҟоуп Голландеи Германиеи инхо аԥсуа-абаза диаспорақәа рҟынгьы.

Лондон иаарту АААК аҟәша хыԥхьаӡарала иаабатәихеит. Аконгресс арегионалтә ҟәшақәа аартуп, аусгьы руеит Аԥсны, Ҟабарда-Балкариа, Ҟарачы-Черқьесиа, Ҭырқәтәыла, Ставрополие, Москва, Санкт-Петербург. Уажәазы азырхиара иаҿуп Иорданиеи Египети арегионалтә ҟәшақәа раартра. Ааигәа арегионалтә ҟәшақәа раартра азԥхьагәаҭоуп иара убасгьы Германиеи, Бельгиеи, Голландиеи, Шьамтәылеи уҳәа аԥсуа-абаза диаспора ахьынхо егьырҭ атәылақәеи рыҟны.