Ауааԥсыра акоронавирус рацәыхьчаразы аоперативтә штаб иаланарҵәеит Афинансқәа рминистр ивидеоааԥхьара, уаҟа иара адырра ҟаиҵоит атәылаҿы Аҭагылазаашьа ҷыда шалагалоугьы ауааԥсыра руалафахәқәеи рсоциалтә цхыраагӡақәеи еиԥҟьарада ишырзыршәало.
Акоронавирустә ҿкы аламырҵәаразы Аԥсны еиуеиԥшым аԥкрақәа шалагалоугьы, ауаа руалафахәқәеи рсоциалтә цхыраагӡақәеи ианаамҭоу инагӡаны ирыҭахоит. Абри атәы иҳәеит Аԥсны афинансқәа рминистр Џьансыхә Нанба.
Нанба иазгәеиҭеит, атәылаҿы Аҭагылазаашьа ҷыда аналагалаха аамышьҭахь абиуџьет иҭалоз аԥара иаалырҟьаны ишагхаз. Аха ус шакәугьы, ахада инапынҵақәа назыгӡо аԥыза-министр Валери Бганба напхгара ззиуа атәыла аиҳабыра ирылшо зегь ҟаиҵоит аиԥҟьара ҟамларц азы.
«Ауаа руалафахәи рсоциалтә цхыраагӡақәеи ианаамҭоу ирыҭахоит инагӡаны. Ҳәара аҭахума, ус ҟаларц азы абиуџьет аныхтәқәа ҳаԥсахыр акәхеит. Ахада инапынҵақәа назыгӡо инҭкааны абиуџеттә усбарҭақәа зегьы дҵас иҳаиҭеит уаанӡа асмета иалаз аԥаратә хәдықәҵарақәа рыдкылара шыҟамло, ауалафахәы ашәареи акоронавирус аҿагылареи ирыдҳәаламзар. Абас ада ԥсыхәа ыҟамызт, аха абри иабзоураны ҳфинанстә ресурсқәа зегьы уажәазы ихадароу аусқәа рахь иҳашьҭыртә ҳҟалоит», – иҳәеит афинансқәа рминистр.
Аԥсны Афинансқәа рминистрра иҟанаҵо азԥхьагәаҭарақәа рыла, аҭагылазаашьа ҩ-мҩак рыла иҿиар алшоит: иманшәалоу, иуадаҩу.
«Мызкы-ҩымз рыла аҭагылазаашьа ҭышәынтәалар, иахьынӡауа ирласны ҳзаиааиуеит хымԥада иаҳзыԥшу аекономика акаҳара, мриалагьы ҳзалҵуеит уи. Аха апандемиа акыраамҭа аҽеиҵнахыр, усҟан абиуџьет закәанла аиҭахәаԥшра аҟынӡа инеитәхоит, аныхтә хәҭа иагырхатәхоит», – иҳәеит Нанба.
Иара иациҵеит Аԥсны Урыстәылатәи Афедерациа аҟынтә афинанстә цхыраара шаиуа «иарбоу аҿҳәарақәеи ашәагаақәеи инарықәыршәаны».
Аԥсны акоронавирустә чымазара ҿкы COVID-19 аҿагылараҿы ацхыраара азҭарц зҭаху зегьы рзы алшара ыҟоуп рыхәҭалагала ҟарҵарц – Москватәи Аԥсуа Диаспореи «Ҳара ҳаидгылоуп» ахеилаки ирымоу реквизитқәа рахь доусы илшо алаҵарала Аԥсныи Урыстәылатәи Афедерациеи рҟынтә, иара убас Адунеизегьтәи аԥсуа-абаза конгресс ареквизитқәа рахь – Ҭырқәтәылантә, ма Аконгресс асаит аҟны онлаин-ԥарашәара амҩаԥгара. Еизгахо аԥара зегьы Аԥсны ауааԥсыра аҿкы чымазара рацәыхьчареи ргәабзиара ашьақәыргылареи иазкхоит.
шәҭалароуп, ма шәыҽҭажәыҩроуп.