Ажәабжьқәа 04.03.2021 17:50 26395

АААК иацнаҵеит Аҭыԥантәи аҟәшақәеи аҿар рактивреи рҳәаақәҵаҩ иҭыԥ ахь аконкурс аҿҳәара.

Адунеизегьтәи аԥсуа-абаза конгресс иацнаҵоит АААК Аҭыԥантәи аҟәшақәеи аҿар рактивреи рҳәаақәҵаҩ иҭыԥ ахь аконкурс аҿҳәара. Уаанӡа ишрылаҳәаз ала, азыԥшааҩцәа ранкетақәа жәабран 20-нӡа иаларҵар рылшон, аха уажәшьҭа ишыӡбоу ала, хәажәкыра 4 инаркны амза 15 рҟынӡагьы иаларҵарц рылшоит.

Аконкурс ацашьа ахҳәаа азуа, Аконгресс ауснагӡаратә маӡаныҟәгаҩ Инар Гыцба иазгәеиҭеит, иахьазы ахыркәшаратә етап аҟынӡа жәҩык ауаа шнеихьоу. Ишәгәалаҳаршәоит, акандидатцәа ралхра ԥшь-етапк рыла ишымҩаԥысуа: анкета алаҵара, онлаин атест ахысра, АААК анапхгаҩцәа рыҿцәажәара, нас ахыркәшаратә етап – Аконгресс Иреиҳаӡоу ахеилак ахантәаҩы Мусса Егзакь иҿцәажәара.

«Аҿар иалаҳкааз даара ихазынақәоуп, хаҭалатәи рҟазшьақәа рылагьы, рдыррақәа рылагьы, амотивациа ду рымоуп, аха ус шакәугьы, ҳара иҳаӡбеит аконкурс аҿҳәара иацаҳҵарц, иҟалап, уи аӡбахә змаҳацкәаны, ма анкета алаҵара иахьымӡаз аӡәыр даанхазар, урҭгьы рхы ԥыршәатә еиԥш алшара раҳҭарц», – иҳәеит Гыцба.

Иара иазгәеиҭеит, ари иабзоураны аконкурс алахәцәа рхыԥхьаӡара еиҳахоит, ус анакәха, Аконгресс зегь реиҳа ианаало акандидат далԥшаахоит ҳәа.

«Актәи аконкурстә етап зхы алазырхәыз ақәыԥшцәа акадртә резерв иахыԥхьаӡалахоит, урҭ рахьтә шьоукы ирыдаҳгалоит Аконгресс аусура иалахәхарц, рхы аадырԥшырц», – ҳәа еиҭеиҳәеит Гыцба.

Акоординатор (аҳәаақәҵаҩ) иуалԥшьақәа

Аҭыԥантәи аҟәшақәеи аҿар рактивреи рҳәаақәҵаҩс иҟало абарҭ аусқәа инапы рылакзаауеит:

  • АААК Аҭыԥантәи аҟәшақәа раԥҵареи, урҭ рыпроектқәеи русмҩаԥгатәқәеи рыплан аиқәыршәареи далахәзароуп, АААК аԥҟаԥҵәатә хықәкқәа рынагӡара иазынархоу, асоциалтә ҵакы змоу апроектқәа роуп ара зыӡҩахә ҳамоу.
  • Аҭыԥантәи аҟәшақәа русура ахылаԥшра, араионқәа рыбжьара аҟәшақәа дара-дара русеицура аҳәаақәҵара даҿызароуп, аусура аплан еффективла, ианаамҭоу анагӡаразы.
  • Аусура аплан аҳәаақәа ирҭагӡаны Аҭыԥантәи аҟәшақәа имҩаԥырго апроектқәеи апрограммақәеи рынагӡашьа аекономикатә еффективра дацклаԥшлароуп, Аҭыԥантәи аҟәшақәа русура ҳаамҭа иақәшәо, ихырҳагоу аметодқәа рыла еиҿкаалароуп.
  • Аҭыԥантәи аҟәшақәа инарыгӡо проектцыԥхьаӡа, усмҩаԥгатәцыԥхьаӡа ирыдҳәалоу адокументациа аиқәыршәара далахәзароуп, адокументқәа зегьы ахьынӡаиашоу гәеиҭалароуп, еиҿкааны имазароуп, АААК ацентртә офис ахь рынашьҭра дахылаԥшлароуп.
  • Инапы иану аусқәа рганахьала аҳасабырба аҟаҵара (анапхгара рыдҵала, еиуеиԥшым апрезентациақәа рымҩаԥгарагьы уахь иналаҵаны) идуп.
  • Есышықәсатәи акультуратә-спорттә фестиваль «Абаза» аиҿкаареи амҩаԥгареи дрылахәзароуп.
  • АААК Аинформациатә портал анапхгаҩи аусзуҩцәеи ианаамҭоу адырра риҭозароуп Аҭыԥантәи аҟәшақәа имҩаԥыргараны иҟоу апроектқәеи апрограммақәеи рганахьала.
  • Иреиҳаӡоу ахеилак ахантәаҩи, Ауснагӡаратә маӡаныҟәгаҩи, Аппарат анапхгаҩи имҩаԥысуа апроектқәа рҵыхәала иҟарҵо азгәаҭарақәа анализ рзуны, агхақәа иалыркаауа ириашалароуп, уаҳа урҭ ицәымцарц иҽазишәалароуп.

Иара убасгьы Акоординатор дрықәныҟәлароуп амчра змоу адҵақәа, анапхгара аҩнуҵҟатәи рықәҵарақәа, ашәҟәеиқәыршара арегламент, аиҿкаара аҩнуҵҟа иаԥу аусуратә ԥҟарақәа, иквалификациа еизирҳалароуп имаҵураҭыԥ аҿы еиҳа еиӷьны аус иулартә еиԥш.

Аконкурс аԥҟарақәа ԥсахрада иаанхеит, аҿҳәарақәа роуп еиҭакхаз.

Актәи аетап. Хәажәкыра 4 инаркны 15 рҟынӡа аконкурс иалахәхо ранкетақәа рыдкылара мҩаԥысуеит. Ихарҭәаау анкета хаҭала иаажәгар шәылшоит АААК аофис ахь, асааҭ 9:00 инаркны 18:00 рҟынӡа, мамзаргьы абри аелектронтә ԥошьҭахь иаашьҭызар ҟалоит info@abaza.org.

АААК Аҭыԥантәи аҟәшақәеи аҿар рактивреи ҳәаақәызҵо имаҵурахьы акандидат ианкета:

Аҩбатәи аетап аҟны анкета алазҵаз онлаин-ԥышәара иахрыжьуеит. Акандидатцәа 25 зҵаара рҭак ҟарҵароуп 30 минуҭ ирылагӡаны. Аилыркааратә литература, амобилтә хархәагақәа, мамзаргьы аинформациа ныҟәызго иарбанзаалак егьырҭ амыругақәа уцурхыраар ҟалаӡом.

Ахԥатәи аетап аҟны акандидатцәа хаҭала ирыҿцәажәоит. Аиҿцәаажәара мҩаԥыргоит АААК Аҟәатәи аофис аусзуҩцәа рыла ишьақәгылоу аконкурстә комиссиа алахәцәа.

Акандидат ипрофессионалтәи хаҭалатәи иҟазшьақәа рыхә ашьараан аконкурстә комиссиа зықәныҟәо аваканттә маҵураҭыԥ иақәшәо аквалификациатә ҭахрақәеи арегламент аҟны иарбоу егьырҭ аԥҟарақәеи ракәзаауеит. Аконкурстә комиссиа азин амоуп убасгьы аконкурс аҟны аиааира зымгаз, аха зыпрофессионалтәи зхаҭалатәи аҟазшьақәа ахәшьара ҳаракы зауз акандидат акадртә резерв иалаҵаразы абжьгара аҟаҵара.

Аԥшьбатәи аетап – АААК ИА ахантәаҩы Мусса Егзакь иҿцәажәра, онлаин. Аԥшьбатәи аетап алҵшәақәа рыла иалкаахоит мызкы ҿҳәарас измоу, зыхә ахшәаау аԥышәараамҭа иахысуа ҩыџьа акандидатцәа. Абри аԥышәараамҭа анхыркәшахалак зынӡа ҳәа аусура ирго аӡәы далкаахоит.

Анкетақәа рыдкылареи хаҭалатәи аиҿцәажәарақәеи мҩаԥысуеит абри аҭыӡҭыԥ ала: Аԥсны, Аҟәа ақалақь, Лакоба имҩа, 109, Адунеизегьтәи аԥсуа-абаза конгресс аофис. Азҵаарақәа шәымазар, шәҳадҵаалар ҟалоит абри аҭел ала шәасны: +7 840 226-25-26