ААдунеизегьтәи аԥсуа-абаза конгресс ақыҭа школқәа ирынаҭеит аԥсышәала ихарҭәаау амшынҵақәеи, зашьҭахьтәи ацәаҿы аԥсуа алфавити амилаҭтә символикеи зну атетрадқәеи, иара убас еиуеиԥшым аспорт хәмаррақәа рзы ампылқәеи. Акциа Аҵара амш цәыббра 1 иазкуп, уажәшьҭа ҩышықәсоуп Аконгресс уи мҩаԥнагоижьҭеи.

Зынӡа иааидкыланы Аконгресс сынтәа ақыҭа школқәа ирынаҭаз атетрадқәа рхыԥхьаӡара 4000 ыҟоуп, амшынҵақәа 250, ампылқәа 650 – ашьапылампыл, анапылампыл, амҵәышәымыл, агандбол уҳәа рылахәмарразы. Арҭ ампылқәа аԥсуа школхәыҷқәа рзы иаарышьҭит Ҭырқәтәыла иҟоу Аҳмаҭ Ҳапат напхгара зиҭо Аконгресс арегионалтә хеилаки Ҭырқәтәыла еиҿкаау АААК аҭыԥантәи аҟәшақәа рылахәылацәеи.

АААК ауснагӡаратә маӡаныҟәгаҩ Инар Гыцба иазгәеиҭеит аҳамҭақәа зегьы актәи акласс ахь ицо ахәыҷқәа роуп изызку ҳәа.

«Сынтәа [ҵыԥх иаҿырԥшны иаҳгозар] аҳамҭақәа ирыцаҳҵеит амшынҵақәагьы. Раԥхьаӡа акәны Аԥсны иҭыжьуп аԥсышәала ицәажәо амшынҵақәа. Амшынҵақәа рцәа асахьа ҭихит Аԥсны зыхьӡ рдыруа амузыкант, асахьаҭыхҩы Асҭамыр Кәыҵниа», – иҳәеит Инар Гыцба.

Иара иазгәеиҭеит, акциа хацыркын ҳәа ақыҭақәа Дәрыԥшьи, Уарчеи, Џьырхәеи рыла, иагьацҵахоит Лыхны, Ҟәланырхәа, Дранда.

«Ҳахьнеиуаз ашколқәа рҿы даара иҟәанданы ҳрыдыркылон. Ргәы иахәон атетрадқәеи амшынҵақәеи ԥсышәала иахьҭыжьу», – ҳәа еиҭеиҳәеит АААК ауснагӡаратә маӡаныҟәгаҩ.

Дәрыԥшь ақыҭан иҟоу АААК аҭыԥантәи аҟәша анапхгаҩы, Тәанаархәытәи абжьаратә школ аҵара аҟәша аиҳабы Илона Агәмаа иазгәалҭеит, Аконгресс уажәаԥхьагьы рышкол азҿлымҳара шарҭахьаз.

«Аконгресс ацхыраара ду ҳнаҭоит. Уи гәахәароуп ҳа ҳзы. Агәра ганы ҳаҟоуп ҳаиҩызара иҵегь акыршықәса ишнеило» – лҳәеит Илона Агәмаа.

Дәрыԥшьтәи аԥсуа школ адиректор Ханна Ҳагԥҳа иазгәалҭеит иахьатәи аамҭазы ақыҭа школқәа ауадаҩрақәа маҷымкәа ишрымоу. Ашкол анапхгара раԥхьаӡа иргыланы хықәкы хадас ирымоуп ахәыҷқәа ақыҭа школ ааныжьны имцартә аҟаҵара.

«Изеиԥшразаалак зхьаԥшрак анҳауа уи акраҵанакуеит ҳа ҳзы. Ари даара ишьахәу ҳамҭоуп. Иҭабуп ҳәа шәасҳәоит зегьы!» – лҳәеит Ҳагԥҳа.

Адунеизегьтәи аԥсуа-абаза конгресс, хаҭалагьы уи Иреиҳаӡоу ахеилак ахантәаҩы Мусса Егзакь Ҟәланырхәатәи ашкол аколлектив зегь рыхьӡала иҭабуп ҳәа иалҳәеит ашкол адиректор Асида Цәышԥҳа.

«Ахәыҷқәа даара ргәы иақәшәоит атетрадқәагьы амшынҵақәагьы. Иҭабуп иҳашәҭаз азҿлымҳаразы, уи даара ҳгәа иахәеит», – лҳәеит адиректор.

Иҳаҩсыз 2019 шықәсазы Адунеизегьтәи аԥсуа-абаза конгресс Аԥсны актәи акласс ахь ицоз ашколхәыҷқәа хә-нызқь тетрад рзашеит, аԥсуа алфавити амилаҭтә символикеи рынҵаны.