Алиса Хәытаба

Аусмҩаҧгатә еиҿыркааит иавтономтәу икоммерциатәым аиҿкаара «Амедиастратегиақәа рҭыҧ хадеи» Алада Федералтә Университет (АФУ) Асоциологиеи атәылаҿацәҭҵаареи ринститут (ААР) Мрагылараҭҵаара акафедреи. Астратегиатә ҵакы змоу атәылаҿацәқәа рыҟны имҩаҧысуа аполитикатә, асоциалтә, аекономикатә процесс хадақәа рыҭҵааразы афорум иаҭааит Урыстәылатәии аҳәанырцәтәии аспециалистцәа. Ҳколлега, АЕ «Адунеизегьтәи аҧсуа-абаза конгресс» аҵареи, асоциалтә активреи, агәабзиарахьчареи рыҟәша аспециалист Хышба Наур Беслан-иҧа афорум ихы алаирхәит. Иқәгылара темас иаман «Ауаажәларра, ахдырра, адәныҟатәи аполитика: Аҧсны аҧеиҧш аргылашьа».

«Ари аусмҩаҧгатә иалахәын зус бзиа избо, даара аинтерес зҵаз ауааҧсыра. Сгәы иаахәеит сахьрабадырыз. Иазгәаумҭар залшом Ростовтәи аҭҵаарадырра-медиатә еилазаара аекспертцәа рыбжьара аимадара абжьаҵара ишашьҭоу. Агәра ганы сыҟоуп ҳазлахәу аус алҵшәа бзиақәа шаанарҧшуа», - ҳәа азгәаиҭеит Хышба.

Афорум аҿы излацәажәоз атема хадақәа рахь иаҵанакуеит:

●         аидеологиеи аилазаареи: аҭырқәара афеномен, уи ауаажәларра-политикатә процессқәа ирынҭо анырра;

●         агеополитикатә еицлабра: атәыла дуқәа рыстратегиеи ринтересқәеи рыҭҵаара;

●         ашәарҭадареи аконфликтқәа рхыркәшареи: крызхыҵуа ауадаҩрақәеи (Ҟарабах, Афганистан) аҩнуҵҟатәи аимакқәеи рыӡбашьа;

●         аекономикеи аусеицуреи: атранспорттәи аенергетикатәи бжьысырҭақәа рыҿиара, асанкциақәеи аекономикатә приоритетқәа рыҧсахреи иҟарҵо анырра;

●         амиграциеи ауааҧсыреи: амиграциатә процессқәа ртенденциақәеи аџьатә ресурсқәа напхгара рыҭареи;

●         агуманитартә знеишьа: Агәҭатә Азиа аурыс бызшәа аҵара аларҵәара, аилибакаара арӷәӷәарази, аурыс культура аларҵәарази.

Аҧсуа-абаза жәлар рыҿиара иацхраауа Жәларбжьаратәи аидгыла «Алашареи» Жәларбжьаратәи аҧсуа-абаза конгресси имҩаҧысыз афорум аинформациатә партнерцәа иреиуоуп.