Адыгатәылатәи амилаҭтә кәашаратә ансамбль «Нальмес» апрограмма ҿыц аманы Аԥсны ақалақьқәа ирҭаауеит.
Саид Барганџьиа
Аԥсны ауааԥсыра бзи ирбо Адыгатәылатәи амилаҭтә кәашаратә ансамбль «Нальмес» имҩаԥнаго агастрольқәа рҳәаақәа ирҭагӡаны иқәгылеит Аҟәеи Ҭҟәарчали. Иара убасгьы артистцәа ықәгылап ҳәа ргәы иҭоуп Очамчыреи Гәдоуҭеи – мшаԥмза 11, 12 рзы. Ҭҟәарчал имҩаԥысыз аконцерт мшаԥымза 9 рзы иазгәарҭо Ақалақь амш иадҳәалан. Адырҩаҽны узыршанхоз аконцерт мҩаԥысит Аҟәа.
«Нальмес» асахьаркыратә напхгаҩы Аслан Хаджаев иажәақәа рыла, аконцерттә программа шьақәгылоуп акәашаратә номерқәа 16 рыла, урҭ ирылахәуп 80-ҩык акәашацәа.
Абри ахҭыс иазку афотолента ахәаԥшра >>
«Аамҭакала асценахь ицәырҵуеит 50-ҩык, ма 30-ҩык акәашаҩцәа. Ари даара аџьабаа зцу усуп, аха уи алҵшәа уаршанхоит. Апрограмма ҳаԥсахит, иааҳгеит Аԥсны ирымбац аномерқәа. Иара убасгьы ахәаԥшыҩцәа ирызҳархиеит еиҭашьақәҳаргылаз аномерқәа – 25 шықәса раҟара «Нальмес» иқәнамыргылахьацыз», - ҳәа еиҭеиҳәеит ансамбль асахьаркыратә напхгаҩы Аслан Хаджаев.
Убасгьы иара ҳаҭырқәҵарыла дрыхцәажәеит аԥсуа хәаԥшыҩцәа. «Абра аҟара аԥхарра зҵаз дкыларак даҽа џьара иаҳмоуцзар ҟалап. Ҳара Аԥсныи Адыгатәылеи еымша еиҽаҳарԥшуеит, избан акәзар араҟа зегь ҳзааигәоуп, иҳазгәакьоуп. Ҳаҩныҟа еиԥш ауп Аԥсныҟа ҳшаауа. Аԥсны – ҳагәдуроуп. Иҳалоу шьак оуп, иҳамоу гәык оуп», - иҳәеит аколлектив асахьаркыратә напхгаҩы.
Аԥсуа хәаԥшцәа иҭабуп ҳәа реиҳәеит иара убас ансамбль асолист, абалетмеистер, Адыгатәыла Жәлар рартист Батураи Шагәыж.
«Еиуеиԥшым атәылақәа рҿы ҳақәгылахьеит, аха араҟа зегь реиҳа ҳгәы хыҭ-хыҭуеит. Ацәанырра рацәа ҳазцәырҵуеит, еиҳаракгьы ԥсыуала ҳаныкәашо», - иҳәеит иара.
«Нальмес» имҩаԥнаго агастрольқәа дрылацәажәо, Аԥсны акультуреи аҭоурыхтә-культуратә ҭынхеи ахьчаразы аминистр Ельвира Арсалиаԥҳа иазгәалҭеит, аколлектив есымша гәахәарала ишаднакыло Аԥсны акрызҵазкуа аусмҩаԥгатәқәа раан иқәгыларц ааԥхьарақәа.
«Аԥсуа артистцәеи, ансамбль анапхгаҩи, уи алахәцәеи акыршықәстәи аиҩызара рыбжьоуп. «Нальмес» Аԥсны аҭаара – еымша акрызҵазкуа культуратә ххҭысуп», - ҳәа инаҵшьны иазгәалҭеит Арсалиаԥҳа.
Адыгатәылатәи аҳәынҭқарратә академиатә милаҭтә кәашаратә ансамбль «Нальмес» аԥҵан 1936 шықәсазы. Уи аусура аанкылан Аџьынџьтәылатәи еибашьра Дуӡӡа ашықәсқәа раан. Аибашьра анеилга ашьҭахь жәашықәса ааҵуаны ансамбль аусура еиҭахацнаркит. 1996 шықәсазы ансамбль «Нальмес» I-тәи Адунеизегьтәи адыга культуратә фестиваль (ҞБА, Нальчик) иалауреатхеит, ианашьан Адыгатәылатәи Ареспублика аҳамҭа «Адыгатәыла Ахьӡ-аԥша». Ансамбль «Нальмес» еиуеиԥшым ашықәсқәа рзы Ҭырқәтәылеи, Еидҵоу Арабтә Емиратқәеи, Шьамтәылеи, Бельгиеи рҟны имҩаԥысуаз жәларбжьаратәи афольклортә кәашаратә конкурсқәа ириааихьеит.
шәҭалароуп, ма шәыҽҭажәыҩроуп.