Аԥсны иаатит зхы иақәиҭу аиқәԥаразы X-тәи жәларбжьаратәи атурнир, иқәгылоуп АААК Иреиҳаӡоу ахеилак ахантәаҩы иҟынтә аҳамҭақәа.
Зхы иақәиҭу аиқәԥаразы X-тәи аиубилеитә жәларбжьаратәи атурнир аатит Афон ҿыц ԥхынҷкәын 10 рзы, аспортсменцәа еиндаҭлоит Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь иҟынтә аҳамҭақәа риааиразы. Аицлабрақәа аспортклуб «Абаза» 10 шықәса ахыҵра иазкуп, имҩаԥысуеит Адунеизегьтәи аԥсуа-абаза конгресс 30 шықәса ахыҵреи АААК VIII-тәи Аизарадуи рҳәаақәа ирҭагӡаны.
Атурнир аартра ацеремониаҿы иқәгылеит АААК Иреиҳаӡоу ахеилак ахантәаҩы Мусса Егзакь, зхы иақәиҭу аиқәԥаразы Аԥсны азыҟаҵаҩ хада Џьарназ Бениа, Аԥсны аолимпиатә еилакы ахада Валери Аршба, Аԥсны аҿари аспорти рзы аҳәынҭқарратә еилакы аспорт аҟәша аиҳабы Жанна Занҭариа.
Атурнир аиҿкааҩцәа рхыԥхьаӡараҿы иҟоуп аклуб «Абаза» адиректор Леонид Боџьгәуа, зхы иақәиҭу аиқәԥаразы Европеи Асовет Еидгылеи рчемпион Рашь Хәытаба, иара убас аклуб «Абаза» азыҟаҵаҩцәа – аҳаҭыр зқәу Аԥсны аспорт азҟаза Ӡука Бениа, Асовет Еидгыла аспорт азҟаза Игор Бераиа.
Аусмҩаԥгатә исасцәаны иаҭааит Аԥсны уаанӡатәи аҩнуҵҟатәи аусқәа рминистр Леонид Ӡаԥшьба, Афон ҿыц ахада Ҭемыр Оҭырба, нас уи ихаҭыԥуаҩ Беслан Харабуа.
Атурнир аатит кәашаралеи шәаҳәаралеи, икәашон гәдоуҭатәи ансамбль «Адац» артистцәа, ашәа налыгӡеит ашәаҳәаҩ Инесса Григолиа.
Мусса Егзакь атурнир асасцәеи алахәцәеи аԥсшәа реиҳәеит, аспортсменцәа зегьы рықәгыларақәа рҿы ақәҿиарақәа рзеиӷьеишьеит.
«Иахьа ҳшьам дгьыл аҿы иааҳартуеит зхы иақәиҭу аиқәԥаразы ажәабатәи жәларбжьаратәи атурнир. Сгәы шәыладууп ари аицлабра иалахәу аспортсменцәа аӡәыцыԥхьаӡа зегьы. Шәареи ҳареи ҳаамҭазтәи Аԥсны аҭоурых аԥаҳҵоит, жәларбжьаратәи аспорттә аренаҿы ҳтәыла ахьӡ ҭаҳгоит. Аиҩызареи аидгылареи аиааира ргааит!» – иҳәеит Мусса Егзакь.
Леонид Боџьгәуа иҳәеит ари атурнир акыршықәса раахыс апрофессионалцәа шеизнаго Аԥсны ақалақьқәа рҟынтә еиԥш Урыстәылантәгьы, аҿар рыбжьара ари аспортхкы алаҵәарагьы ишацхраауа азгәеиҭеит.
Аицлабрақәа ирылахәуп 130-ҩык инарзынаԥшуа аспортсменцәа ақәратә категориақәа хԥа рыла. Қәрацыԥхьаӡа ақәԥаҩцәа рыкапан алагьы еихшоуп, еиваҟәыло роуп еиқәԥо.
Атурнир актәи амш даара еилацалан. Џьарназ Бениа иажәақәа рыла, аспортсменцәа зегьы рыҩаӡара ҳаракы аадырԥшит, даараӡа ибзианы иазыҟаҵоуп, убри аҟнытә аиааира азықәԥара мариахом.
«Иахьа абра еизеит аспортсменцәа ҟазацәа, урҭ рхыԥхьаӡараҿы иҟоуп урыстәылатәи, адунеитә еицлабрақәа рҿы ичемпионцәахахьоу аҷкәынцәагьы. Зегьы рхы бзиаӡаны иаадырԥшит», – ҳәа азгәеиҭеит Бениа.
Адунеизегьтәи аԥсуа-абаза конгресс Иреиҳаӡоу ахеилак ахантәаҩы, ауаажәларратә, аҳәынҭқарратә усзуҩ, амеценат Мусса Егзакь ихраҿа агаразы зхы иақәиҭу аиқәԥара жәларбжьаратәи атурнирқәа Аԥсны имҩаԥысуеит 2011 шықәса раахыс. Ари аамҭа иалагӡаны аицлабрақәа рхы рыладырхәхьеит шәҩыла аԥсуа, аурыс спортсменцәа. Ажәабатәи аиубилеитә турнир еизнагеит 130-ҩык ақәԥаҩцәа Аԥсны ақалақьқәа зегьы рҟынтә, иара убас Ҟарачы-Черқьестәыла, Ҟабарда-Балкариа, Даӷьсҭан, Краснодар, Шәача уҳәа арегионқәа рҟынтә. Аспотртсменцәа ақәратә категориақәа хԥеи акапантә категориақәа 15 рыла еихшоуп. Аиааира згаз рыхьӡқәа еилкаахоит ԥхынҷкәын 11 рзы имҩаԥысуа афиналтә еиндаҭларақәа раамышьҭахь.
Адунеизегьтәи аԥсуа-абаза конгресс VIII-тәи Аизараду аӡбахә аларҵәара аганахьала ацхыраара ҟарҵоит: Аԥсуа ҳәынҭқарратә телерадиоеилахәыра, ателеканал «Абаза-ТВ», аинформациатә маҵзура Sputnik Аԥсны.
шәҭалароуп, ма шәыҽҭажәыҩроуп.