Ажәабжьқәа 26.08.2019 23:50 37747

АААК Иреиҳаӡоу ахеилак ахантәаҩи Аконгресс егьырҭ ахаҭарнакцәеи Иорданиа раҭаара аҳәаақәа ирҭагӡаны иԥылеит Амман иҟоу аспорттә клуб «Аль Ахли Клаб» анапхгаҩы.

Изольда Ҳагԥҳа

АААК Иреиҳаӡоу ахеилак (ИА) ахантәаҩы Мусса Егзакьи, АААК ауснагӡаратә маӡаныҟәгаҩ Инар Гыцбеи Иорданиа ахьӡала ИА апрезидиум иалоу Ануар Абазеи (Чкәуа) Аконгресс аделегациа Иорданиа раҭаара иалагӡаны, ашәахьаҽны, нанҳәамза 26 рзы Амман иҟоу ачерқьес спорттә клуб «Аль Ахли Клаб» иаҭаан, уи анапхгаҩы Омар Шыкыми дареи аҩ-еиҿкаарак рыбжьара аусеицура азҵаарақәа ирылацәажәеит.

Мусса Егзакь еиҭеиҳәеит Аконгресси ИАЕ «Алашареи» аспорт аҿиареи аларҵәареи азҿлымҳара ду шарҭо. Егзакь агәыӷра ааирԥшит Иорданиатәи аҿар Абаза жәлар рыхәмаррақәа ирылахәхап ҳәа, убри азыҳәан дара ааԥхьарагьы риҭеит Ҟарачы-Черқьестәылахь - есышықәса арҭ аспорттә хәмаррақәа мҽхакы тбаала иахьымҩаԥысуа. Аԥсны аус ауеит аспорттә клуб «Абаза» ҳәагьы ациҵеит Егзакь.

"Иорданиатәи аспортсменцәа алшара рымоуп Аԥсныи Ҟарачы-Черқьестәылеи имҩаԥысуа атурнирқәа рылахәхаразы. Аспорттә, акультуратә усмҩаԥгатәқәа рыла ҳҿар реидкылара ҳалҳаршар ҟалоит", - иҳәеит АААК ИА ахантәаҩы. 

Аспорттә клуб ахада Омар Шыкым ихәҭаахьала дақәшаҳаҭхеит аҿар аспорти агәызҩыдаратә ԥсҭазаашьеи разхьарԥшра акырӡа шаҵанакуа. 

"Ҳара ҳаклуб аҟны еиуеиԥшым аспортхкқәа рыла аҽазыҟаҵаразы алшара ыҟоуп: ашьапылампыл, амҵәышәмпыл, агандбол, аӡсара. Иҳамоуп ҳхатәы акәашаратә ансамбль, уаҟа аҿарацәа кавказтәи акәашарақәа рҵоит, аԥсуа кәашарақәагьы уахь иналаҵаны. Иааидкыланы аклуб ахь иныҟәоит зықьҩык рҟынӡа ауааԥсыра", - иҳәеит Шыкым. 

Аиԥылара иацҵауа Мусса Егзакьи Омар Шыкыми аспорттә еицлабрақәа реиҿкааразы доусы ирымоу агәҭакқәа еибырҳәеит, ԥхьаҟагьы аимадара шрыбжьазаауа дыршаҳаҭит. 

"Асеиԥш иҟоу аусеицура рҿиалатәуп, аԥышәа еимдалатәуп. Аспорт ҳара аҳауа иаҳзаҩызоуп", - ҳәа иажәа хиркәшеит Егзакь. 

АААК аделегациа Иорданиатәи Ҳашимиҭтәи Акралра раҭаара мҩаԥысуеит нанҳәамза 27 рҟынӡа. Иара арбоуп Аконгресс анапхгара 2019 шықәсазы имҩаԥнагараны иҟоу аҳәаанырцәтәи аҭаарақәа рыплан-еихшанҵа аҟны, 2018 шықәсазы Иреиҳаӡоу ахеилак алахәцәа ишьақәдырӷәӷәаз. Ҳазҭоу ашықәс нҵәаанӡа АААК аҭаарц иҟоуп иара убас Шьамтәыла, Германиа, Голландиа, Ҭырқәтәыла.