X-тәи аиубилеитә жәларбжьаратәи ақәԥаҩцәа ртурнир мҩаԥысит Афон ҿыц ԥхынҷкәын 10-11 рзы.
Мусса Егзакь ихраҿа агаразы зхы иақәиҭу ақәԥаҩцәа X-тәи жәларбжьаратәи ртурнир ахыркәшаратә еиндаҭларақәа мҩаԥысит ԥхынҷкәын 11 рзы Афон ҿыц. Ари атурнир Адунеизегьтәи аԥсуа-абаза конгресс 30 шықәса ахыҵреи мышқәак раԥхьа Аҟәа имҩаԥысуаз АААК Аизарадуи ирыдҳәалан.
Зынӡа атурнир иалахәын 130-ҩык раҟара аспортсменцәа, ақәратә категориақәа хԥеи акапантә категориақәа 15 рыла еихшаны. Актәи амш алҵшәақәа рыла, афинал ахь инеит категориацыԥхьаӡа ԥшьҩык-ԥшьҩык ақәԥаҩцәа. Ахәыҷқәа рыбжьара аиааира игеит Гәдоуҭатәи аспортсмен Инал Гьегьенаа, аӡбаҩцәа иазгәарҭеит иара ипрофессионализм, иаԥхьаҟагьы иҵегь аихьӡарақәа изеиӷьаршьеит. Аспортсмен иҳәеит ари атурнир иҵегь ихы алаирхәларц игәы ишҭоу, егьырҭ ақәратә категориақәа рҟынгьы аиааира агара иҽшазишәало.
Даниил Харчлаа имч ԥишәарц атурнир ахь дааит Калининград ақалақь аҟынтәи, аиааирагьы игеит 70 кьыла рҟынӡа зыкапан ыҟоу арԥарацәа рыбжьара. Аспортсмен иажәақәа рыла, ас еиԥш иқәгылара бзиа иаԥхьанеиуан аҽазыҟаҵарақәа рацәаны. Даниил иазгәеиҭеит, дзақәԥоз аспортсменцәагьы даара ибзианы иазыҟаҵан ҳәа, убри аҟнытә аиааира азықәԥара акыр аџьабаа ацын, аха аинтересгьы аҵан.
Атурнир аҳәаақәа ирҭагӡаны имҩаԥысит ақәыԥшцәа рыбжьара Урыстәылазегьтәи аицлабрақәа рҟны аиааира згаз ақәԥаҩ Баграт Ԥандариеи зхы иақәиҭу аиқәԥаразы Литва ачемпион Арип Абдулаеви реиндаҭлара. Аиааира игеит Абдулаев.
Адуцәа рыбжьара актәи аҭыԥ ааникылеит Игор Саркисиан. Иара ишиҳәаз ала, ари аиурнир алахәхара акраҵанакуеит аспортсменцәа зегьы рзы.
«Абри аҩыза атурнирқәа ирыбзоураны Аԥсны зхы иақәиҭу аиқәԥара аспортхкы ҿиоит, аҩаӡара еиҳагьы иҳаракхоит: иахьа абра иқәгылеит арегионалтәи, жәлабжьаратәи ачемпионатқәа рҿы аиааира згахьоу ақәԥаҩцәа. Агәра ганы сыҟоуп хара имгакәа Аԥсны иааӡаз аспортсмен ақәԥара адисциплинала Аолимпиадаҿы актәи аҭыԥ шиго», – иҳәеит Саркисиан.
Аԥсны жәлар рџьынџьтәылатә еибашьра аветеранцәа руаажәларратә еиҿкаара «Аруаа» ахантәаҩы Ҭемыр Гәлиа игәаанагарла, атурнир иалнаршоит адунеи еиуеиԥшым акәакьқәа рҟны инхо, зҽазыҟазҵо аспортсменцәа ҭыԥк аҿы реиқәшәара, рыпрофессионалтә ԥышәа аимдара, рҟазара аизырҳара.
«Ҳара ҳзы игәырӷьара дууп Аԥсны абысҟаҩык аспортсменцәа хатәрақәа ахьеизаз. Иҭабуп ҳәа расҳәар сҭахуп дара зегьы иаадырԥшыз апрофессионализм азы, иара убас аус рыдызулоз азыҟаҵаҩцәагьы – рџьабаазы. Хазы иҭабуп ҳәа расҳәоит атурнир аиҿкааҩцәа, ари аспорт аныҳәа ҳалаԥшыртә иҟазҵаз», – ҳәа азгәеиҭеит Гәлиа.
АААК Иреиҳаӡоу ахеилак ахантәаҩы Мусса Егзакь атурнир аиҿкаашьа ахә ҳаракны ишьеит, ачемпионцәеи урҭ разыҟаҵаҩцәеи рықәҿиарақәа рыдиныҳәалеит.
«Арҭ аҩымшк ҳгәы алаҟаны ҳахәаԥшуан зыҩаӡара ҳараку ақәԥаҩцәа реиндаҭлара. Гәыкԥсыкала иҭабуп ҳәа расҳәоит ари ахҭыс аиҿкааҩцәа, аӡбаҩцәа, азыҟаҵаҩцәа зегьы рааԥсаразы. Ҷыдала иалыскаар сҭахуп азыҟаҵаҩцәа: шәара шәџьабаа ду иабзоуроуп иахьа абарҭ рҩызцәа апрофессионалцәа ҳҿаԥхьа иахьгылоу», – иҳәеит Егзакь.
Аспортсменцәа рахь ихы нарханы Мусса Егзакь иазгәеиҭеит абас еиԥш аиндаҭларақәа шыцхыраагӡоу аԥышәеимдареи ашьцыларақәа реихаҳареи улшартә.
«Иахьа ҭыԥс иаанышәкылазаалак зегьы шәаиааит ҳәа шәыԥхьаӡар ҟалоит. Шәызегьы абаҩхатәра шшәылоу збоит. Агәра ганы сыҟоуп доусы шәыԥсҭазаараҿы ақәҿиаа дуқәа шшәоуа, аспорт аганахьалагьы, иара ус зеиԥшлагьы», – ҳәа иажәа хиркәшеит Мусса Егзакь.
АААК Иреиҳаӡоу ахеилак ахантәаҩы атурнир аҟны аиааира згаз аԥаратә ҳамҭақәа ранеишьеит: актәи аҭыԥқәа згаз аспортсменцәа зегьы 15 000 мааҭ роуит; аҩбатәи аҭыԥқәа згаз – 10 000 мааҭ; ахԥатәиқәа – 5 000 мааҭ. Иааидкыланы атурнир аҳамҭақәа зегьы ирықәхарџьын 525 000 мааҭ. Уи адагьы аспортсменцәа амедалқәеи аҳаҭыршәҟәқәеи рырҭеит. Агәаларшәагатә ҳамҭақәа рхахьы иргеит аспортклуб «Абазеи» Аҿари аспорти рзы Аԥсны аҳәынҭқарратә еилаки.
Адунеизегьтәи аԥсуа-абаза конгресс Иреиҳаӡоу ахеилак ахантәаҩы, ауаажәларратә, аҳәынҭқарратә усзуҩ Мусса Егзакь ихраҿа агаразы ақәԥаҩцәа ртурнирқәа Аԥсны имҩаԥысуеит 2011 шықәса раахыс. Ари аамҭа иалагӡаны аицлабрақәа ирылахәын шәҩыла аԥсуа, аурыс спортсменцәа.
Адунеизегьтәи аԥсуа-абаза конгресс VIII-тәи Аизараду аӡбахә аларҵәара аганахьала ацхыраара ҟарҵоит: Аԥсуа ҳәынҭқарратә телерадиоеилахәыра, ателеканал «Абаза-ТВ», аинформациатә маҵзура Sputnik Аԥсны.
шәҭалароуп, ма шәыҽҭажәыҩроуп.