Адунеизегьтәи аԥсуа-абаза конгресси амузыкант Абзагә Марыхәбеи амузыкатә проект «Аҿар рыбжьы» аԥшьыргеит.
Адунеизегьтәи аԥсуа-абаза конгресс аԥсуа музыкант Абзагә Марыхәба далархәны апроект ҿыц «Аҿар рыбжьы» агәаҭаратә еиԥылара мҩаԥыргеит. Раԥхьатәи амастер-класс еиҿкаан Гәдоуҭа ақалақь жәабран 9 рзы, уи рхы аладрыхәит 30-ҩык ахәыҷқәа инареиҳаны.
Апроект хықәкыс иамоуп Аԥсны еизҳауа абиԥара рмузыкатә баҩхатәра аарԥшра, ралкаара. Аидеиа авторс дамоуп амузыкант Абзагә Марыхәба, иара ишиԥхьаӡо ала, абри апроект арҿиарахь икыду ахәыҷы ишьақәгылараҿы раԥхьатәи акрызҵазкуа шьаҿаны иҟалар ауеит.
«Иахьатәи ҳус ззынархоу амузыкатә индустриа аӡыргара мацара акәӡам, абаҩхатәра қәыԥшқәа ралԥшаароуп. Ауаҩы даншәуа ацхыраара иҭара зегьы ирыцкуп. Ҩыџьа-хҩык ирыдымхаргьы, дара иртәу амҩа иаша иаҳзықәҵар – убригьы лыҵшәа бзиоуп ҳа ҳзы», – ҳәа азгәеиҭеит иара.
Актәи амастер-класс лхы алалырхәит НТВ иаҳнарбоз Жәларбжьаратәи ахәыҷтәы ашәаҳәаратә конкурс «Ты супер!» аиааирагаҩ Валериа Адлеиԥҳа. Лара ашколхәыҷқәа ирзеиҭалҳәеит лырҿиаратә мҩа дшалагоз, раԥхьатәи лықәгыларақәа зеиԥшраз, ԥхьаҟа гәҭакқәас илымоу, уи ашьҭахь азҵаарақәа илырҭоз рҭак ҟалҵеит.
«Аҟыбаҩ злоу дарбанзаалак адгылара иҭахуп, еиҳаракгьы даныхәыҷу. Сара схазгьы исҳәар сылшоит, сани сырҵаҩи рыцхыраарада сара авокал аҿгьы еихьӡара соуамызт, иара ус амузыкаҿы зынӡа схы аасмырԥшыргьы ҟалон», – лҳәеит Адлеиԥҳа.
Апроект ҿыц «Аҿар рыбжьы» Адунеизегьтәи аԥсуа-абаза конгресс ахьӡала ҳәаақәҵара арҭалоит Аҿар реизҳареи абаҩрҵәыреи рыҟәша аиҳабы Валери Берзениа, нас иара уи аҟәша аспециалист Есма Кәыҵниаԥҳа. Берзениа иажәақәа рыла, иҭыхны ирымоу аплан инақәыршәаны, амастер-классқәа Аԥсны араионқәа зегьы рҿы имҩаԥгахоит.
«Апроект иалаҳархәлоит еицырдыруа аԥсуа шәаҳәаҩцәеи артистцәеи. Раԥхьатәи агәаҭаратә еиԥылара иаҳнарбеит ахәыҷқәа амузыка ргәы шазыбылуа, ишазҿлымҳау. Ҳгәы иҭоуп Аԥсны араионқәа зегьы ҳарҭаарц. Ари апроект алҵшәас иҟалоит амузыкатә аԥҵамҭа ҿыцқәеи авидеоклипқәеи, дара азырхиахоит Аконгресси Абзагә Марыхәбеи рымчала. Ҳақәгәыӷуеит ари аус абзоурала ахьӡ ҿыцқәа ҳаҳап ҳәа, заԥхьаҟа ҳкультура ӡырызгаша артистцәа гылап ҳәа», – иҳәеит Валери Берзениа.
Амастер-классқәа лассы имҩаԥысраны иҟоуп Тҟәарчал, Гал, Очамчыра.
шәҭалароуп, ма шәыҽҭажәыҩроуп.