Лента событий ВААК
АААК аиҳабыратә классқәа рҿы итәоу рзы азанааҭалхра иазку апроект иацнаҵоит
Аҵареи, асоциалтә активреи, агәабзиарахьчареи рзы АААК аҟәша Аҭыԥантәи ахаҭарнакрақәа аус рыдулара аҳәаақәа ирҭагӡаны аԥхынтәи аԥсшьарамшқәа рнаҩс еиҭахацнаркуеит аиҳабыратә классқәа рҵаҩцәа рзы азанааҭалхра иазку аиԥыларақәа. Атренинг ҿыц мҩаԥысит Гәдоуҭа араион Мгәыӡырхәа ақыҭан, имҩаԥыргеит АААК аусзуҩцәа Изольда Ҳагԥҳаи Наур Хышбеи. Атренинг рхы аладырхәит Аҟәатәи аҳәынҭқарратә коллеџь аргыларатә маҭәарқәа рырҵаҩы Алиса Барцыц, афилолог-аиҭагаҩ Сариа Касланӡиа, зхатәы кыцӡырҭатә студиа «Rama» змоу Сариа Аӡынԥҳа, аинформациатә маҵзура Sputnik Аԥсны иҭзыжьуа аредактор Арда Лышәԥҳа. Аиҿцәажәара рхы аладырхәит 28-ҩык аҵаҩцәа, дара азҵаарақәа рҭиуан, ԥхьаҟа мҩас изныларц ргәы иҭоу еиҭарҳәон. Азанааҭалхра иазку аиԥыларақәа Аԥсны ашколқәа рҟны имҩаԥгахоит аушьҭымҭацәа рхы ззыркырц ирҭаху еилыркаартә, ииашаны иалырхыртә еиԥш ацхыраара рыҭаразы. Адунеизегьтәи аԥсуа-абаза конгресс аиԥш зеиԥшу аиԥыларақәа жәба еиҿнакаахьеит.
